រាជរដ្ឋាភិបាល បានសម្រេចកែសម្រួលតួនាទី និងភារកិច្ចរបស់អគ្គនាយកដ្ឋាន ត្រួតពិនិត្យទំនិញនីហរ័ណ អាហរ័ណ និងបង្ក្រាបការក្លែងបន្លំ ឬហៅកាត់ថា កាំកុងត្រូល និងបានប្តូរឈ្មោះឱ្យទៅជា អគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ «ក.ប.ប» កាលពីថ្ងៃទី ១៦ ខែមីនា ឆ្នាំ ២០២០ តាមរយៈអនុក្រឹត្យលេខ ៣៨ ស្ដីពីការរៀបចំ និងការប្រព្រឹត្តទៅរបស់ក្រសួងពាណិជ្ជកម្ម។
គិតមកដល់ពេលនេះ ក.ប.ប បានអនុវត្តតួនាទីភារកិច្ចថ្មី ប្រមាណ ១ ឆ្នាំមកហើយ។ ទាក់ទងនឹងបេសកកម្មរបស់ស្ថាប័ននេះ ភ្នំពេញប៉ុស្តិ៍បានធ្វើបទសម្ភាសជាមួយនឹងលោក ផាន អូន អគ្គនាយកនៃអគ្គនាយកដ្ឋាន ក.ប.ប ដែលមានខ្លឹមសារដូចតទៅ៖
បន្ទាប់ពីបានកែសម្រួល និងប្តូរឈ្មោះថ្មី តើ ក.ប.ប បានដើរតួនាទីសំខាន់អ្វីខ្លះ ជំនួសឱ្យអ្នកប្រើប្រាស់ និងបណ្តាក្រុមហ៊ុនក្នុងប្រទេស?
អគ្គនាយកដ្ឋាន ក.ប.ប គឺជាស្ថាប័នមួយចំណុះក្រោមក្រសួងពាណិជ្ជកម្ម។ អគ្គនាយកដ្ឋាន ក.ប.ប បានដើរតួនាទី និងភារកិច្ចសំខាន់ៗ ដែលត្រូវបានកំណត់យ៉ាងច្បាស់ដូចឈ្មោះថ្មីរបស់អង្គភាពនេះ ដោយផ្តោតលើការការពារអ្នកប្រើប្រាស់ តាមរយៈការការពារសិទ្ធិ និងផលប្រយោជន៍អ្នកប្រើប្រាស់ កិច្ចការ ប្រកួតប្រជែង។ ការងារទាំងនេះ គឺធានាឱ្យបាននូវបរិយាកាសប្រកួតប្រជែងដោយស្មើភាពក្នុងការធ្វើធុរកិច្ច បង្ក្រាបការក្លែងបន្លំ តាមរយៈការធានាឱ្យបាននូវសុវត្ថិភាព គុណភាព លើផលិតផលទំនិញ និងសេវា។
តើ ក.ប.ប មានតួនាទីអ្វីខ្លះ?
អគ្គនាយកដ្ឋាន ក.ប.ប មានតួនាទីសំខាន់ៗក្នុងការស្រាវជ្រាវ រៀបចំកសាងគោលនយោបាយ និងយុទ្ធសាស្ត្រពាក់ព័ន្ធនឹងគុណភាព សុវត្ថិភាពលើផលិតផលទំនិញ និងសេវា និងការពារអ្នកប្រើប្រាស់ និងកិច្ចការប្រកួតប្រជែង។ បន្ថែមពីនេះ យើងក៏មានតួនាទីត្រួតពិនិត្យទំនិញ និងសេវា ហើយក្នុងសមត្ថកិច្ចរបស់យើង យើងក៏មានកិច្ចសហប្រតិបត្តិការជាមួយនឹងសមត្ថកិច្ចពាក់ព័ន្ធ ទប់ស្កាត់ និងបង្ក្រាបការក្លែងបន្លំពាណិជ្ជកម្ម និងការពារសិទ្ធិ និងផលប្រយោជន៍របស់អ្នកប្រើប្រាស់ ដើម្បីធានាគុណភាព សុវត្ថិភាព និងអនុលោមភាពនៃផលិតផលទំនិញ និងសេវាដោយធានាទីផ្សារប្រកួតប្រជែង ជាពិសេសនោះ គឺយើង នឹងចាត់វិធានការចំពោះការព្រមព្រៀងដែលរឹតត្បិត រារាំង ឬបង្ខូចដល់ការប្រកួតប្រជែង។
ជាមួយគ្នានេះ អគ្គនាយកដ្ឋាន ក.ប.ប ក៏ដើរតួនាទីជាលេខាធិការដ្ឋាននៃគណៈកម្មាធិការជាតិការពារអ្នកប្រើប្រាស់ គណៈកម្មាធិការត្រួតពិនិត្យផលិតផលហាឡាលកម្ពុជា និងគណៈកម្មាធិការកូដិចជាតិ ព្រមទាំងដើរតួនាទីជាលេខាធិការដ្ឋាននៃគណៈកម្មាធិការប្រកួតប្រជែងកម្ពុជាផងដែរ នៅពេលគណៈកម្មាធិការនេះត្រូវបានបង្កើតឡើងក្នុងពេលឆាប់ៗខាងមុខ។
ក្នុងរយៈពេលកន្លងមកនេះ តើ ក.ប.ប សម្រេចបានការងារធំៗអ្វីខ្លះ?
អគ្គនាយកដ្ឋាន ក.ប.ប សម្រេចបានសកម្មភាពការងារធំៗជាច្រើន ដូចជា យើងបានចុះពិនិត្យទីផ្សារបានចំនួន ៦១៤ លើក ដកហូតទំនិញមិនមានភាពអនុលោមចំនួន ៣៨ តោន ៩០០ គីឡូក្រាម មកកម្ទេចចោល។
យើងបានស្ទាក់ចាប់រថយន្តដឹកបង្គាស្រស់មានចាក់បញ្ចូលសារធាតុ CMC (ចាហួយ) ចំនួន ៧ តោន និង ១០០ គីឡូក្រាម គ្រឿងក្នុងជ្រូកចំនួន ៣២០ គីឡូក្រាម និងសារធាតុបាញ់លើរុក្ខជាតិធ្វើឱ្យស្រស់ និងឆាប់លូតលាស់ គ្មានស្លាកសញ្ញាត្រឹមត្រូវបានចំនួន ៧៨ ប៊ីដុង ស្មើនឹង ២ ៣៤០ (ពីពាន់
បីរយសែសិប) លីត្រ។
យើងបានស្រាវជ្រាវករណីពុលស្រានៅខេត្តកណ្តាល ខេត្តកំពត ខេត្តពោធិ៍សាត់ បន្ទាយមានជ័យ និងរាជធានីភ្នំពេញ ដោយបានដកយកគំរូស្រាស ស្រាថ្នាំ និងស្រាទំពាំងបាយជូរមកវិភាគនៅមន្ទីរពិសោធន៍ ដើម្បីរកសារធាតុមេតាណុល។ ជាមួយគ្នានោះ យើងក៏បានបើកយុទ្ធនាការ យកគំរូស្រាសស្រាទំពាំងបាយជូរ និងស្រាថ្នាំនៅបណ្តាទីតាំងផលិត និងលក់ស្រា នៅទូទាំងប្រទេស មកវិភាគនៅមន្ទីរពិសោធន៍របស់អគ្គនាយកដ្ឋាន ដើម្បីរកសារធាតុមេតាណុលផងដែរ។
ទាក់ទងទៅនឹងការលក់ប្រេងឥន្ធនៈ តើ ក.ប.ប បានរកឃើញអ្វីខ្លះ ?
យើងបានចុះត្រួតពិនិត្យគុណភាពកម្រិតសន្ទស្សន៍អុកតាន (Octane) និងបរិមាណរង្វាស់រង្វាល់ប្រេងសាំង នៅតាមបណ្តាស្ថានីយ/ដេប៉ូលក់ប្រេងឥន្ធនៈបានចំនួន ១ ៩៨០ ស្ថានីយ/ដេប៉ូ ដោយរកឃើញដេប៉ូចំនួន ៨៣៦ លក់ប្រេងជូនប្រជាពលរដ្ឋ មិនអនុលោមផ្នែកគុណភាព បរិមាណ និងតម្លៃ។ ក្រៅពីនេះយើងបានត្រួតពិនិត្យគុណភាពអាល់កុល និងជែលលាងដៃគ្រប់ប្រភេទ ដោយរកឃើញ និងរឹបអូសកម្ទេចចោលសារធាតុមេតាណុលនៅតាមបណ្តាឃ្លាំងស្តុក តាមទីផ្សារ និងឱសថស្ថាននានាប្រមាណ ២០០ ០០០ (ពីររយពាន់) លីត្រ។
មន្ត្រីយើង ថែមទាំងបានរកឃើញ និងដកហូតខោទឹកនោមក្លែងបន្លំម៉ាក ១៧ ៤០២ (ដប់ប្រាំពីរពាន់ បួនរយពីរ) ខោ មករក្សាទុកដើម្បីអនុវត្តនីតិវិធីបន្ត និងបង្ក្រាបបទល្មើសរំលោភសិទ្ធិផ្ដាច់មុខ តាមបណ្ដឹងរបស់ក្រុមហ៊ុនចំនួន ៣ ដោយដកហូតភេសជ្ជៈចំនួន ២០៨ ៥៤៦ ដប ឬកំប៉ុង។
តើមានសំណុំរឿង ត្រូវបានបញ្ជូនទៅតុលាការទេ ហើយតើ កបប មានបានទទួលពាក្យបណ្តឹង ពីពលរដ្ឋដែលជាអ្នកប្រើប្រាស់ដែរទេ?
ចំពោះនីតិវិធីតាមផ្លូវតុលាការវិញ យើងបានកោះអញ្ជើញក្រុមហ៊ុនចំនួន ១៥ ឱ្យមកបំភ្លឺ និងផ្តល់ឯកសារពាក់ព័ន្ធនឹងការផ្សាយពាណិជ្ជកម្មលក់ផលិតផលដែលមានភ្ជាប់រង្វាន់តាមប្រព័ន្ធសារព័ត៌មាននានា ហើយយើងបានទទួលពាក្យបណ្ដឹងពីប្រជាពលរដ្ឋដែលជាអ្នកប្រើប្រាស់ និងក្រុមហ៊ុនឯកជនបានចំនួន ១៩ បណ្ដឹង ដែលក្នុងនោះមាន ១៤ បណ្ដឹងកំពុងដោះស្រាយ ៣ ពាក្យបណ្ដឹងត្រូវបានកសាងសំណុំរឿងបញ្ជូនទៅតុលាការ និង ២ ពាក្យបណ្ដឹង ត្រូវបានសម្របសម្រួលបញ្ចប់ក្រៅប្រព័ន្ធតុលាការ។
តើមានបទល្មើសប៉ុន្មានករណីដែល កបប បានរកឃើញ ?
មន្ត្រីយើងទូទាំងប្រទេស បានរកឃើញបទល្មើសចំនួន ៧៥៩ ករណី ដោយបានអនុវត្តវិធានការពិន័យអន្តរការណ៍ទៅតាមប្រភេទ និងទំហំនៃបទល្មើសនីមួយៗ និងបទល្មើសចំនួន ៧ ត្រូវបានកសាងសំណុំរឿងបញ្ជូនទៅតុលាការ និងវិភាគគុណភាពទំនិញបានចំនួន ២ ៤៨៤ រកឃើញគំរូចំនួន ៤០១ មិនអនុលោមនឹងបញ្ញត្តិបច្ចេកទេស។
តើលោកអាចវាយតម្លៃបែបណា ចំពោះសកម្មភាពការងាររបស់ ក.ប.ប ជាពិសេសមន្ត្រីរបស់ ក.ប.ប ដែលបានចូលរួមបំពេញការងារក្នុងពេលកន្លងមកនេះ?
ក្នុងរយៈពេល ១ ឆ្នាំមកនេះ មន្ត្រីរបស់អគ្គនាយកដ្ឋាន ក.ប.ប មានការលះបង់ខ្ពស់ ទាំងកម្លាំងកាយ និងកម្លាំងចិត្ត ក្នុងការអនុវត្តតួនាទី និងភារកិច្ចរបស់ខ្លួន ប្រកបដោយការទទួលខុសត្រូវខ្ពស់ និងវិជ្ជាជីវៈ។
ការបំពេញការងាររបស់មន្ត្រីយើង គឺមានគោលការណ៍ ផែនការ និងការចង្អុលបង្ហាញច្បាស់លាស់ ដែលចូលរួមយ៉ាងសកម្មក្នុងការថែរក្សា និងការពារសុខុមាលភាពរបស់ប្រជាពលរដ្ឋ។
មន្ត្រីយើង ក៏មានកិច្ចសហការបានល្អប្រសើរជាមួយស្ថាប័ន និងអាជ្ញាធរពាក់ព័ន្ធ ជាពិសេសបានដើរតួយ៉ាងសំខាន់ជាសេនាធិការរបស់រាជរដ្ឋាភិបាលក្នុងការប្រយុទ្ធប្រឆាំងនឹងជំងឺកូវីដ ១៩ តាមរយៈការលុបបំបាត់ការលក់អាល់កុលសម្លាប់មេរោគក្លែងក្លាយចេញពីទីផ្សារ និងតាមដានតម្លៃទំនិញលើទីផ្សារ ដើម្បីចៀសវាងនូវការដំឡើងថ្លៃទំនិញហួសហេតុណាមួយ។
តើ ក.ប.ប បានជួបប្រទះនូវឧបសគ្គ និងកង្វះខាតអ្វីខ្លះ និងទាមទារឱ្យមានការពង្រឹងបន្ថែមយ៉ាងដូចម្តេច?
កន្លងមកនេះ អគ្គនាយកដ្ឋាន ក.ប.ប បានជួបប្រទះនូវឧបសគ្គ និងកង្វះខាតមួយចំនួន ដូចជា កិច្ចសហប្រតិបត្តិការរវាងស្ថាប័នពាក់ព័ន្ធនៅមានកម្រិត ជាពិសេសនោះ គឺកិច្ចសម្រួលពាណិជ្ជកម្មសុវត្ថិភាពម្ហូបអាហារ និងកិច្ចការពារអ្នកប្រើប្រាស់តែម្តង ដែលនាំឱ្យប្រសិទ្ធភាពនៃការអនុវត្តគោលនយោបាយច្បាប់ និងបទប្បញ្ញត្តិជាធរមាន មិនទាន់បានល្អប្រសើរ។
ចំពោះសមត្ថភាពវិភាគរបស់មន្ទីរពិសោធន៍របស់យើង ក៏នៅមានកម្រិត និងកំពុងស្ថិតក្នុងស្ថានភាពរៀបចំឱ្យមានលក្ខណៈកាន់តែប្រសើរ ដើម្បីធ្វើយ៉ាងណាធានាបាននូវការវិភាគប្រកបដោយប្រសិទ្ធភាព និងការវាយតម្លៃទទួលស្គាល់តាមស្តង់ដាអន្តរជាតិសម្រាប់ពលរដ្ឋយើង។
ក្រៅពីនេះ ចំពោះច្បាប់ និងលិខិតបទដ្ឋានសម្រាប់គាំទ្រដល់ដំណើរការអនុវត្តការងាររបស់យើង ក៏នៅមិនទាន់គ្រប់គ្រាន់ ដូចជាបទប្បញ្ញត្តិសម្រាប់គ្រប់គ្រងការផ្សព្វផ្សាយពាណិជ្ជកម្ម បទប្បញ្ញត្តិសម្រាប់ត្រួតពិនិត្យផលិតផលអគ្គិសនី និងអេឡិចត្រូនិកបទប្បញ្ញត្តិសម្រាប់គ្រប់គ្រងការប្រមូលម្ហូបអាហារត្រឡប់មកវិញនីតិវិធីសម្រាប់អនុវត្តច្បាប់ និងបទប្បញ្ញត្តិនានាអីជាដើម។
បន្ថែមពីនេះការយល់ដឹងអំពីច្បាប់ និងលិខិតបទដ្ឋានរបស់អ្នកប្រើប្រាស់ អាជីវករ ផលិតករ នៅមានកម្រិត ហើយជាក់ស្តែងនៅមិនទាន់មានការចូលរួមសហការ ពីអ្នកប្រើប្រាស់ អាជីវករ និងផលិតករនោះទេ។
ឧបសគ្គយើងមួយទៀតនោះគឺការខ្វះខាតសម្ភារចាំបាច់ក្នុងការអនុវត្តច្បាប់ ដែលនាំឱ្យមានភាពយឺតយ៉ាវ ក្នុងការអនុវត្តច្បាប់។
តើគោលដៅសម្រាប់ឆ្នាំថ្មី ក.ប.ប នឹងមានផែនការយ៉ាងដូចម្តេចសម្រាប់ការពារផលប្រយោជន៍ប្រជាពលរដ្ឋជាពិសេសសុវត្ថិភាពរបស់ពលរដ្ឋ លើការប្រើប្រាស់ចំណីអាហារ និងទំនិញ?
អគ្គនាយកដ្ឋាន ក.ប.ប នៅតែមានផែនការក្នុងការបន្តកសាង និងរៀបចំបទប្បញ្ញត្តិចាំបាច់នានា សម្រាប់ការអនុវត្តច្បាប់ស្តីពីការប្រកួតប្រជែង និងច្បាប់ស្តីពីកិច្ចការពារអ្នកប្រើប្រាស់ឱ្យមានប្រសិទ្ធភាព និងប្រសិទ្ធផល ដើម្បីការពារផលប្រយោជន៍ប្រជាពលរដ្ឋជាពិសេសសុវត្ថិភាពរបស់ពលរដ្ឋលើការប្រើប្រាស់ចំណីអាហារ និងទំនិញ។
ជាងនេះទៅទៀតអគ្គនាយកដ្ឋាន ក.ប.ប នៅតែមានជំហរក្នុងការជំរុញដំណើរការការពារសេចក្តីព្រាងច្បាប់ស្តីពីសុវត្ថិភាពម្ហូបអាហារ សេចក្តីព្រាងអនុក្រឹត្យស្តីពីការគ្រប់គ្រងការប្រមូលម្ហូបអាហារត្រឡប់មកវិញ និងសេចក្តីព្រាងអនុក្រឹត្យស្តីពីការរៀបចំ និងការប្រព្រឹត្តទៅរបស់គណៈកម្មាធិការប្រកួតប្រជែងកម្ពុជា និងបទប្បញ្ញត្តិពាក់ព័ន្ធនានា នៅដំណាក់កាលបន្ទាប់ ឱ្យបានឆាប់រហ័ស ដើម្បីធ្វើយ៉ាងណា ឱ្យច្បាប់ទាំងនេះ អាចអនុវត្តបានក្នុងពេលឆាប់ៗ សម្រាប់ការពារផលប្រយោជន៍ពលរដ្ឋ។
ក្នុងឆ្នាំ ២០២២ នេះអគ្គនាយកដ្ឋាន ក.ប.ប មានទិសដៅបន្តធ្វើការផ្សព្វផ្សាយ និងបណ្តុះបណ្តាលច្បាប់ស្តីពីការប្រកួតប្រជែងដែលទទួលបានការអនុម័តថ្មីៗនេះ ដល់ភាគីពាក់ព័ន្ធនានា និងបន្តអនុវត្តច្បាប់ឱ្យបានម៉ឺងមាត់ ក្នុងការចុះអង្កេតទំនិញលើទីផ្សារ និងតាមដានតាមស្ថានីយ/ដេប៉ូប្រេងឥន្ធនៈ ដើម្បីបង្ក្រាបការធ្វើធុរកិច្ចមិនស្មោះត្រង់៕