ភ្នំពេញៈ អង្គភាពអ្នកនាំពាក្យរាជរដ្ឋាភិបាលកម្ពុជា និងអ្នកសារព័ត៌មានបានពិភាក្សាពីការប្រឈមរវាងកិច្ចការនៃការទទួលបានព័ត៌មានពីរដ្ឋាភិបាល តាមរយៈអ្នកនាំពាក្យ ក្រសួង និងស្ថាប័ន ដើម្បីផ្តល់ព័ត៌មានទៅកាន់សាធារណជន ក្នុងអំឡុងពេលនៃវិបត្តិជំងឺកូវីដ ១៩។
លោក ផៃ ស៊ីផាន ប្រធានអង្គភាពអ្នកនាំពាក្យរាជរដ្ឋាភិបាលកម្ពុជា ថ្លែងក្នុងជំនួបផ្លាស់ប្ដូរមតិយោបល់រវាងអង្គភាពអ្នកនាំពាក្យ រាជរដ្ឋាភិបាល និងអ្នកសារព័ត៌មាន នៅទីស្តីការគណៈរដ្ឋមន្ត្រី នាថ្ងៃទី ៦ មករា ថា ក្នុងជំនួបនេះ លោក ចង់ឱ្យអ្នកសារព័ត៌មានបង្ហាញពីការពិសោធ និងការលំបាក កាលពីកន្លងមក ពាក់ព័ន្ធនឹងលំហូរព័ត៌មាននៅប្រទេសកម្ពុជា។
ទោះជាយ៉ាងណា លោកមានជំនឿថា កន្លងមក អ្នកសារព័ត៌មាន ជួបបញ្ហាប្រឈមច្រើនពាក់ព័ន្ធនឹងការមិនទទួលបាននូវលទ្ធភាព ក្នុងកិច្ចរក្សាលំហូរព័ត៌មានដោយសេរី ដើម្បីជាប្រយោជន៍ដល់មហាជន។ ជាគោលការណ៍ រាជរដ្ឋាភិបាលចង់ឱ្យវិស័យសារព័ត៌មាន និងអ្នកសារព័ត៌មានធ្វើការក្នុងទិសដៅកសាងជាតិនិងបង្ហាញពីភាពអសកម្មមួយចំនួន ដើម្បីធ្វើយ៉ាងណាឱ្យការកសាងជាតិទទួលបានជោគជ័យសម្រាប់ប្រជាពលរដ្ឋទាំងអស់គ្នា។
លោកថា ដោយមើលឃើញពីសារៈសំខាន់យ៉ាងដូច្នេះហើយ បានជារាជរដ្ឋាភិបាលបង្កើតអ្នកនាំពាក្យទាំងនៅថ្នាក់ជាតិ និងថ្នាក់ក្រោមជាតិ ដើម្បីផ្តល់ព័ត៌មាន ក្នុងកិច្ចថែរក្សាលំហូរព័ត៌មានឱ្យបានសេរី និងគ្រប់ជ្រុងជ្រោយជូនដល់សាធារណជន តាមរយៈអ្នកសារព័ត៌មាន និងអង្គភាពសារព័ត៌មាន។ ជាមួយគ្នានេះ អ្នកសារព័ត៌មានគួរតែឈរលើតម្លាភាព និងសុចរិតភាពក្នុងការបម្រើ និងផ្តល់ព័ត៌មានជូនដល់ប្រជាពលរដ្ឋផងដែរ។
លោក ផៃ ស៊ីផាន ថ្លែងថា៖ «អង្គភាពយើងខ្ញុំចង់ពង្រឹងឱកាសដល់មិត្តអ្នកសារព័ត៌មាន មានលទ្ធភាពសួរនាំ ព្រោះព័ត៌មានទាំងអស់ វាមិនអាចនៅជិតភ្នែក និងត្រចៀករបស់ប្រជាពលរដ្ឋទាំងអស់នោះទេ ល្គឹកណាតាមរយៈអ្នកសារព័ត៌មាន ដែលបានផ្តល់ទៅឱ្យដែលខិតខំប្រឹងប្រែងកន្លងមក»។
លោកទទួលស្គាល់ចំពោះអ្នកនាំពាក្យរបស់ក្រសួង និងស្ថាប័នមួយចំនួនរបស់រាជរដ្ឋាភិបាល មិនទាន់ឆ្លើយតបទៅនឹងសេចក្តីត្រូវការរបស់រាជរដ្ឋាភិបាលនៅឡើយទេ និងជួបការលំបាកពីអ្នកសារព័ត៌មានដែរ។ ទោះជាយ៉ាងណា អង្គភាពអ្នកនាំពាក្យរាជរដ្ឋាភិបាលក៏មិនទាន់ទទួលបានពាក្យប្តឹងតវ៉ាពីអ្នកសារព័ត៌មានចំពោះអ្នកនាំពាក្យក្រសួង ឬ ខេត្តណាដែលមិនទាន់បានបំពេញភារកិច្ចល្អនៅឡើយទេ។
លោកថ្លែងថា៖ «យើងធ្លាប់តែឮថា ពិបាកទទួលបានព័ត៌មានពីអ្នកនាំពាក្យណាស់ រឿងនេះ រឿងនោះ ក៏ប៉ុន្តែពាក្យបណ្តឹង ឬតវ៉ា យើងអត់ទាន់បានដើរតួនៅក្នុងសាច់រឿងហ្នឹងទេ។ សុំរំឭក និងចង់ ស្តាប់នៅថ្ងៃនេះ ព្រោះយន្តការដែលអង្គភាពអ្នកនាំពាក្យរាជរដ្ឋាភិបាលកំពុងធ្វើដើម្បីពង្រឹងវិជ្ជាជីវៈអ្នកនាំពាក្យ ដោយមានភារកិច្ច ២ ការផ្សព្វផ្សាយ ដែលឆ្លើយតបទៅនឹងតម្លាភាព និងមួយទៀត ត្រូវឆ្លើយតបប្រកបដោយគណនេយ្យភាព។ ពីព្រោះទាំង ២ នេះជាសសរស្តម្ភនៃអភិបាលកិច្ចល្អ»។
លោក គួន សំបូរ និពន្ធនាយកសារព័ត៌មាន CCTIME ថ្លែងថា តាមរយៈបទពិសោធ ដែលលោកធ្វើជាអ្នកសារព័ត៌មាន លោកមើលឃើញបច្ចុប្បន្ន ការទទួលបានព័ត៌មាន គឺមានសម្បូរបែប ដោយសារការរីកចម្រើនបច្ចេកវិទ្យា និងការបើកនូវឱកាសពីសំណាក់ក្រសួង ស្ថាប័នរបស់រាជរដ្ឋាភិបាល ដែលបង្កភាពងាយស្រួលដល់អ្នកសារព័ត៌មាន។
ទោះជាយ៉ាងណា លោកថា ការទទួលព័ត៌មានបន្ថែមពីអ្នកនាំពាក្យនៅតាមស្ថាប័នមួយចំនួន អ្នកសារព័ត៌មាននៅតែជួបបញ្ហាប្រឈម។ បើទោះបីមានការបើកទូលាយ បង្កើតជាក្រុមតេឡេក្រាមផ្តល់ព័ត៌មានពិតមែន ប៉ុន្តែអ្នកព័ត៌មានមួយចំនួនអានរួច ឆ្ងល់ចង់សួរលម្អិតតែពិបាកទាក់ទង។
លោកថ្លែងថា៖ «បើទោះជាមានការរៀបចំក្រុមអ្នកនាំពាក្យក៏ដូចជាគ្រុបតេឡេក្រាមក៏ដោយ ប៉ុន្តែបញ្ហាប្រឈមដែលយើងចង់ទាក់ទង ដើម្បីលម្អិតនូវរឿងបន្ថែម នៅតែជាបញ្ហា»។
លោកស្រីថា ចន្ធី អ្នកសារព័ត៌មានវិទ្យុវាយោថ្លែងថា នៅពេលលោកស្រីធ្វើព័ត៌មានពីប្រធានបទ អ្វីមួយនិងមានបំណងសួរទៅក្រសួង ស្ថាប័នពាក់ព័ន្ធណាមួយ គឺក្រសួងស្ថាប័ននោះមិនឆ្លើយតបនោះទេ ដែលធ្វើឱ្យព័ត៌មានរបស់លោកស្រីមានភាពលម្អៀង ដោយ ពេលខ្លះក៏មិនហ៊ានចេញផ្សាយដែរ ដោយសារខ្វះប្រភពម្ខាងទៀត។
លោកស្រីសំណូមពរថា៖ «ជាការសំណូមពរ គឺចង់ឱ្យពួកគាត់ផ្តល់នូវកិច្ចសម្ភាសន៍ដល់ស្ថាប័នរបស់គាត់ និងស្ថាប័នផ្សេងទៀត ឱ្យមានភាពស្មើគ្នា ព្រោះកន្លងមក តេទៅកាន់ស្ថាប័នមួយ គាត់ថាទៅ យកសំឡេងស្ថាប័នមួយទៀតទៅ ពីព្រោះគាត់ទើបផ្តល់ចម្លើយឱ្យគេទេ»។ លោកស្រី ចន្ធីថា ការស្នើនេះ មិនចង់ឱ្យអ្នកស្តាប់ ឬទស្សនាចោទប្រកាន់លើស្ថាប័នព័ត៌មានថា ផ្អៀងទៅខាងនេះឬខាងនោះ។
បើតាមលោក ផៃ ស៊ីផាន ក្រោយ កិច្ចប្រជុំ នឹងយករាល់សំណូមពរពីអ្នកសារព័ត៌មាន ដើម្បីបំពេញបន្ថែមដល់អ្នកនាំពាក្យ និងជួបជុំ អ្នកនាំពាក្យរដ្ឋាភិបាលទាំងអស់ និងអ្នកព័ត៌មាននាពេលខាងមុខ ដើម្បីលើកពីការលំបាក។ លោកមិនចង់ឱ្យបាត់តួអង្គណាមួយពីសង្គមទេ ព្រោះសង្គមនេះជាសង្គម ដែលទាំងអស់គ្នាត្រូវរួមគ្នាកសាង និងអភិវឌ្ឍប្រទេសជាតិ៕