.jpg)
លោកនាយរដ្ឋមន្ត្រី ហ៊ុន សែន ធ្វើដំណើរទៅបំពេញទស្សនកិច្ចនៅប្រទេសមីយ៉ាន់ម៉ា នៅព្រឹកថ្ងៃទី ៧ ខែមករា។ រូបភាព SPM
លោកនាយករដ្ឋមន្ត្រី ហ៊ុន សែន នៅថ្ងៃនេះបានធ្វើដំណើរទស្សនកិច្ចទៅកាន់ប្រទេសមីយ៉ាន់ម៉ា ដើម្បីរឹតចំណងមិត្តភាពទ្វេភាគី ដែលក្នុងដំណើរទស្សនកិច្ចនេះ កម្ពុជាក៏បាននាំយកជំនួយជាម៉ាស់ និងគ្រឿងបរិក្ខារពេទ្យមួយចំនួនផងដែរ។
តាមរយៈហ្វេសប៊ុករបស់លោកនាយករដ្ឋមន្រី្ត ហ៊ុន សែន ដែលបានបង្ហោះនៅថ្ងៃនេះ បានឱ្យដឹងថា ក្នុងដំណើរទស្សនកិច្ចនេះ លោកនឹងមានជំនួបទ្វេភាគីជាមួយនាយឧត្តមសេនីយ៍ជាន់ខ្ពស់ មីន អ៊ុងឡាំង ដើម្បីពិភាក្សា និងផ្លាស់ប្តូរទស្សនៈអំពីកិច្ចសហប្រតិបត្តិការទ្វេភាគី និងពហុភាគី និងការវិវត្តថ្មីៗនៅក្នុងអាស៊ាន។
អមជាមួយនឹងដំណើរទស្សនកិច្ចផ្លូវការលើកនេះ កម្ពុជាបាននាំទៅជាមួយជំនួយជាម៉ាស់ជាង ៣ លាន និងគ្រឿងបរិក្ខារមួយចំនួនទៀត ដើម្បីចូលរួមប្រយុទ្ធប្រឆាំងការរាតត្បាតជំងឺកូវីដ ១៩នៅក្នុងប្រទេសមីយ៉ាន់ម៉ាផងដែរ។
សូមជម្រាបថា ដំណើរទស្សនកិច្ចរបស់លោក នាយករដ្ឋមន្ត្រីនៅក្នុងប្រទេសមីយ៉ាន់ម៉ាមានរយៈពេល ២ ថ្ងៃ គឺថ្ងៃទី ០៧ និងថ្ងៃទី ០៨ ខែមករា ឆ្នាំ ២០២២។ ដំណើរទស្សនកិច្ចនេះធ្វើឡើងតបតាមការអញ្ជើញរបស់នាយឧត្តមសេនីយ៍ជាន់ខ្ពស់ មីន អ៊ុងឡាំង ប្រធានក្រុមប្រឹក្សារដ្ឋបាលរដ្ឋនៃសាធារណរដ្ឋសហភាពមីយ៉ាន់ម៉ា។
ក្នុងដំណើរទស្សនកិច្ចរបស់លោកនាយករដ្ឋមន្ត្រីលើកនេះ ដោយបានអមដំណើរដោយឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិ និងលោក ចម ប្រសិទ្ធ រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ និងមន្ត្រីជាន់ខ្ពស់នៃរាជរដ្ឋាភិបាលកម្ពុជាមួយចំនួនទៀត៕
