.jpg)
មន្ត្រីរបស់គណៈកម្មាធិការសិទ្ធិមនុស្សកម្ពុជា នៅក្នុងកិច្ចប្រជុំមួយកន្លងមក។ រូប គណៈកម្មាធិការសិទ្ធិមនុស្សកម្ពុជា
ភ្នំពេញៈ គណៈកម្មាធិការសិទ្ធិមនុស្សកម្ពុជា នឹងឡើងទៅការពាររបាយការណ៍សិទ្ធិមនុស្សជាតិរបស់រដ្ឋាភិបាលពាក់ព័ន្ធនឹងការអនុវត្តអនុសញ្ញាអន្តរជាតិ ស្តីពីសិទ្ធិពលរដ្ឋ និងសិទ្ធិនយោបាយ នៅអង្គការសហប្រជាជាតិ នាទីក្រុងហ្សឺណែវ ប្រទេសស្វ៊ីស នៅក្នុងខែមីនា ឆ្នាំ ២០២២ ខាងមុខ។
លោក ជិន ម៉ាលីន អ្នកនាំពាក្យ គណៈកម្មាធិការសិទ្ធិមនុស្សកម្ពុជា ប្រាប់ភ្នំពេញប៉ុស្តិ៍នៅថ្ងៃទី ៦ ខែមករាថា ចំពោះការទៅការពាររបាយការណ៍សិទ្ធិមនុស្សជាតិរបស់រដ្ឋាភិបាលពាក់ព័ន្ធនឹងការអនុវត្តអនុសញ្ញាអន្តរជាតិស្តីពីសិទ្ធិពលរដ្ឋ និងសិទ្ធិនយោបាយ គឺជាការអនុវត្តកាតព្វកិច្ចអន្តរជាតិរបស់កម្ពុជា ដែលកម្ពុជា គឺជារដ្ឋសមាជិក កតិសញ្ញាអន្តរជាតិ ស្តីពីសិទ្ធិពលរដ្ឋ និងសិទ្ធិនយោបាយ។
លោកបន្តថា ជានីតិវិធីគណៈកម្មាធិការសិទ្ធិមនុស្សកម្ពុជាបានដាក់របាយការណ៍ជុំទី ៥ ពាក់ព័ន្ធនឹង ការអនុវត្តសិទ្ធិពលរដ្ឋ និងសិទ្ធិនយោបាយទៅអង្គការសហប្រជាជាតិកាលពីឆ្នាំ ២០១៩ ដែលមានកម្រាស់ជិត ៤០ ទំព័រជាភាសាអង់គ្លេស។ ជានីតិវិធីបន្តគណៈកម្មការជំនាញរបស់អង្គការសហប្រជាជាតិបានត្រួតពិនិត្យលើរបាយការណ៍របស់កម្ពុជា និងបានផ្ញើជាសំណួរ ១ ចំនួន ដើម្បីឱ្យកម្ពុជាបញ្ជាក់បំភ្លឺបន្ថែម និងឆ្លើយជាលាយលក្ខណ៍អក្សរ រួចបញ្ជូនទៅគណៈកម្មការជំនាញរបស់អង្គការសហប្រជាជាតិវិញរួចរាល់អស់ហើយ។
បើតាម លោក ជិន ម៉ាលីន ជាកិច្ចការបន្ទាប់ គឺកម្ពុជាត្រូវតែទៅធ្វើការការពារដោយផ្ទាល់មាត់ នៅចំពោះមុខគណៈកម្មាធិការជំនាញនៅក្នុងខែមីនា ឆ្នាំ ២០២២ នៅប្រទេសស្វ៊ីស ដើម្បីជជែក ពិភាក្សាគ្នា និងសួរដេញដោលគ្នាដោយផ្ទាល់ បន្ថែមពីលើរបាយការណ៍ចម្លើយរបស់កម្ពុជាជាលាយលក្ខណ៍អក្សរពាក់ព័ន្ធនឹងសិទ្ធិពលរដ្ឋ និងសិទ្ធិនយោបាយនៅកម្ពុជានេះ។
លោកថ្លែងថា៖ «អ៊ីចឹងទេ គណៈកម្មាធិការសិទ្ធិមនុស្សកម្ពុជា បានរៀបចំប្រតិភូអន្តរក្រសួង ដែលនៅក្នុងនោះ ខ្ញុំជាប្រធានប្រតិភូ ក្នុងនាមអនុប្រធានគណៈកម្មាធិការសិទ្ធិមនុស្សកម្ពុជា ដឹកនាំគណៈប្រតិភូអន្តរក្រសួងមួយចំនួនដែលពាក់ព័ន្ធ ដើម្បីទៅធ្វើការ ការពាររបាយការណ៍នោះដោយផ្ទាល់ និងជជែក ដេញដោល វែកញែក បំភ្លឺគ្នាទៅវិញទៅមក ពាក់ព័ន្ធទៅដល់ការអនុវត្តពាក់ព័ន្ធនឹងសិទ្ធិពលរដ្ឋ និងសិទ្ធិនយោបាយនៅកម្ពុជា»។
លោក អំ សំអាត នាយករងអង្គការលីកាដូ ថ្លែងថា សិទ្ធិមូលដ្ឋានទាំង ៥ របស់មនុស្ស គឺសិទ្ធិពលរដ្ឋ សិទ្ធិនយោបាយ សិទ្ធិសេដ្ឋកិច្ច សិទ្ធិសង្គម និងវប្បធម៌ ដែលនៅតែមានបញ្ហាប្រឈម។ ប៉ុន្តែ សិទ្ធិសេដ្ឋកិច្ច សិទ្ធិសង្គម និងសិទ្ធិវប្បធម៌ ត្រូវបានរាជរដ្ឋាភិបាលបានដោះស្រាយ អនុវត្ត និងកែលម្អ និងលើកកម្ពស់បានច្រើន។
លោកបន្តថា ដោយឡែកចំពោះ សិទ្ធិពលរដ្ឋ និងសិទ្ធិនយោបាយវិញ មានភាពចម្រូងចម្រាសខ្លាំង ដែលមានការបកស្រាយខ្វែងគំនិតច្រើន ក្នុងរយៈពេលកន្លងមកនេះ។ ទាំងក្រុមប្រឹក្សាសិទ្ធិមនុស្ស សហគមន៍អឺរ៉ុប និងបណ្តាប្រទេសប្រកាន់លទ្ធិប្រជាធិបតេយ្យមើលឃើញថា សិទ្ធិចូលរួមជីវភាពនយោបាយ និងសិទ្ធិពលរដ្ឋ មានការធ្លាក់ចុះ និងមានការរឹតត្បិតពីសំណាក់រាជរដ្ឋាភិបាល។
ត្រង់ចំណុចនេះ លោកមានការព្រួយបារម្ភចំពោះគណៈកម្មាធិការសិទ្ធិមនុស្សកម្ពុជា ដែលនឹងទៅការពារនូវរបាយការណ៍របស់ខ្លួន ស្តីពីសិទ្ធិពលរដ្ឋ និងនយោបាយនេះ នៅអង្គការសហប្រជាជាតិ ដោយលោកបានលើកឡើងថា វាហួសក្របខ័ណ្ឌពីរឿងបញ្ហាសិទ្ធិមនុស្ស ប៉ុន្តែទៅជារឿងនយោបាយវិញ។
លោកថ្លែងថា៖ «អ៊ីចឹង ទាក់ទងសិទ្ធិពលរដ្ឋ និងសិទ្ធិនយោបាយមានអនុសាសន៍ឱ្យតំណាងរាជរដ្ឋាភិបាល ដែលមានគណៈកម្មាធិការសិទ្ធិមនុស្សកម្ពុជាបានបកស្រាយថា វាហួសក្របខ័ណ្ឌពីរឿងបញ្ហាសិទ្ធិមនុស្ស វាទៅជារឿងនយោបាយ។ អ៊ីចឹងទេខ្ញុំនៅតែបារម្ភចំពោះចំណុចទាំងនេះ ព្រោះគេមើលឃើញបញ្ហានៅក្នុងប្រទេសកម្ពុជាគឺសិទ្ធិពលរដ្ឋ និងសិទ្ធិនយោបាយនេះ កំពុងតែស្ថិតនៅក្នុងភាពប្រឈម និងមានការធ្លាក់ចុះ»៕
វីដេអូ៖
