.jpg)
ក្រុមការងារអាជ្ញាធរអប្សរាចុះពិនិត្យទីតាំងស្នើសុំសាងសង់។ រូប អាជ្ញាធរអប្សរា
ភ្នំពេញៈ ក្នុងរយៈពេល ១ ឆ្នាំ ក្នុងឆ្នាំ ២០២១ ក្រុមការងារសហគមន៍នៃអាជ្ញាធរជាតិអប្សរា បានទទួលសំណើសុំជួសជុលផ្ទះ រួមទាំងសាងសង់តូចៗ ក្នុង ៥ ស្រុក/ក្រុង ក្នុងតំបន់ឧទ្យានអង្គរ រួមទាំងក្រៅតំបន់ឧទ្យានអង្គរ ចំនួន ២ ២១៨ សំណើដែលក្នុងនោះបានអនុញ្ញាតជូនប្រជាពលរដ្ឋចំនួន ១ ៣១៣ សំណើ។
តាមរបាយការណ៍របស់អាជ្ញាធរជាតិអប្សរាចេញផ្សាយនៅថ្ងៃទី ៦ ខែមករា ឆ្នាំ ២០២២ ឱ្យដឹងថា អាជ្ញាធរជាតិអប្សរា បានអនុញ្ញាតជូនប្រជាពលរដ្ឋរួមមាននៅស្រុកប្រាសាទបាគងចំនួន ២០១ សំណើ ស្រុកអង្គរធំចំនួន ២៨៣ សំណើស្រុកពួកចំនួន ២២០ សំណើ ក្រុងសៀមរាបចំនួន ៣១៥ សំណើ ស្រុកបន្ទាយស្រីចំនួន ២៦៣ សំណើ និងក្រៅឧទ្យានអង្គរចំនួន ៣២ សំណើ សរុបចំនួន ១ ៣១៣ សំណើ។
ក្នុងឆ្នាំ ២០២១ បញ្ហាប្រឈមពាក់ព័ន្ធនឹងសំណើសុំជួសជុល និងសាងសង់ផ្ទះតូចតាចនៅច្រើន (ក្នុងឧទ្យានអង្គរក្រុមការងារគោលដៅមួយចំនួនបានផ្អាកចុះពិនិត្យ និងដោះស្រាយក្នុងខែខ្លះពី ២ ទៅ ៣ សប្តាហ៍ ដោយសារការរីករាលដាលខ្លាំងនៃជំងឺកូវីដ ១៩ ក្នុងសហគមន៍។ ការជួសជុល ឬសាងសង់មុនការចុះពិនិត្យរបស់ក្រុមការងារនៅតែមាន។
ការប្រកាសលក់ដីនៅក្នុងតំបន់ការពារតាមរយៈបណ្តាញសង្គមហ្វេសប៊ុក និងការដាក់ស្លាក (ដីលក់) ផ្ទាល់ក្នុងតំបន់ការពារនៅតែមាន។
របាយការណ៍នេះសរសេរថា៖ «គោលដៅបន្ត ក្រុមការងារសហគមន៍នៃអាជ្ញាធរជាតិអប្សរានឹងបន្តផ្សព្វផ្សាយ អប់រំប្រជាពលរដ្ឋឱ្យយល់កាន់តែច្បាស់ពីតួនាទី ភារកិច្ចរបស់អាជ្ញាធរជាតិអប្សរា ការប្រើប្រាស់ដីធ្លីក្នុងតំបន់ការពារនៃរមណីយដ្ឋានអង្គរ និងនីតិវិធីនៃការដាក់ពាក្យស្នើសុំជួសជុល និងសាងសង់ផ្ទះក្នុងឧទ្យានអង្គរ។ បន្តចុះពិនិត្យ និងដោះស្រាយសំណើសុំជួសជុល និងសាងសង់តូចតាចរបស់ប្រជាពលរដ្ឋឱ្យកាន់តែមានប្រសិទ្ធភាពទាន់ពេលវេលា»។
លោក ឡុង កុសលអ្នកនាំពាក្យអាជ្ញាធរជាតិអប្សរា ប្រាប់ភ្នំពេញប៉ុស្តិ៍នៅថ្ងៃទី ៦ ខែមករាថា រាល់ការជួសជុល និងសាងសង់ផ្ទះនៅក្នុងក្នុងតំបន់ឧទ្យានអង្គរចាំបាច់ប្រជាពលរដ្ឋ ត្រូវតែស្នើសុំពីអាជ្ញាធរជាតិអប្សរា ព្រោះចំណុចសំខាន់គឺត្រូវរក្សាអត្តសញ្ញាណបែបបទខ្មែរ និងមួយវិញទៀតក៏មានបេតិកភណ្ឌផ្សេងៗ ដែលត្រូវបានកំណត់ កម្ពស់ និងរចនាប័ទ្ម ជាដើម។
លោកថ្លែងថា៖ «ចំពោះការគ្រប់គ្រង និងការស្នើសុំសាងសង់នៅក្នុងតំបន់ឧទ្យានអង្គរនេះ ត្រូវអនុលោមទៅតាមបទដ្ឋានបេតិកភណ្ឌ ។ អ៊ីចឹង ការគ្រប់គ្រងហ្នឹង វាចាំបាច់ត្រូវតែមានការស្នើសុំ ព្រោះបើសិនជាពួកគាត់ស្នើសុំកែសម្រួលផ្ទះរបស់គាត់ទៅជាផ្ទះសម័យទំនើប វានឹងបាត់បង់អត្តសញ្ញាណតំបន់នេះអស់ហើយ»។
បើតាមលោក ឡុង កុសល ដើម្បីរក្សាបាននូវអត្តសញ្ញាណ អាជ្ញាធរជាតិអប្សរាមានតួនាទីធ្វើយ៉ាងណាឱ្យប្រជាពលរដ្ឋជួសជុល និងសាងសង់ឱ្យស្របទៅតាមគោលការណ៍ និងទ្រង់ទ្រាយដើម តាមបែបរចនាប័ទ្មនៃផ្ទះរបស់ខ្មែរ។ ដូច្នេះរាល់ការស្នើសុំច្បាប់ជួសជុល និងការចុះទៅពិនិត្យរបស់អាជ្ញាធរជាតិអប្សរា គឺពុំមានការបង់ប្រាក់ទេហើយក៏ជួយទៅលើប្លង់ស្ថាបត្យកម្មបន្ថែមទៀត៕
វីដេអូ៖
