.jpg)
សមត្ថកិច្ចពិនិត្យកាំភ្លើងដែលពលរដ្ឋប្រទះឃើញពីថ្ងៃទី ៥ មករា។ រូបថត Heng Ratana Page
កំពង់ឆ្នាំងៈ កាំភ្លើងខូចគុណភាពចម្រុះចំនួន ១១ ដើម ត្រូវបានមន្ត្រីមជ្ឈមណ្ឌលកំចាត់មីនកម្ពុជា (CMAC) ប្រចាំខេត្តកំពង់ឆ្នាំង យកទៅរក្សាទុកពីថ្ងៃទី ៥ មករា ១ ថ្ងៃ បន្ទាប់ពីពលរដ្ឋប្រទះឃើញកប់ដី ក្នុងភូមិពាមខ្នង ឃុំផ្លូវទូក ស្រុកកំពង់លែង ខេត្តកំពង់ឆ្នាំង ខណៈ ១១ ខែឆ្នាំមុន CMAC កម្ទេចគ្រាប់គ្រប់ប្រភេទបានចំនួន ១៥ ៤០០ គ្រាប់។
លោក ប៉ាល់ ជឿន អធិការនគរបាលស្រុកកំពង់លែងប្រាប់នៅថ្ងៃទី ៦ មករា ថា កាំភ្លើងខូចគុណភាពទាំង ១១ ដើមនោះមានប្រភេទកាំភ្លើងត្បាល់ ៦០ មិល្លីម៉ែត្រ ១ ដើម កាំភ្លើងប្រភេទ M 79 ចំនួន ៦ ដើម និងកាំភ្លើងប្រភេទ M19 ចំនួន ៤ ដើម។ កាំភ្លើងចាស់ៗទាំងនោះត្រូវបានពលរដ្ឋប្រទះឃើញពេលកំពុងភ្ជួរដីពីថ្ងៃទី ៤ មករា ឆ្នាំ ២០២២ នៅភូមិ ពាមខ្នង ឃុំផ្លូវទូក ស្រុកកំពង់លែង ។
លោកថ្លែងថា៖ «អាវុធទាំង ១១ ដើមនោះយើងបានប្រគល់ឱ្យខាងអង្គភាពកម្ចាត់មីនកម្ពុជា ខេត្តកំពង់ឆ្នាំងរួចហើយកាលពីថ្ងៃទី ៥ មករា។ កាំភ្លើងទាំងនោះប្រើការលែងកើតទាំងអស់»។
លោក អ៊ុំ សំអុន នាយនគរបាលប៉ុស្តិ៍ឃុំផ្លូវទឹក ឱ្យដឹងនៅថ្ងៃទី ៦ មករា ថា កាលពីថ្ងៃទី ៤ មករា មានបុរសអ្នកភូមិម្នាក់បានប្រទះឃើញកាំភ្លើងកប់ក្នុងដី។ លុះថ្ងៃទី ៥ មករា នគរបាលស្រុក កំពង់លែង និងនគរបាលប៉ុស្តិ៍ឃុំផ្លូវទឹកបានរាយការណ៍ជូនមន្ត្រី CMAC ខេត្តកំពង់ឆ្នាំងចុះមកយកទៅរក្សាទុក។
លោកបានបន្តថា បើតាមការពិនិត្យពីសមត្ថកិច្ចឃើញថា អាវុធទាំងនោះមានការវេចខ្ចប់ក្រណាត់កៅស៊ូត្រឹមត្រូវហើយកប់ក្នុងដី ប៉ុន្តែក្រណាត់កៅស៊ូដែលរុំនោះបានពុកផុយអស់ហើយ។ រីឯតួកាំភ្លើងវិញ គឺក៏មានសភាពច្រែះស៊ីអស់ដែរ។ បើតាមការសន្និដ្ឋានរបស់សមត្ថកិច្ចជំនាញថា អាវុធទាំងនោះទំនងត្រូវបានគេកប់យូរឆ្នាំមកហើយ ហើយអាចនៅអំឡុងជំនាន់សង្គ្រាមទ័ពព្រៃប៉ារ៉ា និងទ័ពខ្មែរក្រហម។
លោកថា៖ «នៅតំបន់ស្រុកកំពង់លែងពីមុនគឺជាតំបន់ខ្មែរក្រហមឈរជើងនៅហ្នឹង។ ពីសម័យឆ្នាំ ១៩៩០ ប្លាយអីហ្នឹងគឺសុទ្ធតែខ្មែរក្រហមទេ ព្រោះនៅទីនោះជាតំបន់ព្រៃរនាម។ តែតំបន់នោះយើងបានសុខសប្បាយគឺនៅជំនាន់ខ្មែរក្រហមធ្វើសមាហរណកម្មក្នុងឆ្នាំ ១៩៩៤»។
លោក សំអុន បញ្ជាក់ថា នៅក្នុងភូមិសាស្ត្រស្រុក កំពង់លែង មាន ៩ ឃុំ ក្នុងនោះឃុំចំនួន ៦ គឺនៅតាមដងទន្លេហើយឃុំដែលនៅជាប់តាមដងទន្លេនោះប្រឈមការលំបាកខ្លាំង ព្រោះតំបន់ទាំងនោះសម្បូរដោយទ័ពព្រៃខ្មែរក្រហមនៅតាមព្រៃរនាម។
ពាក់ព័ន្ធនឹងសំណល់យុទ្ធភណ្ឌសង្គ្រាមនេះដែរ បើតាមរបាយការណ៍របស់ CMAC បង្ហាញថា រយៈពេល ១១ ខែក្នុងឆ្នាំ ២០២១ ក្នុងកិច្ចប្រតិបត្តិការបោសសម្អាតមីន និងសំណល់យុទ្ធភណ្ឌសង្គ្រាមគឺ CMAC រំដោះផ្ទៃដីចម្ការមីន និងចម្ការគ្រាប់សរុបបានទំហំ ៩១ ៩១៩ ៩៧២ ម៉ែត្រការ៉េ។ ក្រុមការងាររបស់ CMAC បានកម្ទេចចោលគ្រាប់មីន និងយុទ្ធភណ្ឌមិនទាន់ផ្ទុះ ដែលពលរដ្ឋបានរាយការណ៍បានចំនួន ១៥ ៤០០ គ្រាប់ និងអាវុធធុនស្រាលមួយចំនួនទៀត៕
