.jpg)
គណៈកម្មាធិការជាតិរៀបចំការបោះឆ្នោត គ.ជ.ប បកស្រាយបំភ្លឺអំពីកំណត់ហេតុនៃការរាប់សន្លឹកឆ្នោត ដោយធានាអះអាងពីភាពអព្យាក្រឹត បន្ទាប់ពីភាគីពាក់ព័ន្ធនឹងការបោះឆ្នោត សម្តែងការព្រួយបារម្ភអំពីភាពមិនប្រក្រតី និងមិនយុត្តិធម៌។
សេចក្តីបំភ្លឺរបស់ គ.ជ.ប ចុះថ្ងៃទី ៦ ខែ មករានេះបានឱ្យដឹងថា កន្លងមកថ្មីៗនេះ មានការបារម្ភរបស់ភាគីពាក់ព័ន្ធនឹងការបោះឆ្នោត អំពីការមិនអាចធានាបាននូវការបោះឆ្នោតមួយដែលប្រព្រឹត្តទៅដោយសេរី ត្រឹមត្រូវ និងយុត្តិធម៌ ស្របតាមគោលការណ៍នៃលទ្ធិប្រជាធិបតេយ្យ សេរី ពហុបក្ស ប្រសិនបើភ្នាក់ងារគណបក្សនយោបាយ ដែលបានចូលរួមតាមដានសង្កេតមើលដំណើរការបោះឆ្នោត និងរាប់សន្លឹកឆ្នោត មិនអាចទទួលបានកំណត់ហេតុនៃការរាប់សន្លឹកឆ្នោត (ទ.១១០២) នៅការិយាល័យបោះឆ្នោត ហើយការវេចខ្ចប់កញ្ចប់សុវត្ថិភាព "ក" ធ្វើឡើងដោយមិនត្រឹមត្រូវ។
ក្នុងក្រុមអ្នកនាំពាក្យ គ.ជ.ប បានបំភ្លឺថា យោងមាត្រា ១៣២ នៃច្បាប់ស្តីពីការបោះឆ្នោតជ្រើសរើសក្រុមប្រឹក្សាឃុំ សង្កាត់ កំណត់ហេតុនៃការរាប់សន្លឹកឆ្នោត ដូចចែងក្នុងមាត្រា ១៣១ នៃច្បាប់នេះគឺត្រូវធ្វើជា ០៣ ច្បាប់។
ក្នុងនោះ មួយច្បាប់ផ្ញើជូនគណៈកម្មការឃុំ សង្កាត់រៀបចំការបោះឆ្នោត (គឃ.សប) ដោយភ្ជាប់មកជាមួយនូវបញ្ជីឈ្មោះអ្នកបោះឆ្នោត គល់បញ្ជីសន្លឹកឆ្នោតដែលបានប្រើ សន្លឹកឆ្នោតមិនបានប្រើ សន្លឹកឆ្នោតបានការ សន្លឹកឆ្នោតពុំបានការសន្លឹកឆ្នោតខូច ត្រាសម្ងាត់សម្រាប់ការិយាល័យបោះឆ្នោត ពាក្យបណ្តឹងជំទាស់ ឬតវ៉ា ប្រសិនបើមាន (ក្នុងការអនុវត្តបច្ចេកទេស ឯកសារទាំងនេះត្រូវដាក់ក្នុងកញ្ចប់សុវត្ថិភាព "ក") ហិបឆ្នោត និងឯកសារ សម្ភារឧបករណ៍ចាំបាច់ផ្សេងទៀត ដែលកំណត់ដោយគណៈកម្មាធិការជាតិរៀបចំការបោះឆ្នោត (ក្នុងការអនុវត្តបច្ចេកទេសរបស់ទាំងនេះត្រូវវេចខ្ចប់ដោយឡែក)។
មួយច្បាប់បិទផ្សាយជាសាធារណៈនៅការិយាល័យរាប់សន្លឹកឆ្នោត រហូតដល់ថ្ងៃប្រកាសលទ្ធផលផ្លូវការនៃការបោះឆ្នោត និងមួយច្បាប់ទៀតបិទផ្សាយជាសាធារណៈនៅទីស្នាក់ការ គឃ.សប រហូតដល់ថ្ងៃ ប្រកាសលទ្ធផលផ្លូវការនៃការបោះឆ្នោត។
សេចក្តីបំភ្លឺបន្តថា តាមបញ្ញត្តិដូចបានបញ្ជាក់ជូនខាងលើ និងក្នុងគោលបំណងដើម្បីពង្រឹងលក្ខខណ្ឌ បច្ចេកទេសក្នុងការអនុវត្តមាត្រា ១៣២ នៃច្បាប់ស្តីពីការបោះឆ្នោតជ្រើសរើសក្រុមប្រឹក្សាឃុំ សង្កាត់ គ.ជ.ប បានបង្កើតប្រភពផ្សព្វផ្សាយចំនួនបី ដែលភ្នាក់ងារគណបក្សនយោបាយអាចទទួលបាន កំណត់ ហេតុនៃការរាប់សន្លឹកឆ្នោត (ទ.១១០២) នៅថ្ងៃបោះឆ្នោត ៖
ទី ១. កំណត់ហេតុនៃការរាប់សន្លឹកឆ្នោត (ទ.១១០២) មានបិទផ្សាយនៅមុខការិយាល័យរាប់សន្លឹកឆ្នោត ហើយភ្នាក់ងារគណបក្សអាចកត់ត្រា ឬ/ និងថតទុកក្នុងទូរស័ព្ទ ស្មាតហ្វូនរបស់ខ្លួន ។
ទី ២. នៅពេលបញ្ជូនកំណត់ហេតុនៃការរាប់សន្លឹកឆ្នោត (ទ.១១០២) ទៅដល់ គឃ.សប ឯកសារនេះនឹងត្រូវចុះហត្ថលេខា ចុះកាលបរិច្ឆេទ និងបោះត្រាបញ្ជាក់ការទទួលដោយប្រធាន គឃ.សប បន្ទាប់មកកំណត់ហេតុនៃការរាប់សន្លឹកឆ្នោត (ទ.១១០២) នេះនឹងត្រូវបានស្កេនបញ្ចូលទៅក្នុងប្រព័ន្ធគ្រប់គ្រងលទ្ធផលនៃការបោះឆ្នោត រួចបោះពុម្ពចេញដើម្បីចែកជូនភ្នាក់ងារគណបក្សនយោបាយ ដែលមានវត្តមាន។
ទី ៣. នៅពេលដែលឯកសារទាំងអស់ត្រូវបានស្កេនបញ្ចូលទៅក្នុងប្រព័ន្ធគ្រប់គ្រង លទ្ធផលនៃការបោះឆ្នោតហើយភាគីពាក់ព័ន្ធ រួមនឹងប្រជាពលរដ្ឋអាចរកមើល ឃើញរូបថតទម្រង់បែបបទ ដែលជាឯកសារមូលដ្ឋាន សម្រាប់ការត្រួតពិនិត្យ ផ្ទៀងផ្ទាត់ និងបូកសរុបលទ្ធផលនៃការបោះឆ្នោត ក្នុងឃុំ សង្កាត់ទាំងអស់ទូទាំងប្រទេសនៅក្នុងគេហទំព័រ គ.ជ.ប។
គ.ជ.ប បានគូសបញ្ជាក់ថា ចំពោះការវេចខ្ចប់ការប្រគល់ និងការទទួលកញ្ចប់សុវត្ថិភាព “ក” ពុំមានអ្វីប្រែប្រួលខុសពីការបោះឆ្នោតមុនៗទេ៕
