.jpg)
ពិធីចុះហត្ថលេខារវាងតំណាងក្រសួងធនធានទឹក និងតំណាងអង្គការ JICA នៅថ្ងៃទី ៥ មករា។ រូបថត MWRM
ភ្នំពេញៈ ក្រសួងធនធានទឹក និងឧតុនិយម និងទីភ្នាក់សហប្រតិបត្តិការអន្តរជាតិជប៉ុន (JICA) បានចុះហត្ថលេខាលើគម្រោងរៀបចំស្តង់ដាជាតិប្រព័ន្ធធារាសាស្ត្រនៅកម្ពុជាសម្រាប់ រយៈពេល ៤ ឆ្នាំ ដើម្បីធ្វើឱ្យប្រសើរឡើងនូវប្រព័ន្ធធារាសាស្ត្រដែលជាផ្នែកមួយជួយដល់វិស័យកសិកម្ម។
ពិធីដែលធ្វើឡើងនៅថ្ងៃទី ៥ មករា ត្រូវបានចុះហត្ថលេខាដោយ លោក ប៊ុន ហ៊ាន រដ្ឋលេខាធិការក្រសួងធនធានទឹក និងលោកស្រី កាមេហារុកូ ប្រធានតំណាងការិយាល័យ JICA ប្រចាំប្រទេសកម្ពុជា ដើម្បីដំណើរការជាផ្លូវការនូវគម្រោងសហប្រតិបត្តិការបច្ចេកទេសលើការរៀបចំស្តង់ដាជាតិប្រព័ន្ធធារាសាស្ត្រ។
ក្រសួងធនធានទឹកបានឱ្យដឹងថា គម្រោងនេះ មានរយៈពេល ៤ ឆ្នាំដោយគ្រោងនឹងចាប់ផ្តើមដំណើរការនៅក្នុងត្រីមាសទី ២ ឆ្នាំ ២០២២ ហើយនឹងបញ្ចប់នៅឆ្នាំ ២០២៥។
យោងតាមសេចក្តីថ្លែងការណ៍រួមបានឱ្យដឹងថា ផែនការយុទ្ធសាស្ត្រអភិវឌ្ឍន៍លើវិស័យធនធានទឹក និងឧតុនិយមឆ្នាំ ២០១៩-២០២៣ បានកំណត់អាទិភាពលើការបង្កើនសមត្ថភាពនៃប្រព័ន្ធធារាសាស្ត្រដែលមានស្រាប់ និងពង្រីកផ្ទៃដីស្រោចស្រពរហូតដល់ ១ ៩៥២ ពាន់ហិកតានៅឆ្នាំ ២០២៣។
ទោះជាយ៉ាងណាក្តី ស្តង់ដាជាតិសម្រាប់ប្រព័ន្ធធារាសាស្ត្រ នៅមិនទាន់បានរៀបចំនៅឡើយ ហើយសមត្ថភាពរបស់មន្ត្រីក្រសួង និងមន្ទីរធនធានទឹក និងឧតុនិយមក៏ទាមទារឱ្យមានការអភិវឌ្ឍដើម្បីអនុវត្តប្រកបដោយប្រសិទ្ធភាពនូវផែនការសកម្មភាពដោយរក្សាបាននូវគុណភាព និងសមស្របតាមទំហំថវិកាវិនិយោគ។
សេចក្តីថ្លែងការណ៍បន្តថា៖ «ក្នុងបរិបទនេះ គម្រោងនឹងរៀបចំស្តង់ដាសម្រាប់សំណង់ធំៗចំនួន ២ ប្រភេទគឺសំណង់ក្បាលហុងទឹក និងប្រព័ន្ធប្រឡាយ ក៏ដូចជាសំណង់នានា ដោយយោងតាមលក្ខណវិនិច្ឆ័យរបស់ប្រទេសជប៉ុន»។
ប្រធានសម្ព័ន្ធសហគមន៍កសិករកម្ពុជា លោក ថេង សាវឿន បានថ្លែងថា ជាការពិតកាលណាមានការរៀបចំប្រព័ន្ធធារាសាស្ត្រ នឹងអាចធ្វើឱ្យប្រសើរឡើងនូវកន្លែងស្តុកទឹក និងការផ្គត់ផ្គង់ទឹក។
ប៉ុន្តែលោកថា ក្នុងករណីនេះ ក៏អាចនឹងមិនមានភាពប្រសើរឡើងផងដែរ ប្រសិនបើគម្រោងនោះ អនុវត្តដោយខ្វះតម្លាភាព និងមិនមានការចូលរួមពីប្រជាពលរដ្ឋ ដែលជួបបញ្ហាប្រឈមនាពេលបច្ចុប្បន្ន។
លោកបញ្ជាក់ថា៖ «សម្រាប់ ខ្ញុំ ដំណើរការនៃការរៀបចំការអភិវឌ្ឍប្រព័ន្ធធារាសាស្ត្រនៅកម្ពុជា គួរតែត្រូវបានធ្វើឡើងដោយបើកចំហ ហើយគម្រោងនីមួយៗ ត្រូវតែមានការជជែកជាមួយពលរដ្ឋឱ្យបានទូលំទូលាយ ចៀសវាងការស្តារប្រព័ន្ធធារាសាស្ត្រ ឬអភិវឌ្ឍទៅមិនឆ្លើយតបទៅនឹងតម្រូវការជាក់ស្តែងរបស់ពលរដ្ឋដែលអាចបង្កទៅជាផលប៉ះពាល់ទៅវិញ»។
លោកមើលឃើញថា បញ្ហាប្រឈមនៃប្រព័ន្ធធារាសាស្ត្រនាពេលបច្ចុប្បន្ន គឺដោយសារផ្លូវទឹក និងកង្វះទឹក ដោយលោកស្នើក្រសួងគួរតែប្រើសក្តានុពលបែបធនធានជាយុទ្ធសាស្ត្រ និងពិនិត្យមើលតំបន់ដែលមានសក្តានុពល។
ក្រសួងធនធានទឹកបានឱ្យដឹងថា ទន្ទឹមនឹងសមិទ្ធផលដែលសម្រេចបានគួរឱ្យកត់សម្គាល់នាឆ្នាំកន្លងមក ដែលបានគាំទ្រដល់ការបង្កើនផលិតភាពកសិកម្មតាមរយៈការជួសជុល និងការសាងសង់ប្រព័ន្ធធារាសាស្ត្រក៏ដោយ ក៏ស្ថិរភាពក្នុងការផ្គត់ផ្គង់ទឹកគឺគ្រប់គ្រាន់។ លើសពីនេះ តម្រូវការដើម្បីធានាបាននូវស្ថិរភាព និងទឹកគ្រប់គ្រាន់សម្រាប់ការស្រោចស្រព មានការកើនឡើងខ្លាំងនៅពេលដែលវិស័យកសិកម្មគឺជាមូលដ្ឋានគ្រឹះនៃជីវភាពរស់នៅនៅបណ្តាប្រទេសជាច្រើនក្នុងអំឡុងពេលនៃការឆ្លងរីករាលដាលនៃជំងឺកូវីដ ១៩។ ក្រសួងបានគូសបញ្ជាក់ថា ការធ្វើទំនើបកម្មកសិកម្ម ចាំបាច់ត្រូវលើកកម្ពស់ ដែលក្នុងនោះប្រព័ន្ធធារាសាស្ត្រក៏នៅតែដើរតួយ៉ាងសំខាន់ក្នុងការធានាស្ថិរភាព និងប្រសិទ្ធភាពទឹកសម្រាប់ការស្រោចស្រព៕
