.jpg)
មជ្ឈមណ្ឌលកែសម្ជស្សផ្ការំដួល។ រូបថត សហការី
ភ្នំពេញៈ បុគ្គលិកប្រុស-ស្រីចំនួន ៦ នាក់ នៃមជ្ឈមណ្ឌលកែសម្ផស្សផ្ការំដួល ត្រូវបានកម្លាំងគណៈកម្មាធិការប្រយុទ្ធប្រឆាំងផលិតផលក្លែងក្លាយ (គ.ប.ផ.ក) ឃាត់ខ្លួន កាលពីយប់ថ្ងៃទី ៥ ខែមករា ឆ្នាំ ២០២២ តាមបណ្ដឹងរបស់ជនរងគ្រោះមួយចំនួនដែលបានទទួលសេវាកែសម្ផស្សពីមជ្ឈមណ្ឌលនេះ។
មជ្ឈមណ្ឌលនេះមានទីតាំងនៅក្នុងតំបន់បឹងកក់ ផ្លូវលេខ R8 សង្កាត់ស្រះចក ខណ្ឌដូនពេញ។
លោក តាន់ សុខវិជ្ជា ប្រធានលេខាធិការដ្ឋាន គ.ប.ផ.ក បានប្រាប់ភ្នំពេញប៉ុស្តិ៍ នៅថ្ងៃទី ៦ មករាថា ក្នុងចំណោមជនសង្ស័យ ៦នាក់ ដែលត្រូវបានឃាត់ខ្លួននោះ មាន ៤ នាក់ជាជនជាតិចិន និង ២នាក់ទៀតជាជនជាតិខ្មែរ។ ទោះយ៉ាងណា លោក សុខវិជ្ជា មិនបានលម្អិតអំពីអត្តសញ្ញាណរបស់ជនសង្ស័យទាំងនោះទេ ហើយក៏មិនបានបញ្ជាក់អំពីខ្លឹមសារនៃបណ្ដឹងរបស់ជនរងគ្រោះដែលបានទៅទទួលយកសេវាកែសម្ផស្សពីមជ្ឈមណ្ឌលនោះផងដែរ។
លោកបញ្ជាក់ថា៖ «បច្ចុប្បន្នពួកគេ [ជនសង្ស័យ] កំពុងស្ថិតក្រោមនីតិវិធីនៃការស៊ើបសួររបស់មន្ត្រីជំនាញនៃ គ.ប.ផ.ក នៅឡើយ»។
បើតាមប្រភពព័ត៌មានពីប្រជាពលរដ្ឋ នៅជុំវិញទីតាំងមជ្ឈមណ្ឌលកែសម្ផស្សផ្ការំដួល ដែលស្នើសុំមិនបញ្ចេញឈ្មោះ បានប្រាប់ភ្នំពេញប៉ុស្តិ៍ថា នៅពេលកម្លាំងសមត្ថកិច្ចចុះទៅត្រួតពិនិត្យ និង ឃាត់ខ្លួនបុគ្គលិកនៃមជ្ឈមណ្ឌលកែសម្ផស្សនេះ មានក្រុមមេធាវីជាច្រើននាក់ ចុះមកធ្វើការធានាមិនឱ្យមានការនាំខ្លួនបុគ្គលិកទាំងនោះទេ តែសមត្ថកិច្ចមិនព្រម ដោយបញ្ជាក់ថា មានបណ្ដឹងចោទប្រកាន់មួយចំនួនពីជនរងគ្រោះដែលតម្រូវឱ្យមានការនាំខ្លួនទៅសាកសួរ នៅឯលេខាធិការដ្ឋាន គ.ប.ផ.ក។
ប្រភពដដែលនិយាយទៀតថា លុះដល់វេលាម៉ោង ៧ យប់ ក្រុមមេធាវីការពារឱ្យមជ្ឈមណ្ឌលកែសម្ផស្សផ្ការំដួលក៏បានយល់ព្រមឱ្យសមត្ថកិច្ចនាំខ្លួនមនុស្ស ៦ នាក់ ក្នុងនោះមានម្នាក់ជាគ្រូពេទ្យ ឡើងលើរថយន្តបញ្ជូនទៅកាន់ក្រសួងមហាផ្ទៃ ចំណែកបុគ្គលិក ១០ នាក់ទៀត ស្នើសុំការអនុញ្ញាតពីសមត្ថកិច្ចឱ្យស្នាក់នៅក្នុងមជ្ឈមណ្ឌលកែសម្ផស្សផ្ការំដួលនោះ ជាបណ្ដោះអាសន្ន ដើម្បីរង់ចាំការអនុវត្តនីតិវិធីបន្ត។
នៅថ្ងៃទី ៦ ខែមករា ឆ្នាំ ២០២២ ភ្នំពេញ ប៉ុស្តិ៍ បានទាក់ទងទៅកាន់មជ្ឈមណ្ឌលកែសម្ផស្សផ្ការំដួល ប៉ុន្តែបុគ្គលិកម្នាក់ដែលទទួលទូរស័ព្ទបានបដិសេធធ្វើអធិប្បាយ។
ចំណែក លោក សុខ សុមនោ អនុប្រធានលេខាធិការដ្ឋាន គ.ប.ផ.ក និងជាប្រធានដឹកនាំប្រតិបត្តិការលើករណីនេះ បានប្រាប់ភ្នំពេញប៉ុស្តិ៍ថា នៅពេលនេះ សមត្ថកិច្ចជំនាញកំពុងបន្តនីតិវិធីនៃការស៊ើបសួរ ទៅលើបុគ្គលិកនៃមជ្ឈមណ្ឌលកែសម្ផស្សផ្ការំដួលទាំង ៦ នាក់ ដោយមិនធ្វើអត្ថាធិប្បាយអ្វីឡើយ៕
វីដេអូ៖
