លោកនាយករដ្ឋមន្ត្រី ហ៊ុន សែន នៅព្រឹកនេះ បានធ្វើដំណើរដល់ទីក្រុងណៃពិដោ នៃប្រទេសមីយ៉ាន់ម៉ា ប្រកបដោយសុវត្ថិភាព ព្រមទាំងបានប្រគល់ម៉ាស់ចំនួន ៣ លានម៉ាស់ និងសម្ភារបរិក្ខារពេទ្យមួយចំនួនផងដែរ។
ទន្ទឹមនឹងការទៅដល់នេះ នៅវេលាម៉ោង ១០:១០ នាទីព្រឹកថ្ងៃទី ៧ ខែមករា ឆ្នាំ ២០២២ នេះ លោក ហ៊ុន សែន ក៏បានប្រគល់អំណោយមនុស្សធម៌របស់រាជរដ្ឋាភិបាល និងប្រជាជនកម្ពុជា ជូនសាធារណរដ្ឋសហភាពមីយ៉ាន់ម៉ា ដើម្បីរួមចំណែកជួយដល់ប្រជាជនមីយ៉ាន់ម៉ាក្នុងការទប់ស្កាត់ការរីករាលដាលជំងឺកូវីដ ១៩។
អំណោយជាបរិក្ខារពេទ្យទាំងនោះរួមមាន ម៉ាស់ចំនួន ៣ លាន ម៉ាស់ N95 ចំនួន ២ សែនវ៉ែនតាការពារចំនួន ១សែន សម្លៀកបំពាក់សុវត្ថិភាព PPE ចំនួន ៣ ម៉ឺន របាំងការពារមុខ ចំនួន ៣ ម៉ឺន ស្បែកជើងវែង ចំនួន ៣ពាន់គូ ម៉ាស៊ីនជំនួយដល់ការដកដង្ហើម ចំនួន ៥០ គ្រឿង ម៉ាស៊ីនតាមដានសញ្ញាជីវិត ចំនួន ៥០ គ្រឿង និងម៉ាស៊ីនផលិតអ៊ុកស៊ីហ្ស៊ែនស្វ័យប្រវត្តិ ចំនួន ៥០ គ្រឿងផងដែរ។
សូមជម្រាបផងដដែរ ក្នុងដំណើរទស្សនកិច្ចដ៏មានសារៈសំខាន់នេះ លោកនាយករដ្ឋមន្ត្រី ហ៊ុន សែន នឹងមានជំនួបទ្វេភាគីជាមួយនាយឧត្តមសេនីយ៍ជាន់ខ្ពស់ មីន អ៊ុងឡាំង ដើម្បីពិភាក្សា និងផ្លាស់ប្តូរទស្សនៈអំពីកិច្ចសហប្រតិបត្តិការទ្វេភាគី និងពហុភាគី និងការវិវត្តថ្មីៗនៅក្នុងអាស៊ាន ខណៈកម្ពុជាធ្វើជាប្រធានអាស៊ានសម្រាប់ឆ្នាំ ២០២២។
នេះជាលើកទី ៣ ហើយ ដែលរដ្ឋាភិបាលកម្ពុជាបានផ្ដល់ជំនួយដល់ប្រទេសមីយ៉ាន់ម៉ាក្នុងការប្រយុទ្ធប្រឆាំងនឹងជំងឺកូវីដ ១៩៕