ភ្នំពេញៈ មន្ទីរពេទ្យមិត្តភាពខ្មែរ-សូវៀត និងក្រុមគ្រូពេទ្យមកពីសហរដ្ឋអាមេរិកបានសហការការគ្នា ដើម្បីធ្វើការពិនិត្យ ពិគ្រោះ និងព្យាបាលជំងឺវះកាត់ជំងឺមួយចំនួនជូនពលរដ្ឋចាប់ពីថ្ងៃទី ១៦ ដល់ថ្ងៃទី ២៣ ខែមករា ឆ្នាំ ២០២២ ខាងមុខនេះ។
សេចក្តីជូនដំណឹងរបស់មន្ទីរពេទ្យមិត្តភាពខ្មែរ-សូវៀតដល់មន្ត្រីរាជការ មន្ទីរពេទ្យ និងប្រជាពលរដ្ឋថា មន្ទីរពេទ្យមិត្តភាពខ្មែរ-សូវៀត រួមសហប្រតិបត្តិការជាមួយក្រុមគ្រូពេទ្យមកពីសហរដ្ឋ អាមេរិក(Surgeons for Cambodia) ធ្វើការពិនិត្យ-ពិគ្រោះ និងព្យាបាលជំងឺវះកាត់ពោះវៀន ឬសដូងបាត បូសអន្ទង់ វះកាត់ដុំពក ក មុខ មាត់ សម្ភព និងរោគស្ត្រី ចាប់ពីថ្ងៃទី ១៦ ដល់ថ្ងៃទី ២៣ ខែមករា ឆ្នាំ ២០២២ នេះ។
សេចក្តីជូនដំណឹងបានបញ្ជាក់ថា នៅបន្ទប់ពិគ្រោះជំងឺក្រៅគឺមានទទួលពីពេលព្រឹក ចាប់ពីម៉ោង ០៨:០០ ដល់ម៉ោង ១១:៣០ និងពេលល្ងាច ចាប់ពីម៉ោង ១៤:០០ ដល់ម៉ោង ១៧:០០។ អ្នកដែលចង់ដឹងព័ត៌មានបន្ថែមសូមទាក់ទងតាមលេខទូរស័ព្ទលេខ០១២ ៨៥២ ៥២០, ០២៣ ២១១ ៤០៥, ០១៥ ៨៤២ ៥២០ និង០៦៨ ៨៤២ ៥២០។
មន្ទីរពេទ្យមិត្តភាពខ្មែរ-សូវៀត កាលពីខែធ្នូកន្លងមកក៏បានរៀបចំកិច្ចប្រជុំមួយ ស្តីអំពីការពង្រឹងបច្ចេកទេសពិនិត្យព្យាបាល ការផ្តល់សេវាជូនអតិថិជន ពង្រឹងការគោរពក្រមសីលធម៌ វិជ្ជាជីវៈ និង បន្តការយកចិត្តទុកដាក់អនុវត្តវិធានការណ៍សុខាភិបាលក្នុងការបង្ការ ការពារ ទប់ស្កាត់ការចម្លងជំងឺកូវីត ១៩ ផងដែរ។ កិច្ចប្រជុំនេះប្រព្រឹត្តទៅ ក្រោមអធិបតីភាព ឯកឧត្តមសាស្ត្រាចារ្យ ងី ម៉េង នាយកមន្ទីរពេទ្យ រួមទាំងថ្នាក់ដឹកនាំ ប្រធានការិយាល័យ និង នាយផ្នែក គ្រប់ផ្នែក៕
វីដេអូ៖