.jpg)
លោក ស ខេង រដ្ឋមន្ត្រីក្រសួងមហាផ្ទៃ។ រូបថត Sar Kheng Page
រដ្ឋមន្ត្រីក្រសួងមហាផ្ទៃ ស ខេង បានជំរុញដល់ក្រុមការងារនៅតាមក្រសួង-ស្ថាប័នពាក់ព័ន្ធ ត្រូវពង្រឹងស្មារតីសហប្រតិបត្តិការខ្ពស់ក្នុងដែនសមត្ថកិច្ចរបស់ខ្លួន ដើម្បីទប់ស្កាត់ ការបង្ការ និងការបង្ក្រាប បទល្មើសសម្អាតប្រាក់ និងបទល្មើសពាក់ព័ន្ធឱ្យមានប្រសិទ្ធភាពខ្ពស់។
ការជំរុញនេះ ធ្វើឡើងក្នុងឱកាស រដ្ឋមន្ត្រីក្រសួងមហាផ្ទៃលោក ស ខេង បានអញ្ជើញជាអធិបតីក្នុងពិធីផ្សព្វផ្សាយ ខ្លឹមសារអនុក្រឹត្យ និងសេចក្ដីសម្រេចស្ដីពីគណៈកម្មាធិការសម្របសម្រួលថ្នាក់ជាតិប្រឆាំងការសម្អាតប្រាក់ និងហិរញ្ញប្បទានភេរវកម្ម និងហិរញ្ញប្បទានដល់ការរីកសាយភាយអាវុធមហាប្រល័យ ហៅកាត់ថា គ.ស.ហ កាលពីថ្ងៃទី៦ ខែមករា ឆ្នាំ ២០២២។
នាឱកាសនោះ លោក ស ខេង បានណែនាំក្រុមការងារនៅតាមក្រសួង-ស្ថាប័នពាក់ព័ន្ធ ឱ្យពង្រឹងស្មារតីសហប្រតិបត្តិការខ្ពស់ និងបំពេញភារកិច្ចក្នុងដែនសមត្ថកិច្ច និងការទទួលខុសត្រូវរៀងៗខ្លួន ដើម្បីធានាឱ្យបាននូវវឌ្ឍនភាពជាគន្លឹះមួយចំនួននៃការទប់ស្កាត់ ការបង្ការ និងការបង្ក្រាប បទល្មើសសម្អាតប្រាក់ និងបទល្មើសពាក់ព័ន្ធឱ្យមានប្រសិទ្ធភាពខ្ពស់។
លោកបន្តថា៖«ត្រូវបន្តពង្រឹងប្រព័ន្ធប្រឆាំងការសម្អាតប្រាក់និងហិរញ្ញប្បទានភេរវកម្ម និងហិរញ្ញប្បទានដល់ការរីកសាយភាយអាវុធមហាប្រល័យ សំដៅរក្សាស្ថិរភាព និងសុចរិតភាពនៃប្រព័ន្ធហិរញ្ញវត្ថុកម្ពុជា»។
អនុក្រឹត្យដែលបានផ្សព្វផ្សាយនៅថ្ងៃនោះ បានកំណត់អំពីការរៀបចំ និងការប្រព្រឹត្តទៅនៃ គ.ស.ហ។
គ.ស.ហ ដែលជាយន្តការសម្របសម្រួលជាន់ខ្ពស់ ក្នុងការអនុវត្តច្បាប់ស្ដីពីការប្រឆាំងការសំអាតប្រាក់ និងហិរញ្ញប្បទានភេរវកម្ម និងច្បាប់ស្ដីពីការប្រឆាំងហិរញ្ញប្បទានដល់ការរីកសាយភាពអាវុធមហាប្រល័យ។
សមាសភាព របស់ គ.ស.ហ រួមមាន ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃលោក ស ខេង ជាប្រធាន អគ្គទេសាភិបាលធនាគារជាតិនៃកម្ពុជា លោក ជា ចាន់តូ ជាអនុប្រធានប្រចាំការ រដ្ឋមន្ត្រីក្រសួងយត្តិធម៌លោក កើត រិទ្ធ អនុប្រធាន និងមានសមាជិកមកពីតំណាងក្រសួងស្ថាប័នពាក់ព័ន្ធមួយចំនួនទៀត៕
