កំពង់ធំៈ មន្ត្រីជំនាញរដ្ឋបាលព្រៃឈើ សហការជាមួយមន្ត្រីគម្រោង រ៉េដបូកទំរីង បានចាប់ឃាត់ការធ្វើសន្និធិឈើហ៊ុបមូលប្រភេទ សុក្រំ និងស្វាយព្រៃ ចំនួន ៨កំណាត់ ស្មើនឹងប្រមាណជាង ៤ ម៉ែត្រគុប កាលពីថ្ងៃទី៧ ខែមករា នៅក្នុងតំបន់បុស្សស្បូវ ស្ថិតក្នុងឃុំបឹងល្វា ស្រុកសន្ទុក ខេត្តកំពង់ធំ។
មន្ត្រីសង្កាត់រដ្ឋបាលព្រៃឈើក្រយា មន្ត្រីនៃផ្នែករដ្ឋបាលព្រៃឈកំពង់ថ្ម សហការជាមួយមន្ត្រីគម្រោងរ៉េដបូកទំរីង និងកម្លាំងតំបន់ប្រតិបត្តិការសឹករងកំពង់ធំ បានចុះប្រតិបត្តិការបង្ក្រាបបទល្មើសព្រៃឈើក្នុងតំបន់បុស្សស្បូវ ស្ថិតក្នុងឃុំបឹងល្វា ស្រុកសន្ទុក ខេត្តកំពង់ធំ កាលពីថ្ងៃទី៧ ខែមករា ឆ្នាំ ២០២២។
ក្នុងប្រតិបត្តិការនោះមន្ត្រីជំនាញ បានចាប់ឃាត់ការធ្វើសន្និធិឈើហ៊ុបមូលប្រភេទ សុក្រំ និងស្វាយព្រៃ ចំនួន ០៨កំណាត់ ស្មើនឹងជាង៤ ម៉ែត្រគុប ហើយបានជួបប្រទះទីតាំងកាប់រានចំនួន ០១កន្លែង និងបានដកហូតបានរណារយន្តចំនួន ០២គ្រឿង។
វត្ថុតាងត្រូវបានយកទៅរក្សាទុកនៅទីស្នាក់ការសង្កាត់រដ្ឋបាលព្រៃឈើក្រយា (អូរកំពប់អំបិល) ស្ថិតនៅភូមិកំពប់អំបិល ឃុំបឹងល្វា ស្រុកសន្ទុក ខេត្តកំពង់ធំ។ ចំណែកជនល្មើសដែលរត់គេចខ្លួនបាត់ សមត្ថកិច្ចកំពុងស្រាវជ្រាវ៕