.jpg)
វ៉ាក់សាំងប្រភេទ Pfizer ប្រឆាំងនឹងជំងឺកូវីដ១៩ ដែលជាជំនួយពីប្រទេសអូស្ត្រាលីត្រូវបានដឹកមកដល់កម្ពុជា នៅខែធ្នូ ឆ្នាំ២០២១។ រូបថត ហ្វេសប៊ុក
ភ្នំពេញៈ គណៈកម្មការចំពោះកិច្ចចាក់វ៉ាក់សាំងកូវីដ១៩ ក្នុងក្របខ័ណ្ឌទូទាំងប្រទេស(គ.វ.ក-១៩) នឹងប្រើប្រាស់វ៉ាក់សាំងប្រភេទ Pfizer ក្នុងការចាក់វ៉ាក់សាំងកូវីដ១៩ ដូសទី៤ ជូនថ្នាក់ដឹកនាំរាជរដ្ឋាភិបាល ព្រឹទ្ធសភា រដ្ឋសភា ក្រុមគ្រូពេទ្យជួរមុខ(ទាំងរដ្ឋ និងឯកជន) មន្ត្រីរាជការ កងទ័ព នគរបាលជាតិ បុគ្គលិកស្ថានទូត អ្នកសារព័ត៌មាន និងសមាជិក នៃសមាគមសិល្បករកម្ពុជា។
គ.វ.ក-១៩ បានលើកឡើងតាមរយៈសេចក្តីជូនដំណឹងចុះថ្ងៃទី៨ ខែមករា ឆ្នាំ២០២២ ថា អ្នកដែលបានចាក់វ៉ាក់សាំងកូវីដ១៩ ដូសទី៣ ឬដូសជំរុញរួច ហើយមានគម្លាតចាប់ពី៤ខែឡើង នឹងត្រូវផ្តល់ដូសទី៤នៅតាមមន្ទីរពេទ្យជាតិនានាដែលមានទីតាំង កាលបរិច្ឆេទ និងពេលវេលាផ្សេងៗគ្នា ចាប់ពីថ្ងៃទី១៤ ខែមករា ដល់ថ្ងៃទី១២ ខែកុម្ភៈ ឆ្នាំ២០២២។ ការចាក់វ៉ាក់សាំងដូសទី៤នេះនឹងធ្វើនៅមន្ទីរពេទ្យកាល់ម៉ែត មន្ទីរពេទ្យអង្គឌួង មន្ទីរពេទ្យកុមារជាតិ មន្ទីរពេទ្យមិត្តភាពខ្មែរ-សូវៀត និងមជ្ឈមណ្ឌលជាតិគាំពារមាតានិងទារក។
អ្នកដែលត្រូវចាក់វ៉ាក់សាំងកូវីដ១៩ ដូសទី៤ត្រូវភ្ជាប់ជាមួយនូវឯកសារដូចជា បណ្ណចាក់វ៉ាក់សាំងកូវីដ១៩ បណ្ណសម្គាល់ខ្លួនមន្ត្រីរាជការ ឬបណ្ណសម្គាល់មន្ត្រីជាប់កិច្ចសន្យា(ចំពោះមន្ត្រីរាជការ ឬមន្ត្រីជាប់កិច្ចសន្យា) អត្តសញ្ញាណប័ណ្ណសញ្ជាតិខ្មែរ ឬឯកសារដែលប្រើប្រាស់ក្នុងការចុះឈ្មោះកាលពីពេលចាក់វ៉ាក់សាំងដូសទី១។
គ.វ.ក-១៩ បានបន្ថែមថា ការចាក់វ៉ាក់សាំងកូវីដ១៩ ដូសទី៤ ដើម្បីបង្កើនភាពស៊ាំទប់ទល់នឹងការឆ្លងរីករាលដាលនៃជំងឺកូវីដ១៩ ជាពិសេសវីរុសបំប្លែងខ្លួនថ្មីប្រភេទដែលតា និងវីរុសបំប្លែងខ្លួនថ្មីប្រភេទអូមីក្រុង ដើម្បីបានវិលត្រឡប់ទៅដំណើរការជាប្រក្រតីនូវការរស់នៅ រួមទាំងសកម្មភាពសេដ្ឋកិច្ច និងសង្គមផ្សេងៗឡើងវិញ ក្នុងពេលខាងមុខនេះ៕
វីដេអូ៖
