បាត់ដំបងៈ នៅព្រឹកថ្ងៃទី ១០ ខែមករា លោកនាយករដ្ឋមន្ត្រី ហ៊ុន សែន នឹងធ្វើជាអធិបតី សម្ពោធដាក់ឱ្យប្រើប្រាស់ជាផ្លូវការនូវកំណាត់ផ្លូវជាតិលេខ ៥ ពីខេត្តបាត់ដំបង ទៅក្រុងសិរីសោភ័ណខេត្តបន្ទាយមានជ័យប្រវែង ៨៤,៧៤ គ.ម។
សេចក្តីជូនដំណឹងរបស់រដ្ឋបាលខេត្តបាត់ដំបងបានឱ្យដឹងថា ដើម្បីសម្រួលដល់ការសម្ពោធផ្លូវ និងចៀសវាងការកកស្ទះចរាចរណ៍ រដ្ឋបាលខេត្ត បានសម្រេចបិទចរាចរណ៍ជាបណ្តោះអាសន្នលើកំណាត់ផ្លូវវាងក្រុងបាត់ដំបង ចាប់ពីចំណុចប្រសព្វផ្លូវជាតិលេខ ៥ ភូមិស្វាយជុំ ឃុំជ្រៃ ស្រុកថ្មគោល រហូតដល់ចំណុចប្រសព្វជាមួយផ្លូវ ស្របអាងម៉ាឈិតឆ្ពោះទៅអាងកំពីងពួយចាប់ពីម៉ោង ៤:០០ ព្រឹក ដល់ម៉ោង ១២:០០ ថ្ងៃត្រង់។
អភិបាលខេត្តបាត់ដំបងលោក សុខ លូ បានប្រាប់ភ្នំពេញប៉ុស្តិ៍ថា ក្រុមការងារ បានត្រៀមលក្ខណៈរួចជាស្រេចចំពោះការរៀបចំដាក់ឱ្យសម្ពោធផ្លូវនេះ។ បន្ថែមពីនេះលោកគូសបញ្ជាក់ថា កំណាត់ផ្លូវនេះប្រាកដណាស់ពិតជាមានសារៈសំខាន់សម្រាប់ការធ្វើដំណើររបស់បងប្អូនប្រជាពលរដ្ឋ សម្រួលដល់ការដឹកទំនិញផ្សេងៗ ហើយជាខ្សែផ្លូវដ៏មានសារៈសំខាន់ចំពោះសេដ្ឋកិច្ចថែមទៀត។ លោកថា៖ «ផ្លូវនេះកាលពីមិនទាន់ធ្វើវិញ គឺមានខូចខាតខ្លាំង ដែលធ្វើឱ្យការធ្វើដំណើររបស់បងប្អូនប្រជាពលរដ្ឋមានការលំបាកណាស់ គឺចំណាយថវិកាច្រើនពេលវេលាក៏ច្រើន ដល់ពេលផ្លូវនេះធ្វើហើយគឺកាត់បន្ថយពេលវេលានិងថវិកា ហើយការដឹកជញ្ជូនទំនិញគឺស្រួលជាងមុនឆ្ងាយ»។
គម្រោងផ្លូវនេះក៏ធ្លាប់ត្រូវបាន រដ្ឋមន្ត្រីក្រសួងសាធារណការ និងដឹកជញ្ជូនលោក ស៊ុន ចាន់ថុល ចុះពិនិត្យគុណភាពផងដែរ កាលពីខែមិថុនា ឆ្នាំ ២០២១ កន្លងមក។ លោកទេសរដ្ឋមន្ត្រី ស៊ុន ចាន់ថុល ធ្លាប់បានបញ្ជាក់ថា ផ្លូវជាតិលេខ ៥ នេះ គឺជាផ្លូវសំខាន់ និងជាសរសៃឈាមដ៏ធំមួយ ដើម្បីធ្វើឱ្យសេដ្ឋកិច្ចជាតិ មានការរីកចម្រើនថែមទៀត។
លោកថា៖ «ផ្លូវជាតិលេខ ៥ នេះ គឺសំខាន់ណាស់ វាជាចំណែកផ្លូវរបស់អាស៊ានហាយវេលេខ ១ ដែលបានតភ្ជាប់តាំងពីមីយ៉ាន់ម៉ា មកថៃ កម្ពុជា និង វៀតណាមសម្រាប់ដឹកទំនិញ។ យើង មានកសិផលក៏ច្រើននៅប៉ៃលិន បាត់ដំបង រួមនឹងខេត្តផ្សេងទៀតអាចដឹកមកតាមផ្លូវនេះចុះទៅកំពង់ផែហើយបន្តិច ទៀតអាចតភ្ជាប់ផ្លូវល្បឿនលឿនភ្នំពេញ-ក្រុងព្រះសីហនុ»។ កំណាត់ផ្លូវនេះមានដាំលម្អដើមត្របែកព្រៃនៅចំកណ្ដាលទ្រូងផ្លូវប្រមាណ ១២ ០០០ ដើម ចាប់ពីក្រុងបាត់ដំបងរហូតដល់ក្រុងសិរីសោភ័ណ ខេត្តបន្ទាយមានជ័យ។ ដោយឡែក ផ្លូវវាងក្រុងបាត់ដំបង និងផ្លូវវាងក្រុងសិរីសោភ័ណ មានដាំលម្អដើមក្ងោកនៅអមសងខាងផ្លូវប្រមាណ ៦ ៤០០ ដើម ដើម្បីការពារការទន្ទ្រានដីចំណីផ្លូវ បង្កើនសោភណភាព និងជួយទាក់ទាញអ្នកបើកបរ ក៏ដូចជាអ្នកធ្វើដំណើរឱ្យទទួលបាននូវអារម្មណ៍ស្រស់ស្រាយផងដែរ។
ក្រសួងសាធារណការ និងដឹកជញ្ជូន ឱ្យដឹងថា គម្រោងធ្វើឱ្យប្រសើរឡើងវិញ នូវកំណាត់ផ្លូវជាតិលេខ ៥ គឺជាគម្រោងក្រោមឥណទានសម្បទានពីរដ្ឋាភិបាលជប៉ុនតាមរយៈទីភ្នាក់ងារសហប្រតិបត្តិការអន្តរជាតិជប៉ុនប្រចាំកម្ពុជា (JICA)។
ពាក់ព័ន្ធហេដ្ឋារចនាសម្ព័ន្ធផ្លូវថ្នល់នេះដែរ រាជរដ្ឋាភិបាល បានអនុម័តកញ្ចប់ថវិកាសាងសង់ផ្លូវរាប់រយលានដុល្លារ នៅខេត្តព្រះសីហនុ និងខេត្តសៀមរាប ហើយបានសម្ពោធដាក់ឱ្យប្រើប្រាស់នាពេលកន្លងទៅក្នុងនោះកសាងផ្លូវ ៣៤ ខ្សែ និងអាងប្រព្រឹត្តិកម្មទឹកកខ្វក់ចំនួន ៣ នៅខេត្តព្រះសីហនុដោយចំណាយថវិកាសរុបប្រមាណ ៣០០ លានដុល្លារអាមេរិក។ រីឯការកសាងផ្លូវនៅក្រុងសៀមរាប ខេត្តសៀមរាប មានចំនួន ៣៨ ខ្សែ ចំណាយថវិកាសរុបប្រមាណ ១៥០ លានដុល្លារ។
ជាមួយនឹងសមិទ្ធផលដែលសម្រេចបានថ្មីៗទាំងនេះ លោក ហ៊ុន សែន ធ្លាប់បានថ្លែងថា លោកពិតជាមានមោទនភាព ចំពោះការសាងសង់សមិទ្ធផលហេដ្ឋារចនាសម្ព័ន្ធនៅក្នុងក្រុងព្រះសីហនុ ហើយប្រើប្រាស់ថវិកាជាតិសម្រាប់ការវិនិយោគជាលើកដំបូង៕