.jpg)
បុរសម្នាក់បើកមើលក្រុមតេឡេក្រាម «សុវត្ថិភាពចរាចរណ៍យើង OUR ROAD SAFETY» ។ ហ៊ាន រង្សី
ភ្នំពេញៈ គណៈកម្មាធិការជាតិសុវត្ថិភាពចរាចរណ៍ផ្លូវគោកបានចេញការណែនាំឱ្យអ្នកប្រើប្រាស់កម្មវិធីតេឡេក្រាមក្នុងក្រុមដែលមានឈ្មោះថា «សុវត្ថិភាពចរាចរណ៍យើង OUR ROAD SAFETY» កុំផ្តល់ព័ត៌មានក្លែងក្លាយ ឬព័ត៌មានដែលមានចរិតញុះញង់ មួលបង្កាច់ បង្ខូចកិត្តិយស និងសេចក្តីថ្លៃថ្នូររបស់អ្នក-ដទៃ ដែលអំពើទាំងនេះ នឹងត្រូវផ្តន្ទាទោសតាមច្បាប់ជាធរមាន។
គណៈកម្មាធិការជាតិ សុវត្ថិភាពចរាចរណ៍ផ្លូវគោក បានបង្កើតក្រុមតេឡេក្រាម ឈ្មោះ «សុវត្ថិភាពចរាចរណ៍យើង OUR ROAD SAFETY» ជូនសាធារណជនគ្រប់រូបប្រើប្រាស់ដោយសេរី ដើម្បីផ្តល់ព័ត៌មានអំពីសុវត្ថិភាពចរាចរណ៍ផ្លូវគោកទាន់ហេតុការណ៍ បន្ថែមលើបណ្តាញសង្គម កម្មវិធីផ្តល់ព័ត៌មាននានាដែលគណៈកម្មាធិការជាតិមួយនេះកំពុងទំនាក់ទំនងជាមួយសាធារណជន សំដៅបង្ការទប់ស្កាត់កាត់បន្ថយគ្រោះថ្នាក់ និងបង្ការ ទប់ស្កាត់អំពើល្មើសច្បាប់ ស្តីពីចរាចរណ៍ផ្លូវគោកដែលមាននៅលើផ្លូវថ្នល់។
ការបង្កើតក្រុមតេឡេក្រាមថ្មីនេះ គឺអនុវត្តតាមអនុសាសន៍ ណែនាំរបស់លោកនាយករដ្ឋមន្ត្រី ហ៊ុន សែន ថ្លែងក្នុងពិធីបើកការដ្ឋានសាងសង់ និងលើកកម្រិតគុណភាពផ្លូវជាតិលេខ ៤៨ កាលពីថ្ងៃទី ៣ ខែមករា ឆ្នាំ ២០២២។ នេះបើតាមសេចក្តីជូនដំណឹងរបស់គណៈកម្មាធិការជាតិសុវត្ថិភាពចរាចរណ៍ផ្លូវគោកនៅថ្ងៃទី ៦ ខែមករា។
តាមរយៈសេចក្តីជូនដំណឹងនេះ គណៈកម្មាធិការជាតិសុវត្ថិភាពចរាចរណ៍ផ្លូវគោក បានធ្វើការណែនាំ ដូចជាទី ១ សូមផ្តល់ព័ត៌មាន ទីតាំង និងពេលវេលា នៃហេតុការណ៍ពិតប្រាកដ និងច្បាស់លាស់។ ទី ២ សូមផ្តល់រូបភាព ឬវីដេអូខ្លីៗ នៃហេតុការណ៍ ពិតៗជាក់ស្តែង។ ទី ៣ សូមផ្តល់ខ្លឹមសារព័ត៌មានដោយប្រកាន់ខ្ជាប់តាមក្រមសីលធម៌។
ទី ៤ សូមកុំផ្តល់ព័ត៌មានក្លែងក្លាយ ឬព័ត៌មានដែលមានចរិតញុះញង់ មួលបង្កាច់ បង្ខូចកិត្តិយស និងសេចក្តីថ្លៃថ្នូររបស់អ្នកដទៃ ឬប្រើពាក្យពេចន៍អសុរោះ ឬរូបភាពអាសអាភាស ដែលអំពើទាំងនេះនឹងត្រូវផ្តន្ទាទោសតាមច្បាប់ជាធរមាន និងទី ៥ សុំកុំផ្តល់ព័ត៌មានដែលខុសពីព័ត៌មានស្តីពីសុវត្ថិភាពចរាចរណ៍ផ្លូវគោក។
សេចក្តីជូនដំណឹងសរសេរថា បន្ថែមពីនេះ សាធារណជន ក៏អាចរាយការណ៍ តាមរយៈកម្មវិធីលើទូរស័ព្ទដៃ ថែទាំផ្លូវ ROAD CARE Mobile App ដែលអាចទាញយកពី App Sotore ឬ Play Store។ កម្មវិធីនេះនឹងបញ្ជូនព័ត៌មានទៅក្រុមតេឡេក្រាម «សុវត្ថិភាពចរាចរណ៍យើង OUR ROAD SAFETY» ដោយភ្ជាប់ព័ត៌មានទីតាំង និងពេលវេលាដោយស្វ័យប្រវត្តិ។
គណៈកម្មាធិការជាតិសុវត្ថិភាពចរាចរណ៍ផ្លូវគោក សង្ឃឹមយ៉ាងមុតមាំចំពោះស្មារតីចូលរួមប្រកបដោយការស្ថាបនា ក្នុងបំណងកែលម្អស្ថានភាពសុវត្ថិភាពចរាចរណ៍ផ្លូវគោកឱ្យកាន់តែប្រសើរឡើងថែមទៀត ដោយផ្តល់សុវត្ថិភាពជូនអ្នកប្រើប្រាស់ផ្លូវទាំងឡាយតាមរយៈការផ្តល់ព័ត៌មានសុវត្ថិភាពចរាចរណ៍ផ្លូវគោកទាន់ហេតុការណ៍ នៃកម្មវិធីតេឡេក្រាម «សុវត្ថិភាពចរាចរណ៍យើង» នេះ។
លោក លុយ ហុក ប្រជាពលរដ្ឋម្នាក់ដែលចូលរួមក្នុងក្រុមតេឡេក្រាម «សុវត្ថិភាពចរាចរណ៍យើង» ថ្លែងនៅថ្ងៃទី ៩ ខែមករាថា លោកគាំទ្រចំពោះការបង្កើតឱ្យមានក្រុមនេះឡើង ដើម្បីអាចឱ្យប្រជាពលរដ្ឋទូទៅងាយស្រួលក្នុងការធ្វើការរាយការណ៍ព័ត៌មានទាក់ទងនឹងសុវត្ថិភាពចរាចរណ៍នៅលើដងផ្លូវ។
លោកបញ្ជាក់ថា ការផ្តល់ព័ត៌មាន ក្នុងក្រុមនេះ មានការបើកចំហទូលំទូលាយ ហេតុនេះ អ្នកចូលរួមផ្តល់ព័ត៌មានគួរតែ មានក្រមសីលធម៌ និងផ្តល់ព័ត៌មានពិតត្រឹមត្រូវទើបជាការល្អ។
លោកថ្លែងថា៖ «ខ្ញុំយល់ថា មានប្រយោជន៍សម្រាប់កាត់បន្ថយគ្រោះថ្នាក់ចរាចរណ៍ បើការបញ្ចេញមតិប្រកបដោយក្រមសីលធម៌គោរពគ្នាទៅវិញទៅមក ជាពិសេសកុំមានការលាបពណ៌រឿងនយោបាយចូលក្នុងការអនុវត្តច្បាប់»។
ស្រដៀងគ្នានេះ លោក ផាន់ សេរីវង្សស័ក្តិ ប្រជាពលរដ្ឋម្នាក់ទៀត ដែលទើបបានដឹងពីការបង្កើតក្រុមសុវត្ថិភាពចរាចរណ៍តាមប្រព័ន្ធតេឡេក្រាមថ្លែងនៅថ្ងៃទី ៩ ខែមករាថា ការបង្កើតឱ្យមានក្រុមនេះ មានប្រយោជន៍ច្រើនសម្រាប់ប្រជាពលរដ្ឋទូទៅជាពិសេសក្រៅពីផ្តល់ព័ត៌មាន អំពីសុវត្ថិភាពចរាចរណ៍ផ្លូវគោកទាន់ហេតុការណ៍ ក៏អាចជាប្រភពក្នុងការទទួលបានព័ត៌មានទាក់ទងការកកស្ទះ ឬទីកន្លែងដែលមានការជួសជុលផ្លូវផងដែរ។
លោកថ្លែងថា៖ «ខ្ញុំទើបដឹង និងឃើញ ខ្ញុំស្ថិតនៅក្នុងគ្រុបសុវត្ថិភាពចរាចរណ៍។ បើតាមការយល់ឃើញរបស់ខ្ញុំ ដោយទើបបង្កើតគ្រុបនេះខ្ញុំបានចូលមើលម្តងម្កាលដែរ ឃើញបងៗបានប្រាប់អំពីផ្លូវមានភាពកកស្ទះ ឱ្យធ្វើដំណើរវាងផ្លូវមួយចំនួនជួសជុល សរុបមកខ្ញុំគិតថា មានអត្ថប្រយោជន៍ដែរ»៕
