.jpg)
ទិដ្ឋភាពស្លាប់និងរបួសដោយសារផ្ទុះមីនតោននៅខេត្តព្រះវិហារនៅថ្ងៃទី១០ មករានេះ ។ រូបថត Heng Ratana Page
ព្រះវិហារៈ មន្ត្រីជំនាញដោះមីនរបស់អង្គការដោះមីនកម្ពុជា (Cambodian Self Help Demining) ចំនួន ៣ នាក់បានស្លាប់ និងម្នាក់ទៀតរបួសធ្ងន់ រីឯម្នាក់ទៀតបាត់ខ្លួន ដោយសារផ្ទុះមីនតោន ១ គ្រាប់ នៅភូមិសែនតេជៈឃុំមរកត ស្រុកជាំក្សាន្ត ខេត្តព្រះវិហារ នៅថ្ងៃទី ១០ មករានេះ ខណៈនៅថ្ងៃដដែលមន្ត្រីកងទ័ពវរៈលេខ ៣៩៥ ចំណុះឱ្យកងពលតូចអន្តរគមន៍លេខ៩ ម្នាក់បានស្លាប់ដោយសារផ្ទុះគ្រាប់។ នេះបើតាមរបាយការណ៍របស់អធិការដ្ឋាននគរបាលស្រុកជាំក្សាន្ត នៅថ្ងៃទី ១០ ខែ មករា ឆ្នាំ ២០២២។
តាមរបាយកាណ៍នេះថា ករណីផ្ទុះគ្រាប់មិនទាន់ផ្ទុះនៅភូមិសែនតេជៈឃុំមរកត ស្រុកជាំក្សាន្ត បានកើតឡើងនៅម៉ោង ១១ និង ១០ នាទីថ្ងៃទី ១០ មករា ឆ្នាំ ២០២២ ដោយសារករណីដុតភ្លើងសម្អាតគល់ឈើក្នុងចម្ការដំឡូងបណ្តាលឲ្យផ្ទុះគ្រាប់ស្លាប់ឈ្មោះ ហួន លី ភេទប្រុស អាយុ ៤៣ ឆ្នាំ ជាកងទ័ពវរៈ ៣៩៥ ចំណុះកងពលតូចអន្តរគមន៍លេខ៩។
រីឯករណីផ្ទុះមីនតោន ១ គ្រាប់ កើតឡើងនៅវេលាម៉ោង ១១ និង ៣០ នាទីថ្ងៃ ១០ ខែ មករា ឆ្នាំ ២០២២ នៅភូមិឃុំដដែលត្រង់ចំណុចវាលជាសជើងភ្នំមុំ ៣ បណ្តាលឲ្យស្លាប់កងកម្លាំងរបស់អង្គការដោះមីនកម្ពុជានៅនឹងកន្លែង ២ នាក់ បាត់ខ្លួន ១ នាក់ និងរងរបួសធ្ងន់ ១ នាក់ ព្រមទាំងរងរបួសធ្ងន់ប្រជាពលរដ្ឋម្នាក់ផងដែរ៕
