.jpg)
នគរបាលកំពុងកសាងសំណុំរឿងជល់មាន់ បញ្ជូនមនុស្ស ១២ នាក់ទៅសាលាដំបូងខេត្ត។ រូបថត ប៉ូលិស
កំពង់ចាមៈ សមត្ថកិច្ចនគរបាលខេត្តកំពង់ចាមកំពុងរៀបចំកសាងសំណុំរឿងអ្នកលេងល្បែងភ្នាល់ជល់មាន់ចំនួន១២នាក់បញ្ជូនទៅសាលាដំបូងខេត្តកំពង់ចាម បន្ទាប់ពីចាប់ខ្លួនកាលពីថ្ងៃទី ៧ ខែមករា នៅភូមិទី ៧ ឃុំ-ស្រុក កោះសូទិន ខេត្តកំពង់ចាមជាមួយវត្ថុតាងម៉ូតូ ៣៦ គ្រឿង។
លោក អ៊ឹម ឃឿន អធិការនគរបាលស្រុក កោះសូទិន ឱ្យដឹងនៅថ្ងៃទី ៩ មករាថា អ្នកលេងភ្នាល់ជល់មាន់ទាំងនោះជាបុរស និងមានចំនួន ១២ នាក់ដែលត្រូវបានកម្លាំងនគរបាលព្រហ្មទណ្ឌកម្រិតស្រាល ខេត្តកំពង់ចាមសហការជាមួយកម្លាំងសមត្ថកិច្ចរបស់លោកចុះបង្ក្រាបគឺលោកបានប្រគល់ទៅការិយាល័យព្រហ្មទណ្ឌកម្រិតស្រាលខេត្តហើយកាលពីថ្ងៃទី ៧ ខែមករា។ ក្រុមបុរសសង្ស័យទាំង ១២ នាក់កំពុងត្រូវបានការិយាល័យជំនាញព្រហ្មទណ្ឌខេត្តសាកសួរ។
លោកថា៖ «ករណីនេះយើងបានបញ្ជូនជនសង្ស័យទៅជំនាញនគរបាលខេត្តអស់ហើយ ហើយខាងខ្ញុំគ្រាន់តែសហការបង្ក្រាបបទល្មើសនោះជាមួយនគរបាលខេត្តទេ។ ដូច្នេះសមត្ថកិច្ចខេត្តជាអ្នកមានចំណាត់ការបន្ត»។
ពាក់ព័ន្ធបញ្ហានេះ ភ្នំពេញ-ប៉ុស្តិ៍មិនអាចទាក់ទង លោក ហេង វុទ្ធី ស្នងការរងទទួលផែនការងារនគរបាលព្រហ្មទណ្ឌខេត្តកំពង់ចាមបានទេនៅថ្ងៃទី ៩ មករា។ប៉ុន្តែបើតាមមន្ត្រីនគរបាល ១ រូបបានប្រាប់នៅថ្ងៃទី ៩ ខែមករា ថា ក្រុមជនសង្ស័យទាំង ១២ នាក់នោះកំពុងត្រូវបានសមត្ថកិច្ចរៀបចំកសាងសំណុំរឿងបញ្ជូនមកសាលាដំបូងខេត្តកំពង់ចាមបន្តទៀតហើយ។
មន្ត្រីបន្តថា ក្រៅពីមានការឃាត់ខ្លួនជនសង្ស័យហើយសមត្ថកិច្ចរឹបអូសម៉ូតូគ្រប់ប្រភេទបានចំនួន ៣៦ គ្រឿង មាន់ងាប់ចំនួន ៤ ក្បាល ទូរស័ព្ទចំនួន ១១ គ្រឿង ប្រាក់រៀលបានចំនួនជាង ១ លានរៀល និងប្រាក់ដុល្លារបានជាង ២ ពាន់ដុល្លារផង។
ជុំវិញការឃាត់ខ្លួននេះដែរក៏ត្រូវបានមន្ត្រីនៃតុលាការខេត្តកំពង់ចាម ១ រូបស្នើសុំមិនឱ្យបញ្ចេញឈ្មោះបានប្រាប់ភ្នំពេញ-ប៉ុស្តិ៍នៅថ្ងៃទី ៩ មករាថា ក្រុមជនសង្ស័យទាំង ១២ នាក់នោះកំពុងត្រូវសមត្ថកិច្ចនគរបាលជំនាញរៀបចំសំណុំរឿងបញ្ជូនមកសាលាដំបូងខេត្តកំពង់ចាម ដើម្បីបន្តនីតិវិធីស៊ើបសួរទៀត។ ចំពោះការបង្ក្រាបក្រុមជនសង្ស័យលេងល្បែងភ្នាល់ជល់មាន់នេះគឺសមត្ថកិច្ចមូលដ្ឋានបានទទួលសេចក្តីរាយការណ៍ថា នៅក្នុងភូមិ ៧ ឃុំកោះសូទិន ក្នុងស្រុកកោះសូទិនមានការបើកសង្វៀនជល់មាន់លួចលាក់ជាលក្ខណៈទ្រង់ទ្រាយធំមួយកន្លែង។ បន្ទាប់ពីទទួលបានសេចក្តីរាយការណ៍ពីពលរដ្ឋមក នគរបាលព្រហ្មទណ្ឌខេត្តបានរាយការណ៍បន្តទៅលោកអភិបាលខេត្ត អ៊ុន ចាន់ដា និងសុំគោលការណ៍ពីតំណាងអយ្យការអមសាលាដំបូងខេត្តកំពង់ចាមដើម្បីចុះបង្ក្រាប។
លោកបន្តថា ការលួចលាក់ល្បែងភ្នាល់ជល់មាន់ទ្រង់ទ្រាយធំនេះ មានអ្នកលេងទាំងអស់ជាង ៤០ នាក់ប៉ុន្តែដោយសារអ្នកលេងមានចំនួនច្រើនជាងសមត្ថកិច្ច ទើបធ្វើឱ្យអ្នកលេងល្បែងមួយចំនួនធំរត់រួច និងឃាត់ខ្លួនបានតែជាង ១០ នាក់ប៉ុណ្ណោះ។ ចំពោះនៅដំណាក់កាលសមត្ថកិច្ចនគរបាលវិញដោយសារក្រុមជនសង្ស័យមានចំនួនច្រើន ដូច្នេះហើយទើបការសួរចម្លើយត្រូវប្រើពេលយូរ។ ថ្ងៃទី ៩ មករានគរបាលយុត្តិធម៌គាត់កំពុងសាកសួរជនសង្ស័យ ដើម្បីកសាងរបាយ-ការណ៍ ហើយបើហួសនីតិវិធីឃុំខ្លួន៤៨ម៉ោងទើបបញ្ជូនមកតំណាងអយ្យការសាកសួរបន្តទៀត។ ពេលនោះតំណាងអយ្យការនឹងយកច្បាប់ល្បែងស៊ីសងមកអនុវត្ត ថាតើត្រូវអប់រំឬយ៉ាងណា។ លោកថា៖ «យើងអនុវត្តក្រុមជនសង្ស័យនេះដោយយោងលើច្បាប់ស្តីពីល្បែងស៊ីសង អ្នកណាជាអ្នកលេង អ្នកណាជាអ្នកចាត់ចែង និងជាអ្នកផ្តល់ទីតាំង តើត្រូវផ្តន្ទាទោសពីប៉ុន្មានឆ្នាំទៅប៉ុន្មានឆ្នាំ និងត្រូវពិន័យជាប្រាក់ប៉ុន្មាន?»៕
