.jpg)
សត្វផ្សោតដែលគេប្រទះឃើញក្នុងទន្លេ នៅខេត្តស្ទឹងត្រែងថ្មីៗនេះ ។ រូបថត ហ្វេសប៊ុក
ស្ទឹងត្រែងៈនាយខណ្ឌរដ្ឋបាលជលផលខេត្តស្ទឹងត្រែងនៅថ្ងៃទី ១០ ខែមករា បានប្រាប់ទៅកម្លាំងឆ្មាំទន្លេ៦នាក់ឱ្យប្តូរវេនគ្នាល្បាតដើម្បីតាមឃ្លាំមើលសត្វផ្សោត ១ ក្បាល ដែលកន្ទុយជាប់មង។ការប្រាប់នេះធ្វើឡើងក្រោយពីអ្នកជំនាញអង្គការ WWF និងរដ្ឋបាលជលផលថ្នាក់ជាតិហាមមិនឲ្យព្យាយាមប្រើវិធីផ្សេងៗចូលចាប់ ព្រោះអាចនាំឲ្យសត្វផ្សោតងាប់បាន។
លោក ស្រី សំវិចិត្រ នាយខណ្ឌជលផលស្ទឹងត្រែងឱ្យដឹងនៅថ្ងៃទី១០ ខែមករាថា សត្វផ្សោត១ក្បាលមានវ័យចាស់បន្តិចត្រូវបានឆ្មាំទន្លេប្រទះឃើញកន្ទុយជាប់មកតាំងពីថ្ងៃទី៦ ខែមករា នៅក្នុងអន្លង់ឈើទាល តំបន់ទេសចរណ៍ព្រះរំកិល។ ក្រោយពីឃើញសត្វផ្សោតនោះជាប់មងកម្លាំងឆ្នាំទន្លេនិងភាគីឡាវបានប្រាប់ពីមធ្យោបាយផ្សេងៗដើម្បីជួយសង្គ្រោះដូចជា ដាក់យុថ្កាទាញផ្សោតឬឲ្យសត្វផ្សោតហែលមកជិតហើយយកកណ្តៀវកាត់មងចេញជាដើម។
ក៏ប៉ុន្តែលោកប្រាប់ថា មធ្យោបាយទាំងអស់នោះ ត្រូវបានមន្ត្រីជំនាញអង្គការ WWF និងរដ្ឋបាលព្រៃឈើថ្នាក់ជាតិប្រាប់ថានឹងធ្វើឲ្យមានគ្រោះថ្នាក់ដល់សត្វផ្សោតដែលអាចបណ្តាលឲ្យវាងាប់បាន។លោកថ្លែងថា៖«យើងមិនអាចមានវិធានការអីផ្សេងក្រៅពីគ្រាន់តែចុះល្បាតតាមដានមើលវាទេ អ៊ីចឹងយើងមានកម្លាំងឆ្មាំទន្លេយើងធ្វើការនៅទីហ្នឹងមើលវាហែលយើងចែកវេនគ្នាទៅព្រោះវាហែលមានតែឡើងទៅលើចុះមកក្រោមប្រហែលជា៤ទៅ៥គីឡូ ចុះឡើងៗហ្នឹង» ។
លោកនាយខណ្ឌរដ្ឋបាលជលផលបញ្ជាក់ថា សត្វផ្សោតនោះបានជាប់មង ប៉ុន្តែមិនមែនជាប់មងនៅនឹងកន្លែងដែលធ្វើឲ្យវាហែលមិនបាននោះទេ។វាអាចហែលទៅមកបានធម្មតាគ្រាន់តែកន្ទុយរបស់វាជាប់មង ហេតុនេះវាមិនមានបញ្ហាចំពោះការស្វែងរកអាហារឡើយ។លោកថា មងដែលជាប់នៅកន្ទុយសត្វផ្សោតនោះ មានប្រវែងប្រមាណ១ម៉ែត្រដែលមានការដាច់ចេញខ្លះៗហើយគិតមកដល់ថ្ងៃទី១០ ខែមករា។
លោកថ្លែងថា៖«វាជាប់មងនៅកន្ទុយអត់មានពាក់ព័ន្ធអីនឹងការអត់ចំណីទេ វាហែលធម្មតាបាន។ ដែលអត់ចំណីហ្នឹងលុះត្រាតែវាអត់ធ្មេញវាចាស់ស្លាប់ដោយពិបាកនិងចាប់ចំណីវាខ្សោយអាហ្នឹងវាអត់មានអាហារនៅក្នុងក្រពះរបស់វាអាហ្នឹងវាអាចស្លាប់មែន»។
លោកនាយខណ្ឌរដ្ឋបាលជលផលប្រាប់ថា នៅអន្លង់ឈើទាលគឺរួមគ្នាជាមួយប្រទេសឡាវដោយខណ្ឌចែកព្រំគ្នា។លោកថា កន្លងមក លោកតែងតែបានផ្សព្វផ្សាយ ក៏ដូចជាអប់រំដល់ប្រជានេសាទនៅតំបន់នោះ ឲ្យនាំគ្នាជួយអភិរក្ស និងបញ្ឈប់ការដាក់មង នៅតាមតំបន់ហាមឃាត់។ដោយឡែក សត្វផ្សោតដែលជាប់មងនេះអាចបណ្តាលមកពីវាហែលចូលទៅដែនទឹករបស់ប្រទេសឡាវ ព្រោះខាងឡាវមិនមានការហាមឃាត់រឿងដាក់មងនោះទេ ។
លោកថ្លែងថា៖«ព្រំទឹករបស់យើងក៏មានព្រំទឹករបស់ឡាវក៏មានដល់អ៊ីចឹងយើងមិនអាចហាមផ្សោតមិនឲ្យហែលទៅដីឡាវបានទេ អាហ្នឹងហើយដែលជាបញ្ហាប្រឈមកន្លងមកដែលយើងតែងលើកប្រាប់អ្នកពាក់ព័ន្ធដើម្បីជួយរកវិធានការ។ខាងយើងមានឆ្នាំទន្លេ សហគមន៍និងអាជ្ញាធរចូលរួមណាស់ក្នុងការការពារផ្សោត។ដោយឡែកខាងឡាវគេដាក់មងដាក់អីបានធម្មតា» ៕
