.jpg)
ទិដ្ឋភាពនៅពីខាងមុខក្រសួងប្រៃសណីយ៍ និងទូរគមនាគមន៍ នាឆ្នាំ២០២១។ រូបថត ហេង ជីវ័ន
ភ្នំពេញៈ ក្រសួងប្រៃសណីយ៍ និងទូរគមនាគមន៍ ប្រកាសជ្រើសរើសអ្នកជំនាញបច្ចេកវិទ្យាចំនួន ១២៥ នាក់ ដើម្បីបណ្តុះបណ្តាលធនធានមនុស្ស ក៏ដូចជាដើម្បីពង្រឹង និងពង្រីកការប្រើប្រាស់បច្ចេកវិទ្យាក្នុងការផ្តល់សេវាសាធារណៈជូនសាធារណជនឱ្យកាន់តែល្អប្រសើរ។
សេចក្តីជូនដំណឹងរបស់ក្រសួងប្រៃសណីយ៍ និងទូរគមនាគមន៍ ឱ្យដឹងថា ការជ្រើសរើសអ្នកជំនាញចំនួន១២៥នាក់ សម្រាប់បម្រើការងារនៅទីស្ដីការក្រសួង ដើម្បីពង្រឹង និងពង្រីកការប្រើប្រាស់បច្ចេកវិទ្យាក្នុងការផ្តល់សេវាសាធារណៈឱ្យកាន់តែល្អប្រសើរ ក្នុងទិសដៅជំរុញការអភិវឌ្ឍសេដ្ឋកិច្ច និងសង្គម។ ជាពិសេសដើម្បីធានាឱ្យបានភាពជោគជ័យនៃការអនុវត្តគោលនយោបាយរដ្ឋាភិបាលឌីជីថលនៅកម្ពុជា។
បើតាមសេចក្តីជូនដំណឹង ជំនាញដែលក្រសួងប្រកាសជ្រើសរើសចំនួន១២៥នាក់នោះ រួមមាន អ្នកជំនាញបច្ចេកវិទ្យាក្លោដ (Cloud Technology)ចំនួន១៥នាក់ អ្នកជំនាញមជ្ឈមណ្ឌលទិន្នន័យ(Data Center) ចំនួន ១៥នាក់។ អ្នកជំនាញបច្ចេកវិទ្យាបញ្ញាសិប្បនិម្មិត(Artificial Intelligence–AI)ចំនួន១៥នាក់និង អ្នកជំនាញអភិវឌ្ឍសុសវែ(Software Development)ចំនួន១៥នាក់។ អ្នកជំនាញវិទ្យាសាស្ត្រទិន្នន័យ(Data Science) ចំនួន១៥នាក់ អ្នកជំនាញសន្តិសុខសាយប័រ (Cybersecurity) ចំនួន១៥នាក់ អ្នកជំនាញបច្ចេកវិទ្យាប្លុកជេន (Blockchain Technology)ចំនួន១៥នាក់ និងអ្នកជំនាញហេដ្ឋារចនាសម្ព័ន្ធទូរគមនាគមន៍(Telecommunications Infrastructure)ចំនួន២០នាក់។
ក្រសួងបន្តថា ចំពោះលក្ខខណ្ឌនៃការជ្រើសរើស បេក្ខជនត្រូវមានសញ្ញាបត្រថ្នាក់បរិញ្ញាបត្រឡើងទៅ ស្របតាមជំនាញជ្រើសរើស។ ត្រូវមានចំណេះដឹងភាសាអង់គ្លេសអាចប្រើការបាន មានឆន្ទៈនិងក្រមសីលធម៌បំពេញការងារ មានភាពស្មោះត្រង់និងយកចិត្តទុកដាក់ចំពោះការងារមានភាពអត់ធ្មត់តស៊ូនិងឧស្សាហ៍ព្យាយាម មានសមត្ថភាពបំពេញការងារដោយឯករាជ្យនិងការងារជាក្រុម មានគំនិតផ្តួចផ្តើមនិងច្នៃប្រឌិត។ ទទួលយកការបណ្តុះបណ្តាលចំណេះដឹងបន្ថែមនិងគុណវុឌ្ឍិផ្សេងទៀតតាមជំនាញនីមួយៗដែលភ្ជាប់មកជាមួយសេចក្តីជូនដំណឹងនេះ។
តាមរយៈសេចក្តីជូនដំណឹងនេះ ក្រសួងបញ្ជាក់ថា ប្រាក់បៀវត្យរ៍ និងប្រាក់ឧបត្ថម្ភប្រចាំខែ ស្របតាមមុខតំណែង សមត្ថភាព បទពិសោធ ទទួលបានចំណេះដឹង និងជំនាញឯកទេសវិជ្ជាជីវៈបន្ថែមតាមរយៈការបណ្តុះបណ្តាល ការអនុវត្តការងារ និងគុណវុឌ្ឍិរបស់បេក្ខជនជាក្រុម និងការបង្ហាញភាពជាអ្នកដឹកនាំក្នុងវិស័យសាធារណៈ និងឱកាសក្លាយជាមន្ត្រីរាជការដោយផ្អែកលើសមត្ថភាព និងសមិទ្ធកម្មការងារ។
អនុរដ្ឋលេខាធិការក្រសួងប្រៃសណីយ៍និងទូរគមនាគមន៍ លោកលីវ សុផាណារិទ្ធ ប្រាប់ភ្នំពេញប៉ុស្តិ៍ថា ការជ្រើសនេះ ដើម្បីបណ្តុះបណ្តាលធនធានមនុស្ស ដែលជាចលករមួយដ៏សំខាន់ ក្នុងវិស័យបច្ចេកវិទ្យា។
លោកថ្លែងថា៖«អ៊ីចឹង ក្រសួងធ្វើយ៉ាងណាប្រមូលធនធានមនុស្ស ដែលមានចំណេះដឹងក្នុងផ្នែកនេះ ដើម្បីជួយអភិវឌ្ឍកិច្ចការក្នុងផ្នែកបច្ចេកវិទ្យាឱ្យកាន់តែរីកម្រើនទៅមុខទៀត»។
លោកថា ផែនការរបស់ក្រសួង មានច្រើនក្នុងការអភិវឌ្ឍទាំងវិស័យទូរគមនាគមន៍ វិស័យបច្ចេកវិទ្យា ជាពិសេសចង់ជំរុញផ្នែកឌីជីថល។ លោកថា៖«ព្រោះវិស័យឌីជីថលដើរតួសំខាន់ណាស់សម្រាប់ជួយដល់សេដ្ឋកិច្ចផង និងជួយដល់កិច្ចការសង្គមផ្សេងៗ។ ជាពិសេស យើងឃើញថា នៅក្នុងដំណាក់កាលនៃជំងឺកូវីដ១៩ ប្រព័ន្ធបច្ចេកវិទ្យាក៏ដូចជាប្រព័ន្ធឌីជីថលជួយសម្រួលកិច្ចការជាច្រើនដល់ប្រជាពលរដ្ឋឱ្យការងារប្រសើរជាងមុន»។
សម្រាប់កាលបរិច្ឆេទទទួលពាក្យ និងនីតិវិធីនៃការជ្រើសរើសបេក្ខជនទាំង២ភេទ ត្រូវបំពេញពាក្យស្នើសុំតាមអាសយដ្ឋាន www.mptc.gov.kh/careers ចាប់ពីថ្ងៃជូនដំណឹងនេះរហូតដល់ថ្ងៃទី២៨ ខែមករា ឆ្នាំ២០២២ វេលាម៉ោង១៧:០០នាទី។ បេក្ខជនត្រូវប្រឡងប្រជែងតាមរយៈវិញ្ញាសាសរសេរ ឬអនុវត្តកិច្ចការ ICT(ICT Assignment)។ បេក្ខជនដែលទទួលបានលទ្ធផលជាប់លើវិញ្ញាសាសរសេរ ត្រូវមកធ្វើបទបង្ហាញ ឬមកសម្ភាស ដោយគណៈកម្មការរៀបចំការប្រឡងជ្រើសរើសអ្នកជំនាញ។
សម្រាប់ព័ត៌មានបន្ថែម សូមទាក់ទងមកនាយកដ្ឋានបុគ្គលិក និងបណ្តុះបណ្តាល នៃក្រសួងប្រៃសណីយ៍ និងទូរគមនាគមន៍ តាមរយៈលេខទូរសព្ទ០៩៦ ៧០០ ៦៦៦៦, ០១២ ៩២៥ ៩៣៥ និង ០៩២ ៨៨៦ ២៤២៕
