.jpg)
ប្រឡាយអត់មានទឹក និងស្រូវប្រាំងកសិករនៅស្រុកព្រះនេត្រព្រះប្រឈមការខូចខាត។ រូបថត ក្រសួងធនធានទឹក
បន្ទាយមានជ័យៈ ស្រូវប្រាំងប្រមាណជាង ២ ០០០ ហិកតារបស់ប្រជាកសិករ ក្នុងឃុំចំនួន ៣ នៃស្រុកព្រះនេត្រព្រះ ខេត្តបន្ទាយមានជ័យ រួមមាន ឃុំភ្នំលៀប ឃុំប្រាសាទ និងឃុំទឹកជោរ កំពុងប្រឈមកង្វះទឹកស្រោចស្រព ខណៈទឹកនៅក្នុងប្រព័ន្ធប្រឡាយស្រោចស្រព កំពុងរីងស្ងួត ដោយសារតែគ្រោះរាំងស្ងួត។ នេះបើតាម អាជ្ញាធរ និងប្រជាកសិករក្នុងឃុំទាំងនោះ។
លោក លុច ផ មេឃុំទឹកជោរ ប្រាប់ភ្នំពេញប៉ុស្តិ៍នៅថ្ងៃទី ៩ ខែមករា ថា នៅពេលនេះ ទឹកនៅតាមប្រឡាយ បានគោករាក់ដោយកន្លែងទៅហើយ ខណៈអាកាសធាតុក្ដៅហួតហែងខ្លាំង និងគ្មានភ្លៀង ធ្វើឱ្យស្រូវប្រាំងប្រមាណជាង ៣០០ ហិកតារបស់ប្រជាកសិករនៅក្នុងឃុំនេះជួបប្រឈមនូវបញ្ហាខ្វះទឹកស្រោចស្រព។
លោកថ្លែងថា៖ «បើគ្មានការអន្តរាគមន៍ បើកទ្វារទឹកសំណង់ស្ទាក់ទឹកស្ទឹងក្រឡាញ់ទម្លាក់មកជួយទេ ស្រូវប្រាំងរបស់បងប្អូនប្រជាកសិករប្រមាណជាង ៣០០ ហិកតា ក្នុងឃុំទឹកជោរយើងខ្ញុំ នឹងអាចរងការខូចខាត»។
បើតាមការពិនិត្យស្ថានភាពទឹកដែលមាននៅសេសសល់ក្នុងប្រឡាយ នាពេលនេះ អាចធានាដល់ការបូមស្រោចស្រពបានតែក្នុងរយៈពេល ១ សប្ដាហ៍ទៀតប៉ុណ្ណោះនឹងត្រូវគោករីងអស់ទាំងស្រុងហើយ។ នេះជាការលើកឡើងរបស់អ្នកស្រី មៀច សាម៉ាច អាយុ ៥៦ ឆ្នាំជាកសិករ នៅភូមិ-ឃុំទឹកជោរ។
អ្នកស្រីថ្លែងថា៖ «នៅពេលនេះទឹកវាមិនទាន់រីងស្ងួតទាំងស្រុងទេ ហើយស្រូវក៏មិនទាន់មានបញ្ហាដែរ ប៉ុន្តែទឹកនៅក្នុងប្រឡាយវាអាចនឹងគោករីងអស់នៅក្នុងរយៈពេល ១ សប្ដាហ៍ទៀត យ៉ាងយូរ។ ក្រោយពីទឹកគោករីងអស់ពីប្រឡាយទៅ ស្រូវពួកយើងនឹងរងការខូចខាតអស់មិនខាន ប្រសិនបើគ្មានអាជ្ញាធរពាក់ព័ន្ធ ជួយអន្តរាគមន៍បូមទឹកមកជួយសង្គ្រោះទាន់ពេលវេលាទេនោះ»។
ជុំវិញក្ដីព្រួយកង្វល់នេះ លោក មាស ហ៊ឹក មេឃុំប្រាសាទ បានប្រាប់ភ្នំពេញប៉ុស្តិ៍ថា ស្រូវប្រាំងប្រមាណជាង ៥០០ ហិកតានៅក្នុងឃុំប្រាសាទ ដែលកំពុងរងការគំរាមកំហែង ដោយគ្រោះរាំងស្ងួត ប៉ុន្តែវានៅមិនទាន់មានបញ្ហាអ្វីកើតឡើងជាដុំកំភួននៅឡើយទេនាពេលនេះ។
ទោះយ៉ាងណា លោកបានរាយការណ៍ទៅមន្ត្រីធនធានទឹក ដែលប្រចាំការនៅសំណង់ស្ទាក់ទឹកស្ទឹងក្រឡាញ់ ដើម្បីត្រៀមលក្ខណៈជាមុន ក្នុងការជួយអន្តរាគមន៍បើកបង្ហូរទឹកមកជួយសង្គ្រោះស្រូវប្រាំងរបស់ប្រជាកសិករ ក្នុងឃុំប្រាសាទនោះហើយ។
លោកថ្លែងថា៖ «នៅពេលនេះ មន្ត្រីធនធានទឹកបានបើកបង្ហូរទឹកពីសំណង់ស្ទាក់ទឹកស្ទឹងក្រឡាញ់នោះមកហើយ ប៉ុន្តែមិនខ្លាំងទេគឺគេបើកបង្ហូរដោយភាពសន្សំសំចៃបំផុត»។
ស្រដៀងគ្នានេះ លោក ជួយ គាងថូង សមាជិកក្រុមប្រឹក្សាឃុំភ្នំលៀប ប្រាប់ភ្នំពេញប៉ុស្តិ៍ថា ស្រូវប្រាំងប្រមាណជាង ១ ០០០ ហិកតា របស់ប្រជាកសិករនៅក្នុងឃុំរបស់លោកនៅមិនទាន់រងការខូចខាតនោះទេ ប៉ុន្តែប្រជាកសិករបារម្ភពីការខ្វះទឹកស្រោចស្រព ព្រោះទឹកនៅក្នុងអូរ កំពុងគោករីងជាបណ្ដើរៗហើយ។ លោកថ្លែងថា៖ «បើគ្មានការបូមទឹកពីតំបន់ផ្សេងមកជួយឱ្យទាន់ពេលទេនោះ ស្រូវមួយចំនួនអាចនឹងរងការខូចខាតជាមិនខានឡើយ»។
ជុំវិញក្ដីព្រួយកង្វល់របស់កសិករ និងអាជ្ញាធរឃុំទាំង ៣ ខាងលើនេះលោក ឃូ ពៅ អភិបាលស្រុកព្រះនេត្រព្រះ ថ្លែងថា លោកបានបញ្ជាឱ្យមន្ត្រីផ្នែកកសិកម្ម និងធនធានទឹក ដែលស្ថិតក្រោមរដ្ឋបាលស្រុកព្រះនេត្រព្រះ ចុះអន្តរាគមន៍បូមទឹកពីស្ទឹងក្រឡាញ់ និងស្ទឹងស្រែង ១ ចូលទៅតាមប្រឡាយមេ នៅក្នុងឃុំទាំង ៣ ខាងលើហើយ។
លោកថ្លែងថា៖ «នៅពេលនេះ យើងនៅមិនទាន់ខ្វះទឹកនោះទេ។ ស្ទឹងក្រឡាញ់ និងស្ទឹងស្រែង គឺនៅសល់ទឹកកាចស្ទឹងដូច្នេះយើងនឹងមិនឱ្យស្រូវរបស់បងប្អូនកសិករយើង រងការខូចខាតនោះឡើយ។ យើងនឹងជួយអន្តរាគមន៍បូមទឹកពីស្ទឹងទាំង ២ បញ្ចូលទៅក្នុងប្រឡាយមេ ដើម្បីឱ្យកសិករយើងបូមបន្តទៅដាក់ក្នុងដីស្រែរបស់ពួកគាត់»។ ទោះយ៉ាងណាក្ដី លោកបានអំពាវនាវដល់ប្រជាកសិករនៅក្នុងឃុំទាំង ៣ ត្រូវធ្វើការប្រើប្រាស់ទឹកដោយសន្សំសំចៃ ដើម្បីការពារភាពខ្វះខាតទឹកប្រើប្រាស់នៅក្នុងរដូវប្រាំង ដែលមានអាកាសធាតុក្ដៅហួតហែងខ្លាំង៕
