ភ្នំពេញៈ ចាប់ពីថ្ងៃទី ១២ ដល់ ១៨ ខែមករានេះ អ្នករស់នៅតំបន់ជួរភ្នំដងរែក និងខ្ពង់រាបឦសានត្រូវបង្កើនការយកចិត្តទុកដាក់ អំពីបញ្ហាសុខភាពបន្ថែមទៀត ខណ:អាកាសធាតុត្រជាក់ នឹងធ្លាក់ចុះដល់កម្រិត ១៥ អង្សាសេ ឬទាបជាងនេះ។ នេះបើយោងតាមការព្យាករណ៍អាកាសធាតុរបស់ក្រសួងធនធានទឹក និងឧតុនិយម កាលពីថ្ងៃទី ១១ ខែ មករា ឆ្នាំ២០២២។
ការព្យាករណ៍នេះបានធ្វើឡើង ក្រោយពីក្រុមមន្ត្រីជំនាញ ផ្នែកអាកាសធាតុ បានពិនិត្យឃើញថាទ្រនុងសម្ពាធខ្ពស់ពីប្រទេសចិនកំពុងរំកិលចុះមកក្រោម គ្របដណ្តប់លើកម្ពុជា ជាមួយនិងខ្យល់មូសុងឦសានបក់ក្នុងល្បឿនបង្គួរ ដែលស្ថានភាពបែបនេះ នឹងធ្វើឲ្យតំបន់វាលទំនាបកណ្ដាល មានសីតុណ្ហភាពអប្បបរមាពី១៨-២១អង្សាសេ ខណៈតំបន់ជួរភ្នំដងរែក និងខ្ពង់រាបឦសាន មានសីតុណ្ហភាពអប្បបរមា ពី១៥-១៨ អង្សាសេ។ ចំណែកនៅតំបន់មាត់សមុទ្រ មានសីតុណ្ហភាពអប្បបរមា ពី ១៩-២២អង្សាសេ។
លោក ចាន់ យុត្ថា អ្នកនាំពាក្យក្រសួងធនធានទឹក បានប្រាប់ភ្នំពេញប៉ុស្តិ៍ថា បន្ទាប់ពីមានការធ្លាក់ចុះសីតុណ្ហភាពត្រជាក់នេះតំបន់មួយចំនួន អាចនឹងមានភ្លៀងកក់ខែកើតឡើងផងដែរ។
ទន្ទឹមនឹងនេះ លោកបានអំពាវនាវថា៖«សម្រាប់អ្នករស់នៅ តំបន់ជួរភ្នំដងរែក និង ខ្ពង់រាបឦសាន គួរបង្កើនការយកចិត្តទុកដាក់ពីសុខភាពផ្ទាល់ខ្លួន និង ក្រុមគ្រួសារ ពិសេសកុមារ និង ចាស់ជរា ព្រោះចាប់ពីថ្ងៃទី ១២ ដល់១៨ ខែមករានេះ អាកាសធាតុត្រជាក់ នឹងអាចធ្លាក់ចុះមកក្នុងកម្រិត១៥ អង្សាសេ ឬ ទាបជាងនេះ»។
ក្នុងអំឡុងពេលនៃការចាប់ផ្ដើមរដូវរងារមកដល់ កាលពីខែធ្នូកន្លងទៅថ្មីៗនេះលោក នាយករដ្ឋមន្ត្រី ហ៊ុន សែន បានអំពាវនាវឲ្យពលរដ្ឋបង្កើការយកចិត្តទុកដាក់ ថែទាំសុខភាពឲ្យបានល្អ ដោយត្រូវស្លៀកពាក់អាវ រងាក្រាស់ៗ និង ណែនាំឲ្យអាជ្ញាធរ ថ្នាក់ក្រោមជាតិ និងផ្នែកពាក់ព័ន្ធផ្សេងទៀត ផ្ដល់អាវរងារ និង ភួយមុង ដល់ចាស់ជរា នៃគ្រួសារទីទាល់ក្រ និង គ្មានទីពឹង ដោយលោកមានប្រសាសន៍ថា៖«អាកាសធាតុត្រជាក់ តែងនាំមកនូវជំងឺ ដង្កាត់ផ្សេង ពិសេសជំងឺផ្ដាសាយ ...សូមបន្តអនុវត្តវិធានការ ៣ កុំ ៣ ការពារ »៕
វីដេអូ៖