.jpg)
បុគ្គលិកណាហ្គាវើលដ៍តវ៉ាសុំឱ្យក្រុមហ៊ុនគោរពសិទ្ធិការងារ។ រូបថត ហ្វេសប៊ុក
ភ្នំពេញៈ តំណាងអង្គការពលកម្មអន្តរជាតិ (ILO) ផ្ញើលិខិតជូនលោកនាយករដ្ឋមន្ត្រី ហ៊ុន សែន សូមឱ្យប្រើប្រាស់អំណាចរបស់លោក ដើម្បីធានាឱ្យមានការដោះលែងតំណាងសហជីពក្រុមហ៊ុនណាហ្គាវើលដ៍ជាបន្ទាន់ ក្រោយមានការចាប់ខ្លួន និងចោទប្រកាន់ជាបន្តបន្ទាប់ ប៉ុន្តែមន្ត្រីរដ្ឋាភិបាលថា នេះគឺជាបទល្មើសដែលត្រូវដោះស្រាយតាមផ្លូវតុលាការ។
លិខិតដែលបានផ្ញើជូនលោកនាយករដ្ឋមន្ត្រី ហ៊ុន សែន ដោយលោក Guy Ryder តំណាងអង្គការពលកម្មអន្តរជាតិ (ILO) នៅប្រទេសស្វ៊ីសបានធ្វើឡើងកាលពីថ្ងៃទី ៧ មករា និងត្រូវបានផ្សព្វផ្សាយកាលពីថ្មីៗនេះ។
លោក Guy Ryder លើកឡើងថា សារៈសំខាន់ជាមូលដ្ឋាននៃការគោរពសេរីភាពក្នុងការបង្កើតសមាគម ដែលជាការការពារចម្បងមួយនៃសន្តិភាព និងយុត្តិធម៌សង្គមដែលត្រូវបានទទួលស្គាល់ពេញលេញដោយប្រទេសកម្ពុជា។ លោកបានបន្តថា ការចាប់ខ្លួន និងដាក់ពន្ធនាគារពាក់ព័ន្ធនឹងសកម្មភាពធ្វើកូដកម្មដោយសន្តិវិធី គឺជាការជ្រៀតជ្រែកយ៉ាងធ្ងន់ធ្ងរលើសេរីភាពស៊ីវិលជាទូទៅ និងសិទ្ធិសហជីពជាពិសេស។
លោកក៏បានអំពាវនាវទៅលោកនាយករដ្ឋមន្ត្រី ឱ្យប្រើប្រាស់អំណាចរបស់ខ្លួន ដើម្បីធានាឱ្យមានការដោះលែងជាបន្ទាន់ពីការឃុំឃាំងកម្មករទាំងអស់ និងទម្លាក់ចោលបទចោទប្រកាន់ព្រហ្មទណ្ឌទាំងអស់ទាក់ទងនឹងសកម្មភាពសហជីពរបស់ពួកគេ។
លោកបញ្ជាក់ថា៖ «ការឃាត់ទុកមេដឹកនាំសហជីព ចំពោះសកម្មភាពពាក់ព័ន្ធនឹងការអនុវត្តសិទ្ធិរបស់ពួកគេ គឺផ្ទុយនឹងគោលការណ៍សេរីភាពនៃសមាគម។ [ខ្ញុំ] សម្តែងការព្រួយបារម្ភយ៉ាងខ្លាំងចំពោះការចាប់ខ្លួនកម្មករ និងសកម្មជនសហជីព នាពេលថ្មីៗនេះ បន្ទាប់ពីកូដកម្មដោយសន្តិវិធី ដោយសហជីពទ្រទ្រង់សិទ្ធិការងារ បុគ្គលិកកម្មករខ្មែរនៃក្រុមហ៊ុនណាហ្គាវើលដ៍ (LRSU)»។
គិតមកដល់ពេលនេះ គឺមានថ្នាក់ដឹកនាំ និងសកម្មជនរបស់សហជីពក្នុងក្រុមហ៊ុនណាហ្គាវើលដ៍ចំនួន ៩ នាក់ហើយ ដែលត្រូវបានតុលាការធ្វើការចោទប្រកាន់។ ក្នុងនោះ ៨ នាក់ត្រូវបានតុលាការសម្រេចឃុំខ្លួនបណ្តោះអាសន្នពីបទ «ញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម» បន្ទាប់ពីកម្មករក្រុមហ៊ុនណាហ្កាវើលដ៍ជាង ១ ០០០ នាក់បានធ្វើការតវ៉ាជាបន្តបន្ទាប់ ដើម្បីឱ្យទទួលយកអតីតកម្មករចំនួន ៣៦៥ នាក់ចូលធ្វើការវិញ។
លោក ផៃ ស៊ីផាន អ្នកនាំពាក្យរាជរដ្ឋាភិបាលបានប្រាប់ភ្នំពេញប៉ុស្តិ៍ នៅថ្ងៃទី ១១ ខែមករា ថា ចំពោះរឿងវិវាទការងារនៅក្នុងក្រុមហ៊ុននេះ គឺជាភារកិច្ចរបស់ក្រសួងការងារ និងបណ្តុះបណ្តាលវិជ្ជាជីវៈ ដែលជាអ្នកមានភារកិច្ចក្នុងការសម្របសម្រួល ដោយយោងទៅតាមច្បាប់។ ការទទួលយកកម្មករឱ្យចូលធ្វើការវិញ ឬមិនទទួលយកនោះ គឺរដ្ឋាភិបាលមិនអាចបង្ខំភាគីណាមួយឡើយ ដោយអាចគ្រាន់តែចូលរួមលើកទឹកចិត្តឱ្យមានការដោះស្រាយដោយសន្តិវិធី។ វិធានការរបស់តុលាការទៅលើមេដឹកនាំសហជីព គឺជាសិទ្ធិអំណាចរបស់តុលាការ ដែលផ្អែកទៅលើអង្គហេតុ និងអង្គច្បាប់នៃបទល្មើស។
លោកបញ្ជាក់ថា៖ «ការចាប់ខ្លួនថ្នាក់ដឹកនាំនេះ គឺជាការងាររបស់តុលាការ។ វាមិនស្ថិតក្នុងបរិបទវិវាទការងារនោះទេ វាស្ថិតក្នុងបរិបទច្បាប់នោះឯង។ អាស្រ័យហេតុដូច្នេះ ILO គួរតែពិចារណាបន្តិចពីរឿងច្បាប់ ហើយទុកឱ្យតុលាការជាអ្នកមានចំណាត់ការ និងស្វែងរកអង្គហេតុ ភ័ស្តុតាង ហើយនិងអង្គច្បាប់»។
កាលពីថ្ងៃទី ៦ មករា ក្រសួងការងារ និងបណ្តុះបណ្តាលវិជ្ជាជីវៈ បន្តទទូចឱ្យអតីតកម្មករដែលក្រុមហ៊ុនបានបញ្ឈប់នាពេលកន្លងទៅឱ្យទៅចូលរួមប្រជុំពិនិត្យផ្ទៀងផ្ទាត់ឡើងវិញនូវការទូទាត់ប្រាក់បំណាច់បញ្ចប់កិច្ចសន្យាការងារក្នុងគោលបំណងឈានទៅរកការបញ្ចប់វិវាទការងារ។ ប៉ុន្តែគិតត្រឹមថ្ងៃទី ១១ មករា ឆ្នាំ ២០២២ មានកម្មករមួយចំនួនតូចប៉ុណ្ណោះ ដែលយល់ព្រមទទួលលក្ខខណ្ឌនេះ ខណៈកម្មករដទៃទៀតនៅតែបន្តការតវ៉ាទាមទារចូលធ្វើការវិញក្នុងនោះទាមទារឱ្យមានការដោះលែងថ្នាក់ដឹកនាំរបស់ពួកគេ។ ការតវ៉ារបស់កម្មករបានចាប់ផ្តើមតាំងពីពាក់កណ្តាលខែធ្នូឆ្នាំ ២០២១។
លោក ហេង សួរ អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ ឱ្យដឹងថា គិតត្រឹមថ្ងៃទី ១១ មករា គឺមានអតីតបុគ្គលិកចំនួន ៨ នាក់បានទៅទទួលយកសំណងពីក្រុមហ៊ុន ក្រោយពីក្រុមហ៊ុនបានកែសម្រួល ការគណនា ការទូទាត់ប្រាក់បំណាច់បញ្ចប់កិច្ចសន្យាតាមមន្ត្រីអធិការកិច្ចការងារ។
លោកបញ្ជាក់ថា៖ «តាមច្បាប់និងនីតិវិធីរាល់សំណើដែលពាក់ព័ន្ធជាមួយនឹងអត្ថប្រយោជន៍របស់បងប្អូន កម្មករ និយោជិត គឺក្រសួងនៅតែបន្តរង់ចាំពន្យល់អំពីមូលដ្ឋានគណនា និងសម្របសម្រួលកិច្ចប្រជុំរវាងភាគីទាំង ២ បើទោះបីជាហួសពីនីតិវិធីក្រសួង ក៏ដោយ។ ដោយឡែកអ្វីដែលពាក់ព័ន្ធជាមួយនឹងសិទ្ធិ គឺតាមច្បាប់ ភាគីទាំង ២ គួរទៅបញ្ចប់នៅស្ថាប័នតុលាការ»៕
វីដេអូ៖
