ប៉ៃលិនៈ ក្រុមការងារអន្តរក្រសួងដែលបានបង្កើតឡើង ដើម្បីស៊ើបអង្កេតករណីបណ្តេញមន្ត្រីសុខាភិបាលខេត្តប៉ៃលិនម្នាក់ចេញពីក្របខ័ណ្ឌរដ្ឋនៅថ្ងៃទី ១១ មករា បានចុះប្រមូលព័ត៌មានពីភាគីពាក់ព័ន្ធ ដើម្បីធ្វើរបាយការណ៍ដាក់ជូនគណៈកម្មការថ្នាក់ជាតិ និងរដ្ឋមន្ត្រីក្រសួងមុខងារសាធារណៈជាអ្នកសម្រេច។
ការចុះប្រមូលព័ត៌មាននេះបានធ្វើឡើង បន្ទាប់ពីក្រសួងមុខងារសាធារណៈបានបង្កើតក្រុមការងារអន្តរក្រសួង ដែលមានសមាសភាពមកពីក្រសួងមុខងារសាធារណៈ ក្រសួងមហាផ្ទៃ និងក្រសួងសុខាភិបាល ដើម្បីស៊ើបអង្កេតករណីនេះ ក្រោយទទួលបានពាក្យបណ្តឹងមិនសុខចិត្តពីសាមីខ្លួនទៅនឹងការសម្រេចរបស់រដ្ឋបាលខេត្តប៉ៃលិន។
លោក សួន រស្មី អគ្គាធិការ និងជាអនុប្រធានប្រចាំការនៃក្រុមការងារអន្តរក្រសួង ពិនិត្យស្រាវជ្រាវករណីបណ្តឹងតវ៉ានេះបានប្រាប់ភ្នំពេញប៉ុស្តិ៍នៅថ្ងៃទី ១១ មករាថា ប្រធានក្រុមការងារអន្តរក្រសួង ដែលដឹកនាំដោយលោក ហង្ស ឆាំឆាន បានដឹកនាំក្រុមការងារចុះទៅប្រមូលព័ត៌មានពីគ្រប់ភាគីពាក់ព័ន្ធនៅក្នុងវិវាទនេះ។ ការចុះប្រមូលព័ត៌មាន និងចុះស្រាវជ្រាវនេះកំពុងបន្តដោយក្រុមការងារអន្តរក្រសួងត្រូវការពេលវេលា និងព័ត៌មានឱ្យបានគ្រប់ជ្រុងជ្រោយបន្ថែមទៀត ដើម្បីធ្វើរបាយការណ៍ដាក់ជូនគណៈកម្មការថ្នាក់ជាតិ និងរដ្ឋមន្ត្រីក្រសួងមុខងារសាធារណៈធ្វើការសម្រេចតាមក្រោយ។
យ៉ាងណាក្តី លោក សួន រស្មី បញ្ជាក់ថា៖ «ខ្ញុំ មិនអាចផ្តល់ព័ត៌មានអ្វីកើតទេ ព្រោះការងារនេះ ឯកឧត្តមប្រធានលោកអ្នកសម្រេចទាក់ទងនឹងព័ត៌មានដែលប្រមូលបានទាំងអស់នេះ ហើយយើងនឹងមានព័ត៌មានសម្រេចនៅពេលក្រោយ។
ខ្ញុំមិនហ៊ានធានាថា នឹងត្រូវចំណាយពេលប៉ុន្មាននោះទេ ដោយគ្រាន់តែបញ្ជាក់ថា គឺយើងនឹងប្រមូលព័ត៌មានឱ្យបានគ្រប់ជ្រុងជ្រោយ ធ្វើម៉េចឱ្យស្របតាមការអនុវត្តលិខិតបទដ្ឋាន និងច្បាប់ជាធរមាន»។
បើតាម សួន រស្មី នៅថ្ងៃទី ១១ មករា ក្រុមការងារអន្តរក្រសួងបានជួបជាមួយភាគីមន្ទីរសុខាភិបាលខេត្ត មន្ត្រីតំណាងមកពីសាលាខេត្តប៉ៃលិន និងលោក ខឹម មុនីកុសល ដោយការជួបគ្នានេះ គឺធ្វើឡើងម្តងម្នាក់ៗស្របតាមនីតិវិធីច្បាប់។
កាលពីខែឧសភា លោក ខឹម មុនីកុសល ជាគ្រូពេទ្យ ដែលត្រូវបានបណ្តេញចេញពីក្របខ័ណ្ឌក្រោមហេតុផលបានប្រព្រឹត្តកំហុសក្នុងពេលបំពេញការងារ បានដាក់ពាក្យបណ្តឹងទៅរដ្ឋមន្ត្រីក្រសួងមុខងារសាធារណៈ ដើម្បីស្នើឱ្យស្ថាប័នមួយនេះជួយរកយុត្តិធម៌ និងអន្តរាគមន៍ឱ្យលោកបានចូលបម្រើការងារក្នុងក្របខ័ណ្ឌមន្ត្រីសុខាភិបាលឡើងវិញ។
លោក ខឹម មុនីកុសល បានប្រាប់ភ្នំពេញប៉ុស្តិ៍បន្ទាប់ពីបានផ្តល់ព័ត៌មានជូនក្រុមការងារអន្តរក្រសួងនៅថ្ងៃទី ១១ មករា ដោយមិនទាន់អាចសន្និដ្ឋានបានថា ក្រុមការងារអន្តរក្រសួងនេះនឹងអាចផ្តល់យុត្តិធម៌ដល់លោកកម្រិតណានោះទេ។
ប៉ុន្តែលោក នៅតែជឿជាក់ថា ក្រុមការងារអន្តរក្រសួងនេះនឹងផ្តល់ដំណោះស្រាយមួយដែលអាចទទួលយកបាន ខណៈដែលការបណ្តេញលោកចេញពីក្របខ័ណ្ឌការងារ គឺធ្វើឡើងមិនត្រឹមត្រូវ ហើយលោកមិនបានប្រព្រឹត្តកំហុសដូចការចោទប្រកាន់នោះទេ។
លោកបញ្ជាក់ថា៖ «ខ្ញុំសូមអង្វរដល់ក្រុមការងារអន្តរក្រសួង ដែលមានភារកិច្ចដូចមានចែងក្នុងសេចក្តីសម្រេច ចុះថ្ងៃទី ២៣ ធ្នូ ២០២១ ដោះស្រាយដោយផ្អែកលើអង្គហេតុ លិខិតបទដ្ឋាន ច្បាប់ជាធរមាន និងប្រកបដោយវិជ្ជាជីវៈ ដោយមិនស្ថិតក្រោមអំណាចបុគ្គល។ ការដោះស្រាយប្រកបដោយយុត្តិធម៌ វាជាការរួមចំណែកក្នុងការអនុវត្តកំណែទម្រង់ស៊ីជម្រៅរបស់រាជរដ្ឋាភិបាល និងបញ្ជាក់ថា ស្ថាប័នរដ្ឋមិនស្ថិតនៅក្រោមអំណាចបុគ្គល»។
លោក អ៊ុន ប៊ុនលី នាយករដ្ឋបាលខេត្តប៉ៃលិនបានលើកឡើងថា រដ្ឋបាលខេត្តប៉ៃលិនបានចូលរួមផ្តល់ព័ត៌មានទៅកាន់ក្រុមការងារអន្តរក្រសួងនេះរួចហើយ។ ជាមួយនឹងនីតិវិធីយ៉ាងណាទៀតនោះ គឺជាការសម្រេចរបស់ថ្នាក់លើ ខណៈលោកនៅតែអះអាងថា ការសម្រេចរបស់រដ្ឋបាលខេត្ត គឺធ្វើឡើងត្រឹមត្រូវ និងស្របតាមនីតិវិធីច្បាប់។ លោកបញ្ជាក់ថា៖ «យើងឃើញថា អន្តរក្រសួង លោកធ្វើតាមនីតិវិធីច្បាប់ហើយ ដើម្បីទទួលបានព័ត៌មានគ្រប់ជ្រុងជ្រោយពីភាគីពាក់ព័ន្ធ ហើយបើមានការសម្រេចយ៉ាងណាពីពួកគាត់ យើងនឹងគោរពតាម»។
កាលពីថ្ងៃទី ១៩ មីនា លោកស្រី បាន ស្រីមុំ អភិបាលខេត្តប៉ៃលិនបានចេញលិខិតបណ្ដេញលោក ខឹម មុនីកុសល ចេញពីក្របខ័ណ្ឌរដ្ឋដោយសំអាងថា លោកបានប្រព្រឹត្តកំហុស និងការឆ្គាំឆ្គងក្នុងវិជ្ជាជីវៈ។ ការបណ្តេញនេះ ព្រោះតែលោកបានបង្ហោះសារលើហ្វេសប៊ុករិះគន់មន្ត្រីស្ថាប័នពាក់ព័ន្ធដែលចុះប្រចាំការនៅមណ្ឌលចត្តាឡីស័កនៅមន្ទីរបក្សខេត្តប៉ៃលិនថា មិនជួយធ្វើការងារគ្រូពេទ្យខ្លះនោះទេ ហើយគិតតែពីនាំគ្នាអង្គុយលេងតែ Facebook ក្នុងតង់ ហើយថតរូបបង្ហោះបង្អួតគេឯង៕