ភ្នំពេញៈ គិតត្រឹមថ្ងៃទី ៩ ខែមករា ឆ្នាំ ២០២២ ក្រុមប្រឹក្សាឃុំសង្កាត់ (កបឃ.ស) ទូទាំងប្រទេសបានទទួលពាក្យបណ្តឹងពីប្រជាពលរដ្ឋសរុបចំនួន ១៥ បណ្តឹងក្នុងដំណាក់កាលនៃការបិទផ្សាយបញ្ជីបោះឆ្នោតដំបូង និងបញ្ជីឈ្មោះអ្នកបោះឆ្នោតដែលនឹងត្រូវលុបចេញពីបញ្ជីបោះឆ្នោត សម្រាប់ឆ្នាំ ២០២១ បន្ទាប់ពីបិទផ្សាយកាលពីថ្ងៃទី ៣ ខែមករា ឆ្នាំនេះ។
តាមសេចក្តីប្រកាសព័ត៌មានរបស់គណៈកម្មាធិការជាតិរៀបចំការបោះឆ្នោត (គជប) កាលពីថ្ងៃទី ១០ ខែមករា ឆ្នាំ ២០២២ បានឱ្យដឹងថា ក្នុងដំណាក់កាលបិទផ្សាយបញ្ជីបោះឆ្នោតដំបូង និងបញ្ជីឈ្មោះអ្នកបោះឆ្នោតដែលនឹងត្រូវលុបចេញពីបញ្ជីបោះឆ្នោតឆ្នាំ ២០២១ ក្រុមប្រឹក្សាឃុំសង្កាត់ (កបឃ.ស) ទូទាំងប្រទេសបានទទួលពាក្យបណ្តឹងសរុបចំនួន ១៥ បណ្តឹង ដែលសុទ្ធសឹងតែជាពាក្យបណ្តឹងតវ៉ា។ ដោយឡែកនៅថ្នាក់ គ.ជ.ប និងនៅថ្នាក់ក្រុមប្រឹក្សាធម្មនុញ្ញពុំទាន់ទទួលបានពាក្យបណ្តឹងណាមួយឡើយ។
សេចក្តីប្រកាសព័ត៌មាននេះបន្តថា ការដាក់ ការទទួល និងការដោះស្រាយពាក្យបណ្តឹង ក្នុងដំណាក់កាលនៃការបិទផ្សាយបញ្ជីបោះឆ្នោតដំបូង និងបញ្ជីឈ្មោះអ្នកបោះឆ្នោតដែលនឹងត្រូវលុបចេញពីបញ្ជីបោះឆ្នោតឆ្នាំ ២០២១ មាន ៣ ដំណាក់កាលរួមមាន៖១- ការដាក់ការទទួលពាក្យបណ្តឹងនៅ (កបឃ.ស) មានរយៈពេល ១០ ថ្ងៃយ៉ាងយូរ បន្ទាប់ពីថ្ងៃបិទផ្សាយបញ្ជីបោះឆ្នោតដំបូង និងការដោះស្រាយពាក្យបណ្ដឹងមានរយៈពេល ៣ ថ្ងៃយ៉ាងយូរ បន្ទាប់ពីថ្ងៃបានទទួលពាក្យបណ្តឹង។
ទី ២- ការដាក់ការទទួលពាក្យបណ្ដឹងនៅ គ.ជ.ប មានរយៈពេល ៥ ថ្ងៃយ៉ាងយូរ បន្ទាប់ពីថ្ងៃបានទទួលសម្រង់សេចក្តីសម្រេច (ទ.១២០៣) របស់ (កបឃ.ស) និងការដោះស្រាយពាក្យបណ្តឹងរយៈពេល ៥ ថ្ងៃយ៉ាងយូរ បន្ទាប់ពីថ្ងៃបានទទួលពាក្យបណ្តឹង និងទី ៣- ការដាក់ ការទទួលពាក្យបណ្តឹងនៅក្រុមប្រឹក្សាធម្មនុញ្ញមានរយៈពេល ៥ ថ្ងៃយ៉ាងយូរ បន្ទាប់ពីថ្ងៃបានទទួលសម្រង់សេចក្ដីសម្រេច (ទ.១២០៣) របស់ គ.ជ.ប និងការដោះស្រាយពាក្យបណ្ដឹងរយៈពេល ១០ ថ្ងៃយ៉ាងយូរ បន្ទាប់ពីថ្ងៃបានទទួលពាក្យបណ្ដឹង។
លោក សោម សូរីដា អ្នកនាំពាក្យ គ.ជ.ប ប្រាប់ភ្នំពេញប៉ុស្តិ៍នៅថ្ងៃទី ១១ មករា ឆ្នាំ ២០២២ ថា ក្នុងដំណាក់កាលបិទផ្សាយបញ្ជីបោះឆ្នោតដំបូង និងបញ្ជីឈ្មោះអ្នកបោះឆ្នោតដែលនឹងត្រូវលុបចេញពីបញ្ជីនេះមានច្រកចំនួន ២ដើម្បីធ្វើឱ្យប្រជាពលរដ្ឋមានភាពងាយស្រួលក្នុងការពិនិត្យមើលឈ្មោះរបស់ខ្លួនគឺទី ១- បិទផ្សាយនៅទីតាមឃុំសង្កាត់ និងទីប្រជុំណាមួយនៅក្នុងឃុំសង្កាត់ និងទី ២ បង្ហោះលើគេហទំព័ររបស់ គ.ជ.ប។
លោកបានបន្តថា ចំពោះការទទួលបានពាក្យបណ្ដឹងចំនួន ១៥ ពីប្រជាពលរដ្ឋនេះដោយសារតែ គ.ជ.ប បានចុះឈ្មោះបោះឆ្នោតមិនមានជំទាស់ និងកំហុសតិចតួច ជាពិសេស គ.ជ.ប មានបទពិសោធធ្វើកិច្ចការនេះបានល្អប្រសើរ។
លោកថ្លែងថា៖ «បណ្តឹងទាំង ១៥ ករណីនេះទាក់ទងនឹងការតវ៉ាហើយការតវ៉ានេះគឺប្រជាពលរដ្ឋរកមិនឃើញឈ្មោះរបស់គាត់នៅក្នុងបញ្ជីបោះឆ្នោត។ យ៉ាងណាក៏ដោយ ១៥ ករណីនេះមាន ២ ករណីដកពាក្យបណ្តឹងវិញ ដូច្នេះមានតែ ១៣ ករណីទេ ដែលពលរដ្ឋប្តឹងតវ៉ារក្សាឈ្មោះរបស់គាត់»។
បើតាមលោក សោម សូរីដា ក្រុមប្រឹក្សាឃុំសង្កាត់ (កបឃ.ស) បានទទួលយកបណ្តឹងទាំងនេះដោយសម្រេចរក្សាឈ្មោះរបស់ពួកគាត់នៅក្នុងបញ្ជីបោះឆ្នោតឡើងវិញទាំងអស់។
លោក សំ សុគន្ធាមី នាយកប្រតិបត្តិអង្គការអព្យាក្រឹត និងយុត្តិធម៌ដើម្បីការបោះឆ្នោតនៅកម្ពុជា (NICFEC) ថ្លែងនៅថ្ងៃទី ១១ ខែមករា ថា ការបិទផ្សាយបញ្ជីបោះឆ្នោតដំបូង និងបញ្ជីឈ្មោះអ្នកបោះឆ្នោតដែលនឹងត្រូវលុបចេញពីបញ្ជីបោះឆ្នោតឆ្នាំ ២០២១ របស់ គ.ជ.ប នៅអំឡុងពេលនេះគឺដើម្បីឱ្យប្រជាពលរដ្ឋតវ៉ា ប៉ុន្តែតាមការសង្កេតជាក់ស្តែង ប្រជាពលរដ្ឋមិនសូវចាប់អារម្មណ៍ក្នុងការទៅពិនិត្យនោះទេ។
លោកយល់ថា ដោយមូលហេតុនេះហើយបានធ្វើឱ្យ គ.ជ.ប ទទួលបានពាក្យបណ្តឹងតវ៉ាពីប្រជាពលរដ្ឋមានចំនួនតិច។
ប្រជាពលរដ្ឋមួយចំនួនធំប្រាប់លោកថា មិនបាច់ទៅពិនិត្យបញ្ជីឈ្មោះរបស់ខ្លួន ក៏អាចដឹងពីគណបក្សណាជាប់ឆ្នោតបាត់ទៅហើយ។
លោកថ្លែងថា៖ «គេអត់សូវទៅមើល។ មូលហេតុគឺប្រជាពលរដ្ឋគាត់អត់សូវយកចិត្តទុកដាក់។ ខ្ញុំជួបសម្ភាសគាត់ហើយនៅតាមបណ្តាខេត្តដែលខ្ញុំចុះទៅ ខ្ញុំសួរគាត់ថា មានទៅមើលឈ្មោះគេបិទបញ្ជីដំបូងទេ គាត់ឆ្លើយថា មិនបាច់ទៅមើលទេ គេបោះឆ្នោត គឺដឹងអ្នកឈ្នះ អ្នកចាញ់ហើយហ្នឹង»។
គណៈកម្មាធិការជាតិរៀបចំការបោះឆ្នោត (គជប) កាលពីថ្ងៃទី ៣ ខែមករា ឆ្នាំ ២០២២ បានបិទផ្សាយបញ្ជីបោះឆ្នោតដំបូង និងបញ្ជីឈ្មោះអ្នកបោះឆ្នោតដែលនឹងត្រូវលុបចេញពីបញ្ជីបោះឆ្នោតសម្រាប់ឆ្នាំ ២០២១ រហូតដល់ថ្ងៃទី ១៤ ខែមករា ឆ្នាំ ២០២២ ដើម្បីឱ្យប្រជាពលរដ្ឋទៅពិនិត្យមើលឱ្យប្រាកដថា ពួកគាត់មានឈ្មោះ និងទិន្នន័យនៅក្នុងបញ្ជីបោះឆ្នោតត្រឹមត្រូវ និងអាចប្តឹងតវ៉ាបាន បន្ទាប់ពីពិនិត្យមើលឃើញមានភាពមិនប្រក្រតីណាមួយកើតឡើង៕