.jpg)
សមត្ថកិច្ចក្នុងខេត្តតាកែវដុតជ្រូកដែលងាប់ ដោយសារកើតជំងឺប៉េស្តជ្រូកពីខែមិថុនា ២០២១។ រូបថត សហការី
ភ្នំពេញៈ មន្ត្រីជាន់ខ្ពស់នៃអគ្គនាយកដ្ឋានសុខភាពសត្វ និងផលិតកម្មសត្វបាននិយាយថា កម្ពុជានៅតែបន្តរឹតបន្តឹងការនាំចូលសត្វជ្រូករស់ពីក្រៅប្រទេស ពិសេសពីប្រទេសវៀតណាម និងប្រទេសថៃដែលកំពុងផ្ទុះឡើងនូវជំងឺប៉េស្តជ្រូកអាហ្វ្រិក ដែលអាចនឹងបង្កការឆ្លងរីករាលដាលដល់សត្វជ្រូករបស់ប្រជាកសិករនៅក្នុងស្រុក។
លោក តាន់ ផាន់ណារ៉ា អគ្គនាយកនៃអគ្គនាយកដ្ឋានសុខភាពសត្វ និងផលិតកម្មសត្វបានប្រាប់ភ្នំពេញប៉ុស្តិ៍នៅថ្ងៃទី ១០ ខែមករាថា បច្ចុប្បន្ននៅប្រទេសវៀតណាម និងប្រទេសថៃមានផ្ទុះជំងឺប៉េស្តជ្រូកអាហ្វ្រិក និងជំងឺត្រចៀកខៀវ។ ជុំវិញករណីនេះ ក្រសួងកសិកម្ម រុក្ខាប្រមាញ់ និងនេសាទ បានណែនាំដល់មន្ទីរអង្គភាពពាក់ព័ន្ធបន្តធ្វើការត្រួតពិនិត្យ និងរឹតបន្តឹងការនាំចូលសត្វជ្រូករស់ពីក្រៅប្រទេស ដើម្បីចូលរួមការពារផលប្រយោជន៍ប្រជាកសិករនៅក្នុងស្រុក និង ដើម្បីពង្រឹងដល់សន្តិសុខស្បៀងនៅកម្ពុជា។ លោកបញ្ជាក់ថា៖ «ដោយមានការចូលរួមពីគ្រប់ភាគីពាក់ព័ន្ធក្នុងរយៈពេល ២ ឆ្នាំនេះ [២០២០-២០២១] ប្រទេសកម្ពុជាមិនមានករណីផ្ទុះឆ្លងជំងឺប៉េស្តជ្រូកអាហ្វ្រិកនោះទេ បើទោះជាមានករណីនាំចូលសត្វជ្រូករស់ពីប្រទេសថៃដែលត្រូវបានរកឃើញមានផ្ទុកជំងឺប៉េស្តជ្រូកអាហ្វ្រិករាប់រយក្បាលក៏ដោយ»។
បើតាមលោក ផាន់ណារ៉ា នៅក្នុងចន្លោះខែសីហា ឆ្នាំ ២០១៨ ដល់ខែមិថុនា ឆ្នាំ ២០១៩ ប្រទេសកម្ពុជាមានផ្ទុះករណីជំងឺប៉េស្តជ្រូកអាហ្វ្រិក នៅតាមបណ្ដាខេត្តមួយចំនួន ជាប់ព្រំប្រទល់ប្រទេសវៀតណាម។ សត្វជ្រូកប្រមាណ ៤០០ ក្បាល ត្រូវបានគេរកឃើញមានផ្ទុកជំងឺប៉េស្តជ្រូកអាហ្វ្រិក និងបានងាប់ជាបន្តបន្ទាប់ ហើយក្រុមមន្ត្រីជំនាញបានដុតកម្ទេចចោល និងបានណែនាំឱ្យម្ចាស់កសិដ្ឋានធ្វើការសម្អាតអនាម័យ នៅក្នុងកសិដ្ឋានរបស់ពួកគេ។ ទន្ទឹមនឹងនេះ ក្រសួងកសិកម្មបានណែនាំដល់អាជ្ញាធរខេត្ត និងមន្ទីរអង្គភាពពាក់ព័ន្ធ បង្កើនការត្រួតពិនិត្យ និងរឹតបន្តឹងការនាំចូលសត្វជ្រូករស់ពីក្រៅប្រទេស។
លោក ផាន់ណារ៉ា បានឱ្យដឹងផងដែរថានៅចន្លោះខែកុម្ភៈ ដល់ដើមខែមិថុនា ឆ្នាំ ២០២១ ក្រុមមន្ត្រីជំនាញផ្នែកបង្ក្រាបបទល្មើសចលនាសត្វចល័តនៃអគ្គនាយកដ្ឋានសុខភាពសត្វ និងផលិតកម្មសត្វបានសហការជាមួយអាជ្ញាធរខេត្ត នៅតាមជួរព្រំដែន កម្ពុជា-ថៃ និងកម្ពុជា-វៀតណាម បានធ្វើការបង្ក្រាបចាប់រឹបអូស និងដុតកម្ទេចចោលនូវសត្វជ្រូករស់ ដែលមានផ្ទុកជំងឺប៉េស្តជ្រូកអាហ្វ្រិកសរុប ១៩០ ក្បាល ដែលនាំចូលពីប្រទេសថៃ។
ជុំវិញការរឹតបន្តឹងការនាំចូលសត្វជ្រូករស់ពីក្រៅប្រទេសនេះ លោក ស្រ៊ុន ពៅ ប្រធានសមាគមចិញ្ចឹមសត្វកម្ពុជាបានប្រាប់ភ្នំពេញប៉ុស្តិ៍ថា វិធានការនេះបានជួយពង្រឹង និងលើកកម្ពស់ជីវភាពរស់នៅដល់កសិករដែលជាអ្នកចិញ្ចឹមសត្វនៅកម្ពុជា។
លោកថ្លែងថា៖ «នៅពេលនេះ អ្នកចិញ្ចឹមជ្រូកនៅក្នុងស្រុកកំពុងត្រូវប៉ាន់ដោយតម្លៃសត្វជ្រូករស់បានកើនឡើងក្នុងចន្លោះពី ១០ ៥០០ រៀល ដល់ ១១ ០០០ រៀលក្នុង ១ គីឡូក្រាម ហើយក្នុងរដូវបុណ្យចូលឆ្នាំចិន ខាងមុខនេះ វានឹងបន្តកើនឡើងដល់ ១៣ ០០០ រៀលក្នុង ១ គីឡូក្រាម»។
បើតាមលោក ស្រ៊ុន ពៅ កាលពីពេលថ្មីៗនេះ ក្រុមអ្នកចិញ្ចឹមជ្រូកនៅកម្ពុជាបានសម្ដែងក្ដីព្រួយកង្វល់ពីបញ្ហាជំងឺ ប៉េស្តជ្រូក ដែលកំពុងផ្ទុះឡើងជាច្រើនកន្លែងក្នុងប្រទេសវៀតណាម និងប្រទេសថៃ ខណៈមានករណីពាណិជ្ជករមួយចំនួនបានលួចនាំចូលសាច់សត្វពីក្រៅប្រទេស។
ជុំវិញបញ្ហានេះ លោក សាន់ ចាន់ថេត ប្រធានសមាគមអ្នកផ្គត់ផ្គង់សត្វជ្រូកកម្ពុជា បានប្រាប់ភ្នំពេញប៉ុស្តិ៍ថា ក្នុងរយៈពេល ២-៣ ខែកន្លងមកនេះ គ្មានសមាជិកអ្នកផ្គត់ផ្គង់សត្វជ្រូកកម្ពុជាណាម្នាក់នាំចូលសត្វជ្រូកពីក្រៅប្រទេសនោះទេ។
លោកបញ្ជាក់ថា៖ «យើងបានឯកភាពគ្នារួចហើយថា ផ្អាកការនាំចូលសត្វជ្រូករស់ពីក្រៅប្រទេស ជាបណ្ដោះអាសន្ន ដើម្បីគាំទ្រលើកទឹកចិត្តដល់អ្នកចិញ្ចឹមសត្វជ្រូកនៅក្នុងស្រុករបស់យើង»។
បើតាមលោក ចាន់ថេត បច្ចុប្បន្នកម្ពុជានៅមិនទាន់មានលទ្ធភាពនៅក្នុងការផលិតសត្វជ្រូក សម្រាប់ការនាំចេញដូចប្រទេសជិតខាងថៃ និងវៀតណាមនោះទេ ប៉ុន្តែកម្ពុជាមានសមត្ថភាពគ្រប់គ្រាន់ នៅក្នុងការចិញ្ចឹម និងផ្គត់ផ្គង់សត្វជ្រូក ដែលមានសុវត្ថិភាពសម្រាប់អ្នកបរិភោគនៅក្នុងទូទាំងប្រទេសហើយ៕
