.jpg)
ក្រុមគ្រួសារដែលបានស្លាប់ និងជនល្មើសពេលចាប់ខ្លួនពីខែឧសភា ឆ្នាំមុន។ រូបថត CPU
កំពង់ឆ្នាំងៈ សាលាដំបូងខេត្តកំពង់ឆ្នាំង បានប្រកាសសាលក្រមផ្តន្ទាទោសបុរសម្នាក់ឱ្យជាប់ពន្ធនាគារអស់១ជីវិតពាក់ព័ន្ធករណីសម្លាប់សមាជិកគ្រួសារ ៥ នាក់ មានប្រពន្ធ និងកូនៗ ហើយបានចាត់ទុកបទល្មើសនេះថា ពោរពេញដោយភាពឃោរឃៅ និងព្រៃផ្សៃ ដែលសមស្របជាមួយទម្ងន់ទោសដែលខ្ពស់បំផុត។
ការប្រកាសសាលក្រមនេះត្រូវបានធ្វើឡើងកាលពីថ្ងៃទី ១២ ខែមករា ឆ្នាំ ២០២២ បន្ទាប់ពីបុរសអាយុ ៣៩ ឆ្នាំ ឈ្មោះ នន់ ចាន់សារ៉េត បានសម្លាប់ប្រពន្ធ និងកូនៗរបស់ខ្លួនចំនួន ៤ នាក់ទៀត ដែលមានអាយុ ៩ ឆ្នាំ, ៧ ឆ្នាំ (កូនភ្លោះ), និង ៣ ឆ្នាំ ប្រព្រឹត្តកាលពីថ្ងៃទី ៩ ខែឧសភា ឆ្នាំ ២០២១។
ក្រុមការងារស៊ើបអង្កេតបទល្មើសឃាតកម្ម (HIT) និងក្រុមការងារបច្ចេកទេសវិទ្យាសាស្ត្រ (FST) នៃអង្គភាពការពារកុមារ (CPU) ដែលបានចូលរួមជាវត្តមាននៅក្នុងបន្ទប់សវនាការនៃសាលាដំបូងខេត្តកំពង់ឆ្នាំង ដើម្បីស្តាប់ការប្រកាសសាលក្រមនេះ ចំពោះជនល្មើសរូបនេះបានឱ្យដឹងនៅលើទំព័រហ្វេសប៊ុកកាលពីថ្ងៃទី ១២ មករាថា ឃាតករត្រូវបានចោទប្រកាន់ពីបទមនុស្សឃាតដោយគិតទុកមុន តាមមាត្រា ២០០ នៃក្រមព្រហ្មទណ្ឌ។
ក្នុងពេលប្រកាសសាលក្រម លោកចៅក្រម អ៊ី ថាវរៈ បានមានប្រសាសន៍ថា៖ “បទល្មើសទាំងនេះគឺពោរពេញដោយភាពឃោរឃៅ និងព្រៃផ្សៃ ហើយសមស្របជាមួយទម្ងន់ទោសដែលខ្ពស់បំផុត”។ នេះបើតាមទំព័រហ្វេសប៊ុកដដែល ដែលបានដកស្រង់សម្តីរបស់ចៅក្រម ក្នុងអំឡុងពេលសវនាការ។
ទំព័រហ្វេសប៊ុក CPU បានបញ្ជាក់ថា «នៅពេលនោះជនល្មើសត្រូវបានតុលាការផ្តន្ទាទោសជាប់ពន្ធនាគារអស់ ១ ជីវិត។ ទោសជាប់ពន្ធនាគារអស់១ជីវិតនៅក្នុងព្រះរាជាណាចក្រកម្ពុជាគឺមានន័យថា ជាប់ពន្ធនាគារអស់១ជីវិត ដោយគ្មានឱកាសក្នុងការលើកលែងទោស ឬនៅក្រៅការឃុំឃាំង»។
សូមជម្រាបថា បន្ទាប់ពីមានហេតុការណ៍អគ្គិភ័យនៅខេត្តកំពង់ឆ្នាំង បានកើតឡើងដែលបណ្តាលឱ្យមនុស្សស្រីម្នាក់ និងកុមារតូចៗចំនួន ៤ នាក់បានបាត់បង់ជីវិតកាលពីខែឧសភាឆ្នាំ ២០២១ មក ក្រុមការងារចម្រុះ “INDIA21” ក៏ត្រូវបានបង្កើតឡើង ដោយមានកិច្ចសហប្រតិបត្តិការរវាងអង្គភាពការពារកុមារ (CPU) ក្រសួងមហាផ្ទៃ ស្នងការដ្ឋាននគរបាលខេត្តកំពង់ឆ្នាំង នាយកដ្ឋានបច្ចេកទេស និងវិទ្យាសាស្ត្រ និងអគ្គស្នងការដ្ឋាននគរបាលជាតិកម្ពុជា ។ ក្រុមការងារនេះ បានធ្វើការជាបន្តបន្ទាប់អស់រយៈពេល ៣ ថ្ងៃ ដើម្បីប្រមូលគ្រប់ភ័ស្តុតាងដែលមាននៅកន្លែងកើតហេតុ និងពិគ្រោះយោបល់ជាមួយអ្នកជំនាញ ឯកទេសផ្នែកកោសល្យវិច័យសាកសព និងផ្នែកអគ្គិភ័យ និងសារធាតុផ្ទុះនៅប្រទេសអូស្ត្រាលីដើម្បីរៀបចំឡើងនូវសំណុំរឿងដែលល្អបំផុត ដើម្បីដាក់បន្ទុកលើជនល្មើស។
លោក James McCabe នាយកប្រតិបត្តិអង្គភាពការពារកុមារ (CPU) ដែលបានដឹកនាំការឆ្លើយតបរបស់ក្រុមការងារ CPU បាននិយាយថា ចាប់តាំងពី CPU បានធ្វើកោសល្យវិច័យសាកសព និងពិនិត្យកន្លែងកើតហេតុលើកដំបូង CPU បានយល់ឃើញថា មានចំណុចគួរឱ្យសង្ស័យជាច្រើន ហើយដំណើររឿងរបស់ជនសង្ស័យអំពីមូលហេតុផ្តើមអគ្គិភ័យ និងស្ថានភាពកន្លែងកើតហេតុគឺមិនសមស្របនឹងគ្នា។
លោកបានបញ្ជាក់ថា៖ «ការបាត់បង់ជីវិតរបស់កុមារជាច្រើននាក់បែបនេះគឺជាទង្វើដ៏ឃោរឃៅមួយ ដែលបានប៉ះពាល់ដល់យើងទាំងអស់គ្នា។ ខ្ញុំសូមថ្លែងអំណរគុណទៅដល់អ្នកទាំងអស់គ្នាដែលបានជួយក្នុងការស៊ើបអង្កេតមួយនេះ ដោយមានការប្តេជ្ញារបស់អ្នកទាំងអស់គ្នាទើបយើងអាចប្រមូលភ័ស្តុតាងដាក់បន្ទុកលើជនល្មើសចំពោះទង្វើដ៏ឃោរឃៅមួយនេះ»។
បន្ថែមពីនេះលោក ចាត់ទុកចំពោះចំណាត់ការលើករណីនេះថា ជាការបំពេញតួនាទីដ៏អស្ចារ្យមួយដោយមន្ត្រីនគរបាលខេត្តកំពង់ឆ្នាំង និងក្រសួងមហាផ្ទៃដែលបានធ្វើឱ្យប្រាកដថា កុមាររងគ្រោះ និងម្តាយរបស់ពួកគេបានទទួលនូវយុត្តិធម៌។
លោកបានបញ្ជាក់ទៀតថា៖ «នៅក្នុងថ្ងៃនេះ ឯកឧត្តម លោកចៅក្រម អ៊ី ថាវរៈ បានផ្តន្ទាទោសជនល្មើសជាមួយស្ថានទម្ងន់ទោសដែលសមស្របទៅនឹងទង្វើដែលគេបានប្រព្រឹត្ត ហើយខ្ញុំសូមថ្លែងអំណរគុណទៅដល់តុលាការ ជំនួសមុខឱ្យជនរងគ្រោះ និងក្រុមគ្រួសាររបស់គេ»។
ភ្នំពេញប៉ុស្តិ៍ បានព្យាយាមទាក់ទងទៅលោក ឡុង ស៊ីថា អ្នកនាំពាក្យអយ្យការអមសាលាដំបូងខេត្ត និងលោក ហុក គឹមហាក់ ប្រធានលេខាធិការដ្ឋានរដ្ឋបាលសាលាដំបូងខេត្តកំពង់ឆ្នាំងដែរ កាលពីថ្ងៃទី ១២ មករា ដើម្បីបញ្ជាក់ពីករណីនេះ ប៉ុន្តែលេខទូរស័ព្ទមិនអាចទាក់ទងបាន៕
វីដេអូ៖
