.jpg)
រថយន្តក្រឡុកស៊ីម៉ងត៍បើកតាមផ្លូវ ៣៧១ ក្នុងខណ្ឌមានជ័យ។ ហុង មិនា
ភ្នំពេញៈ ពលរដ្ឋលើកឡើងថា រថយន្តធុនធំចេញចូលរាជធានីភ្នំពេញនៅពេលថ្ងៃនៅមិនទាន់អនុវត្តឱ្យមានប្រសិទ្ធភាពនៅឡើយទេ ដែលបានបង្កឱ្យមានការកកស្ទះ និងគ្រោះថ្នាក់ចរាចរណ៍ ប៉ុន្តែអាជ្ញាធរថា នៅតែបន្តអនុវត្តហាមឃាត់ដោយមិនមានការបន្ធូរបន្ថយឡើយ ហើយក្នុងករណីមានការឆកល្វែង អាជ្ញាធរនឹងចាត់វិធានការបន្ថែមភ្លាមៗពេលទទួលបានព័ត៌មាន។
លោក ចូវ លី ប្រជាពលរដ្ឋម្នាក់នៅរាជធានីភ្នំពេញ ថ្លែងប្រាប់ភ្នំពេញប៉ុស្តិ៍នៅថ្ងៃទី ១១ មករាថា តាមរយៈការធ្វើដំណើរលើដងផ្លូវជារៀងរាល់ថ្ងៃ លោកកត់សម្គាល់ឃើញថា រថយន្តធុនធំ នៅតែមានការចេញចូល។ ពេលខ្លះលោកក៏បានឃើញករណីគ្រោះថ្នាក់ចរាចរណ៍បង្កដោយរថយន្តធុនធំ ដែលបណ្តាលឱ្យអ្នករងគ្រោះពិការដៃជើង និងមានអ្នកខ្លះស្លាប់ទៀតផង។
លោកថ្លែងថា៖ «ការគ្រប់គ្រងរថយន្តធុនធំចូលក្រុងតាមម៉ោងដែលបានកំណត់ ហាក់ឃើញនៅមិនទាន់មានប្រសិទ្ធភាពទេ។ រថយន្តធំៗទាំងនោះបានបណ្តាលឱ្យមានគ្រោះថ្នាក់ដល់អាយុជីវិតប្រជាពលរដ្ឋទាំងស្លាប់ទាំងពិការ។ កត្តាគ្រោះថ្នាក់ចរាចរណ៍ធ្វើឱ្យប៉ះពាល់ដល់សេដ្ឋកិច្ចគ្រួសារជនរងគ្រោះច្រើនណាស់»។
ក្នុងនាមប្រជាពលរដ្ឋដែលមានការព្រួយបារម្ភក្នុងការធ្វើដំណើរលើដងផ្លូវលោក ចូវ លី បានសំណូមពរឱ្យក្រុមហ៊ុនដឹកជញ្ជូនមានវិធានការច្បាស់លាស់ចំពោះអ្នកបើកបររថយន្តឱ្យគោរពច្បាប់ចរាចរណ៍ និងត្រូវបើកបរក្នុងល្បឿនដែលក្រសួងសាធារណការបានកំណត់ល្បឿននៅទីប្រជុំជន។ ជាមួយគ្នានោះ លោកក៏បានស្នើឱ្យអាជ្ញាធររាជធានីភ្នំពេញអនុវត្តច្បាប់ចេញ-ចូលក្រុងតាមម៉ោងដែលបានកំណត់ឱ្យមានប្រសិទ្ធភាពខ្ពស់ ហើយអនុវត្តឱ្យដូចភ្លៀងរលឹម កុំអនុវត្តបានតែមួយឆាវដូចភ្លើងចំបើង។ លោកថ្លែងថា៖ «សម្តេចពុកបានមានប្រសាសន៍ហើយពីកន្លងមក ច្បាប់មានចែងហើយមន្ត្រីដែលត្រូវអនុវត្តច្បាប់នាំគ្នាអនុវត្តទៅ។ ខ្ញុំបាទ សូមលើកទឹកចិត្តដល់បងប្អូនដែលប្រើប្រាស់ផ្លូវថ្នល់ សូមចូលរួមចំណែកគោរពច្បាប់ចរាចរណ៍ទាំងអស់គ្នា»។
លោក សុខ សុផាត ប្រជាពលរដ្ឋម្នាក់ទៀតនៅរាជធានី-ភ្នំពេញបាននិយាយថា ជាការកត់សម្គាល់របស់លោក តាមរយៈការធ្វើដំណើរនៅលើដងផ្លូវរាល់ថ្ងៃ គឺមានពេលខ្លះនៅតែឃើញមានរថយន្តធុនធំចេញ-ចូលនៅពេលថ្ងៃ។ រថយន្តទាំងនោះបានបើកបរក្នុងល្បឿនលឿនជាពិសេសនៅពេលថ្ងៃត្រង់។
លោកថ្លែងថា៖ «ខ្ញុំមានការបារម្ភចំពោះគ្រោះថ្នាក់ចរាចរណ៍ នៅពេលមានរថយន្តធុនធំបើកបរលឿនៗ ហើយពេលខ្លះខ្ញុំក៏បានឃើញគ្រោះថ្នាក់ចរាចរណ៍ផ្ទាល់ភ្នែកផងដែរ។ អ៊ីចឹងខ្ញុំចង់ឱ្យមានការរឹតបន្តឹងឱ្យបានខ្លាំងជាងនេះបន្ថែមទៀត»។
ជុំវិញករណីនេះ លោក ម៉េត ម៉ាសភក្តី អ្នកនាំពាក្យរដ្ឋបាលរាជធានីភ្នំពេញថ្លែងនៅថ្ងៃទី ១១ ខែមករាថា អាជ្ញាធររាជធានី-ភ្នំពេញនៅតែបន្តអនុវត្តការរឹតបន្តឹង ហាមឃាត់ មិនឱ្យរថយន្តធុនធំចេញចូលក្នុងក្រុងចន្លោះម៉ោង ៦ ព្រឹករហូតដល់ម៉ោង ៩ យប់។ លោកថា ប្រសិនបើមានករណីខ្វះចន្លោះ ហើយទទួលបានព័ត៌មានពីពលរដ្ឋនោះអាជ្ញាធរនឹងមានវិធានការភ្លាមៗបន្ថែមទៀតតាមជាក់ស្តែង។
លោកថ្លែងថា៖ «យើងអត់មានអីដែលធ្លាក់ដៃ ឬក៏ប្តូរយន្តការដែលទូលាយឡើងវិញគឺអត់ទេ គឺយើងនៅអនុវត្តដដែលទេ ប៉ុន្តែក្នុងករណីមានការឆកល្វែងគឺយើងចាត់វិធានការភ្លាម»។
លោក គឹម បញ្ញា នាយកអង្គការមូលនិធិបង្ការរបួសអាស៊ីប្រចាំកម្ពុជាថ្លែងថា លោកមិនបានធ្វើការស្រាវជ្រាវជុំវិញរឿងនេះទេ ប៉ុន្តែតាមអ្វីដែលលោកបានមើលឃើញក្នុងសេចក្តីរាយការណ៍របស់ប្រព័ន្ធសារព័ត៌មាន ឃើញថា ស្ថានភាពនៃរថយន្តចេញចូលក្រុងនៅពេលថ្ងៃ មិនសូវកើតមាននោះទេ។
លោកថ្លែងថា៖ «ជាទស្សនៈរបស់ខ្ញុំ ខ្ញុំសុំឱ្យរថយន្តប្រភេទធំៗ ជាពិសេសរថយន្តដែលយើងមើលឃើញជាក់ស្តែងហ្នឹងគឺប្រភេទរថយន្តដឹកស៊ីម៉ងត៍ លាយស៊ីម៉ងត៍ ក្រឡុកស៊ីម៉ងត៍ អីហ្នឹង សុំឱ្យគាត់ចេញចូលឱ្យបានមុនម៉ោង ៦ ព្រឹកទៅ ហើយចាំដល់ពេលផុតពីហ្នឹង ម៉ោងណាដែលយើងកំណត់ថា មិនសូវមានការកកស្ទះ មិនសូវមានហានិភ័យចាំបន្តដំណើរចេញចូលវិញ»៕
វីដេអូ៖
