.jpg)
អតីតមន្ត្រីយោធាផ្កាយ ២ ឈ្មោះ សូយ ចាន់សឿន ពាក់ព័ន្ធការសុំមោឃភាពនីតិវិធីដែលសាលាដំបូងរាជធានីភ្នំពេញ ចោទអំពើហិង្សាលើអ្នកកាន់កាប់អចលនវត្ថុ។ រូបថត គឹម សារុំ
ភ្នំពេញៈ តុលាការកំពូលនៅថ្ងៃទី ១២ មករា បានបើកសវនាការជំនុំជម្រះអតីតមន្ត្រីយោធាផ្កាយ ២ ឈ្មោះ សូយ ចាន់សឿន ពាក់ព័ន្ធការសុំមោឃភាពនីតិវិធីដែលសាលាដំបូងរាជធានីភ្នំពេញចោទអំពើហិង្សាលើអ្នកកាន់កាប់អចលនវត្ថុ ខណៈជនរូបនេះក៏កំពុងត្រូវបានឃុំខ្លួនក្នុងពន្ធនាគារខេត្តកំពង់ស្ពឺក្នុងបទល្មើសវាយមិត្តភកិ្តស្រីរបស់ខ្លួនម្នាក់កាលពីខែមករា ឆ្នាំ ២០២១ នៅខេត្តកំពង់ស្ពឺ។
ក្នុងបន្ទប់សវនាការនៅថ្ងៃទី ១២ មករា ដែលមានសមាសភាពចៅក្រម ៥ រូប និងមានលោក និល ណុន ជាប្រធានក្រុមប្រឹក្សាជំនុំជម្រះនោះ លោក ឈឺន សុខា ជាមេធាវីការពារសិទ្ធិឱ្យជនត្រូវចោទបានថ្លែងថា កូនក្តីរបស់លោកត្រូវបានឈ្មោះ កើត ខេង ជាដើមបណ្តឹងរដ្ឋប្បវេណីបានប្តឹងកូនក្តីលោកពាក់ព័ន្ធទំនាស់ដីមួយកន្លែងនៅភូមិស្រែអំពិល ឃុំឈើទាល ស្រុកកៀនស្វាយ ខេត្តកណ្តាល។ សំណុំរឿងនេះត្រូវបានតំណាងអយ្យការអមសាលាដំបូងរាជធានីភ្នំពេញចោទប្រកាន់បទប្រើហិង្សាទៅលើអ្នកកាន់កាប់អចលនវត្ថុដោយសុចរិត និងបរិហាកេរ្តិ៍ជាសាធារណៈ ហេតុដូច្នេះហើយទើបកូនក្តីរបស់លោកប្តឹងមោឃភាពនីតិវិធីលើបទចោទនេះ ដោយសារកូនក្តីរបស់លោកមិនសុខចិត្តនឹងបទចោទនេះក៏បានប្តឹងឧទ្ធរណ៍ហើយត្រូវបានសភាស៊ើបសួរសាលាឧទ្ធរណ៍បើកសវនាការជំនុំជម្រះកាលពីថ្ងៃទី ១៦ សីហា ឆ្នាំ ២០២១ និងប្រកាសសាលដីកានៅថ្ងៃទី ១៨ សីហា ឆ្នាំ ២០២១ សម្រេចច្រានចោលបណ្តឹងមោឃភាពនីតិវិធីនេះ និងតម្កល់ដីកាសម្រេចរបស់តំណាងអយ្យការសាលាដំបូងរាជធានីភ្នំពេញ។
លោកប្រាប់ចៅក្រមក្នុងអង្គសវនាការថា៖ «ខ្ញុំសូមស្នើដល់តុលាការកំពូលមេត្តាពិចារណាលើបណ្តឹងមោឃភាពនីតិវិធីរបស់កូនក្តីខ្ញុំ ព្រោះសំណុំរឿងដូចគ្នានេះក៏ត្រូវបានភាគីដើមបណ្តឹងប្តឹងនៅសាលាដំបូងខេត្តកណ្តាលដែរ»។
លោកមេធាវីបន្តថា កូនក្តីលោកបានទិញដីទំហំ ៤ ហិកតាចូលគ្នាជាមួយបុរសម្នាក់ទៀតនៅភូមិស្រែអំពិល ឃុំឈើទាល ស្រុកកៀនស្វាយ ខេត្តកណ្តាល។ បន្ទាប់មកបុរសម្នាក់នោះមានទំនាស់ជាមួយឈ្មោះ កើត ខេង ដែលអះអាងថា ដីនោះជាកម្មសិទ្ធិរបស់គាត់ដែរនោះបានប្តឹងទៅសាលាដំបូងខេត្តកណ្តាលហើយបច្ចុប្បន្នក៏តុលាការកំពុងដំណើរការនីតិវិធីដែរ។
លោក ចាន់ តារារស្មី តំណាងមហាអយ្យការបានធ្វើសេចក្តីសន្និដ្ឋានថា ក្រោយពីបានពិនិត្យមើលសំណុំរឿងមកលោកយល់ឃើញថា បណ្តឹងមោឃភាពរបស់ជនត្រូវចោទខុសនឹងគោលការណ៍ច្បាប់ «ដូច្នេះខ្ញុំស្នើសូមក្រុមប្រឹក្សាជំនុំជម្រះតម្កល់សាលដីការបស់សភាស៊ើបសួរសាលាឧទ្ធរណ៍ភ្នំពេញទុកជាបានការដដែល»។
លោកចៅក្រម និល ណុន បានថ្លែងថាសាលដីកានៃសំណុំរឿងនេះនឹងប្រកាសនៅថ្ងៃទី ១៩ មករា ២០២២៕
