រតនគិរីៈ សមាគមអភិរក្សដំរីខ្មែរអៃរាវត្ដា បានអំពាវនាវដល់សាធារណជនចូលរួមឧបត្ថម្ភលើកិច្ចការងារអភិរក្សដំរីស្រុក បន្ទាប់ពីការចំណាយលើការមើលថែមេដំរី និងកូនដំរីញីដែលទើបកើត ១ ក្បាលកាលពីថ្ងៃទី ២៦ ខែធ្នូឆ្នាំ ២០២១ មានការកើនឡើង។
លោកស្រី ក្លេខៃ ចិន្តា ប្រធានសមាគមអភិរក្សដំរីខ្មែរអៃរាវត្ដា (Airavata Khmer Elephant Foundation) ថ្លែងប្រាប់ភ្នំពេញប៉ុស្ដិ៍ នៅថ្ងៃទី ១២ មករាថា សមាគមអៃរាវត្ដា ដែលមានទីតាំងនៅស្រុកលំផាត់មានបេសកកម្មក្នុងការអភិរក្សដំរីស្រុក។
សមាគមមានសេចក្ដីសោមនស្សរីករាយក្រៃលែងជាទីមោទនៈដោយសារកាលពីថ្ងៃទី ២៦ ខែធ្នូ ឆ្នាំ ២០២១ ដំរីមេឈ្មោះ អ៊ីកែវ បានផ្ដល់កំណើតកូនដំរីញី ១ ក្បាលឈ្មោះ ណូអែល។ លោកស្រីថ្លែងថា៖ «វាពិតជារឿងដ៏អស្ចារ្យខ្លាំងណាស់ ដែលនៅក្នុងប្រវត្ដិសាស្ដ្រកម្ពុជាអស់រយៈពេលប្រមាណ ៣០ ឆ្នាំកន្លងមកហើយទើបតែមានដំរីស្រុកអាចផ្ដល់កំណើតកូនដំរីបាន ១ ក្បាល។ វាមិនមែនជារឿងធម្មតានោះទេ ដែលដំរីជាសត្វនិម្មិតរូបនៃព្រលឹងជាតិខ្មែរបានបង្កើតកូនមួយនេះឡើង»។
បើតាមលោកស្រី ក្លេខៃ ចិន្តា ក្នុងការអភិរក្សនេះ សមាគមមានកិច្ចសហការ និងការគាំទ្រពីក្រសួងបរិស្ថានតាមរយៈមូលនិធិបរិស្ថាន និងវិស័យឯកជនក្នុងការអភិរក្សដំរី។ លោកស្រីថ្លែងថា៖ «បន្ទាប់ពីមេដំរីបានទទួលស្គាល់កូន និងឱ្យកូនបៅមក ណូអែល (កូនដំរី) មានសុខភាពល្អប្រសើរឡើង និងគួរឱ្យខ្នាញ់ខ្លាំងណាស់»។
បើតាមលោកស្រី ចិន្តា ដើម្បីធានាចំពោះការថែទាំសុខភាពដំរីមេ ជាពិសេសកូនដំរីឱ្យមានការរស់រានមានជីវិតបានធំធាត់ឡើងសមាគមបានបន្ថែមបុគ្គលិកមួយចំនួនទៀត មានដូចជាអ្នកជំនាញដំរីមកពីបរទេស និងហ្មដំរី មើលថែទាំជាប្រចាំ ២៤ ម៉ោងលើ ២៤ ម៉ោង។ ហេតុដូច្នេះហើយ ការចំណាយនឹងមានការកើនឡើង សម្រាប់បើកប្រាក់ខែបុគ្គលិក កម្រៃឧបត្ថម្ភពេទ្យសត្វ ថ្នាំពេទ្យ និងថ្លៃចំណីបំប៉នបន្ថែមដល់មេ និងកូនដំរី។
លោកស្រីអំពាវនាវថា៖ «តាងនាមឱ្យក្រុមការងារនៃសមាគមអភិរក្សដំរីខ្មែរអៃរាវត្ដា យើងខ្ញុំសូមគោរពស្នើសុំបន្តការជួយគាំទ្រ និងឧបត្ថម្ភថវិកាពីសម្ដេច ទ្រង់ អ្នកឧកញ៉ា លោកឧកញ៉ា ឯកឧត្តម លោកជំទាវ លោកលោកស្រី ពុកម៉ែ បងប្អូនទាំងអស់ តាមសទ្ធាជ្រះថ្លា និងតាមលទ្ធភាពដែលមាន តិចក្ដី ច្រើនក្ដី ទុកជាការធ្វើបុណ្យ សន្សំកុសលរួមគ្នាដើម្បីកិច្ចការអភិរក្សស្ដេចសត្វ គឺដំរីស្រុកនៅកម្ពុជាយើង»។
បច្ចុប្បន្ន សមាគមអភិរក្សដំរីខ្មែរអៃរាវត្ដា បានទទួលថវិកាឧបត្ថម្ភបន្តិចបន្ទួចពីសប្បុរសជន ដូច្នេះបើមានសប្បុរសជនចង់ចូលរួមឧបត្ថម្ភថវិកាដល់ការថែទាំសុខភាព និងទិញចំណីសម្រាប់បំប៉ន មេដំរី អ៊ីកែវ និងកូនដំរី ណូអែល គឺឧបត្ថម្ភថវិកាតាមគណនីធនាគារ អេប៊ីអេ (ABA) ០០០ ៦៧៤ ៦៣៣។ គណនីធនាគារ Phillip ០២០ ០០១ ៧៩២ ឬគណនីវីង ០១២ ៩៦៥ ១៦៥។ តំណភ្ជាប់គេហទំព័រៈ https://donation.airavata-cambodia.com ។
បើតាមលោកស្រី ចិន្តា ក្នុងចំណោមដំរីស្រុកដែលសមាគមកំពុងអភិរក្សចំនួន ៤ ក្បាល ក្នុងនោះមានញី ១ ក្បាលឈ្មោះ អ៊ីកែវ កាលពីថ្ងៃទី ២៦ ខែធ្នូ ឆ្នាំ ២០២១ ដំរីញីនេះបានបង្កើតកូនដំរីញី ១ ក្បាល ក្រោយពពោះរយៈ ២១ ខែ ដោយបានដាក់ឈ្មោះកូនដំរីនោះថា ណូអែល។ បច្ចុប្បន្នមានដំរីកំពុងរស់នៅក្នុងតំបន់ការពារធនធានធម្មជាតិក្នុងប្រទេសកម្ពុជាមានចន្លោះពី ៤០០-៦០០ ក្បាល ក្នុងនោះមានដំរីស្រុកប្រមាណជិត ១០០ ក្បាល៕
វីដេអូ៖