ភ្នំពេញៈ ក្មេងប្រុស​ជា​សិស្សសាលា​ម្នាក់​សង្ស័យ​លេង​គីប​គ្រាប់​ផ្ទុះ​ស្លាប់​កាលពី​ថ្ងៃទី ១២​ មករា ​ដែល​កើតហេតុ​ស្ថិតក្នុង​ភូមិ​ឈូក ឃុំ​ សណ្តាន់ ​ស្រុក​សណ្តាន់ ​ខេត្ត​កំពង់ធំ។ នេះ​បើតាម​មន្ត្រី​នគរបាល​ប៉ុស្តិ៍​ឃុំ​សណ្តាន់។

លោក​ឡុង ប៊ុន​ធាង ​នាយ​នគរបាល​ប៉ុស្តិ៍​ឃុំ​សណ្តាន់​ ឱ្យដឹង​នៅ​ថ្ងៃទី១៣​ មករា ​ថា ​ក្មេងរងគ្រោះ​ឈ្មោះ ​ឡាយ សីហា ​ភេទ​ ប្រុស ​អាយុ១៤ឆ្នាំ ​រស់នៅ​ភូមិ​ឈូក ​ឃុំ​សណ្តាន់ ​ស្រុក​សណ្តាន់ ​ខេត្ត​កំពង់ធំ ​រៀន​នៅ​សាលាបឋម​សិក្សា​ភូមិ​ឈូក ​ក្នុង​ស្រុក​សណ្តាន់។ លោក​ថា ​បើតាម​មន្ត្រីនគរបាល​ជំនាញ​ខេត្ត​កំពង់ធំ​ ដែល​បាន​ចុះទៅ​ពិនិត្យ​ដល់ទី​តាំង​កើតហេតុ ​និង​ធ្វើ​កោសល្យវិច័យ​បាន​សន្និដ្ឋាន​បឋម​ថា ​ការស្លាប់​នេះ​អាចមកពី​ក្មេងរងគ្រោះ​រើស​គីប​គ្រាប់​យកមក​ត​ភ្ជាប់​ជាមួយ​ថ្មពិល​ ដែល​ថ្ម​ពិល​នោះ​មាន​ចរន្ត​ភ្លើង​ហើយ​បង្កើត​បានជា​ចំហេះ​ផ្ទុះ​តែម្តង​ទៅ។

លោក​ថ្លែងថា​៖«តាម​ការពិនិត្យ​មើលទៅ​ស្ថានភាព​របួស​របស់​ក្មេង​រងគ្រោះ​អត់​ឃើញ​បែក​មុខ​បែក​មាត់​អី​ផង តែ​ឃើញ​ត្រូវចំ​ថ្ងាស​ជ្រៅ​ចូលក្នុង​ប៉ុន​មេដៃ។ តែ​នេះ​គ្រាន់តែ​ជាការ​សន្និដ្ឋាន​ទេ​ ព្រោះ​អី​គ្មាន​អ្នកណា​ឃើញ​ហេតុការណ៍​ផ្ទាល់​ភ្នែក​ដែរ»។

លោក​ប៊ុន​ធាង បាន​ពន្យល់ថា ​គីប​ដែលជា​គ្រឿងផ្ទុះ​នោះ​មាន​ទំ​ហ៊ំ​ប៉ុន​មេដៃ​ ហើយ​មាន​រុំខ្សែ​ភ្លើង បើកាលណា​មាន​ចរន្ត​ភ្លើង​អាច​ធ្វើឱ្យ​វា​ផ្ទុះ​បាន។ ហេតុដូច្នេះ​ហើយ​ករណី​ក្មេងរងគ្រោះ​ម្នាក់នេះ​ បើជា​គ្រឿងផ្ទុះ​ដែលមាន​ម្សៅ​រំសេវ​វិញ​ ប្រហែលជា​ផ្ទុះ​ត្រូវ​ប៉ះ​ពាល់​ខ្លួនប្រាណ​ហើយ​ តែ​នេះ​ឃើញ​ត្រូវ​ត្រង់​ថ្ងាស​តែមួយ​កន្លែង​ប៉ុណ្ណោះ។

លោក​បាន ហេង ​ជា​មេឃុំ​សណ្តាន់ បាន​ប្រាប់​នៅ​រសៀល​ថ្ងៃទី១៣​ មករា​ ថា​ ហេតុការណ៍​ផ្ទុះ​នេះ​បាន​កើតឡើង​នៅវេលា​ម៉ោង​ជាង​១២រសៀល​ថ្ងៃទី១២ ​មករា ​ឆ្នាំ២០២២ ​ស្ថិតនៅ​បរិវេណ​ផ្ទះ​របស់​ក្មេង​រងគ្រោះ​តែ​ម្តង។ នៅ​ថ្ងៃនោះ​ឪពុកម្តាយ​ក្មេង​រងគ្រោះ​ក៏​ចេញទៅ​ចម្ការ​ដក​ដំឡូង​មី​អស់​ហើយ​ដែរ។ ករណីនេះ​គ្មាន​នរណាម្នាក់​ដឹងថា​ ក្មេង​រងគ្រោះ​រើស​បាន​គ្រឿងផ្ទុះ​នោះ​មកពី​ណា​ដែរ​ ប៉ុន្តែ​នៅ​កន្លែង​កើតហេតុ​ឃើញតែ​ថ្មពិល​១ដុំ​នៅក្បែរ​សាកសព​ក្មេង​តែ​ប៉ុណ្ណោះ។

លោក​បន្តថា​៖«នៅ​តំបន់​របស់ខ្ញុំ​គ្មាន​សំណល់​គ្រាប់​អី​ទេ ហើយ​កន្លងមក​ក៏​មិនដែល​មាន​នរណា​រងគ្រោះ​ ឬ ស្លាប់​ដោយសារ​ផ្ទុះ​គ្រាប់​ដែរ ​ទើបតែ​លើក​នេះ​ទេ។ ដូច្នេះ​នៅពេល​ឃើញ​បែបនេះ​អ្នកភូមិ​ក៏មាន​ការភ្ញាក់​ផ្អើល​ដែរ»។

បើ​តាម​លោក​បាន ហេង​ ទោះជា​តំបន់​ក្នុង​ឃុំ​សណ្តាន់​គ្មាន​ការរង​គ្រោះ​ដោយសារ​សំណល់​គ្រាប់​ក្តី​ ក៏​អាជ្ញាធរ​គ្រប់​លំដាប់​ថ្នាក់​តែងតែ​ធ្វើការ​អប់រំ​ណែនាំ​ផ្សព្វផ្សាយ​ជាប្រចាំ ​អំពី​គ្រោះថ្នាក់​ដោយសារ​គ្រាប់​នេះ​ជា​រៀង​រហូត​មក។ ហេតុ​ដូច្នោះ​ហើយ​ប្រជាពលរដ្ឋ ​ក៏មាន​ការយល់​ដឹង​ច្រើន​ពី​បញ្ហា​នេះ​ដែរ​ ហើយ​បើ​ពលរដ្ឋ​យល់ដឹង​ច្រើន​គ្នា​ទៅ ​ពួកគាត់​ក៏មាន​ការប្រុង​ប្រយ័ត្ន​បាន​ល្អ​ដែរ៕