.jpg)
ក្រុមមន្ត្រី ចុះបោះបង្គោលកំណត់ព្រំប្រទល់ដីវិនិយោគ អភិវឌ្ឍន៍អេកូទេសចរណ៍ធម្មជាតិ នៅថ្ងៃទី១៣មករា នៅស្រុកឱរ៉ាល់។ រូបថត មន្ទីរបរិស្ថានខេត្តកំពង់ស្ពឺ
កំពង់ស្ពឺៈ លោក ស្រ៊ុន ដារិទ្ធិ រដ្ឋលេខាធិការ ក្រសួងបរិស្ថាន នៅថ្ងៃទី ១៣ ខែ មករា ឆ្នាំ ២០២២ បានដឹក នាំក្រុមការងាររដ្ឋបាលខេត្ត ស្រុក និងអាជ្ញាធរមូលដ្ឋាន ចុះបោះបង្គោលកំណត់ព្រំប្រទល់ដីវិនិយោគអភិវឌ្ឍន៍អេកូទេសចរណ៍ធម្មជាតិ ដែលមាន៣គម្រោង ក្នុងភូមិស្រែកិន ឃុំត្រពាំងជោ ស្រុកឱរ៉ាល់។
លោក ស្រ៊ុន ដារិទ្ធិ ថ្លែងនៅថ្ងៃទី១៣ ខែមករាថា ការចុះទៅកំណត់ព្រំប្រទល់ដីវិនិយោគអភិវឌ្ឍន៍អេកូទេសចរណ៍ធម្មជាតិ នៅក្នុងភូមិស្រែកិន ឃុំត្រពាំងជោ ស្រុកឪរ៉ាល់នេះ ធ្វើឡើងសម្រាប់៣ម្រោងអភិវឌ្ឍន៍ ដែលគម្រោងនីមួយៗមានត្រឹមតែ ៩ហិកតា។
ជាគោលការណ៍ក្នុងការគ្រប់គ្រងការធ្វើកន្លែងទេសចរណ៍ធម្មជាតិខ្នាតតូច គឺតម្រូវឱ្យក្រុមហ៊ុនធ្វើយ៉ាងណារក្សាគោលដៅដើម មិនឱ្យប៉ះពាល់ដល់ធនធានធម្មជាតិឡើយ។
លោកថ្លែងថា ៖«ការអនុវត្តគឺយើងឱ្យគាត់រៀបជាផ្ទះស្នាក់តូចៗ ជាតង់ជាអីធ្វើចន្លោះដើមឈើ ដែលមិនប៉ះពាល់ដល់ដើមឈើ ហើយត្រូវគ្រប់គ្រងសំណល់រឹង និងរាវដោយប្រមូលទុកដាក់ឱ្យច្បាស់លាស់» ។
លោករដ្ឋលេខាធិការ ឱ្យដឹងដែរថា ការទន្ទ្រានកាន់កាប់ដីនៅតែបន្តកើតមាន ហេតុនេះមន្ត្រីបរិស្ថាន នៅតែបន្តធ្វើការទប់ស្កាត់ជាប្រចាំ ដែលមានទាំងការអប់រំ និងការអនុវត្តច្បាប់ ព្រមទាំងពង្រឹងការល្បាតជាប្រចាំ។
ប៉ុន្តែយ៉ាងណាក៏ដោយ ការផ្តល់ដីជូនទៅក្រុមហ៊ុនសម្រាប់ធ្វើការអភិវឌ្ឍតំបន់អេកូទសរណ៍ធម្មជាតិនេះ ក៏ជាជ្រុងមួយមានប្រយោជន៍ ក្នុងការចូលរួមការអភិរក្សថែរក្សាតំបន់ធម្មជាតិផងដែរ។
លោកថ្លែងថា ៖«ក្រុមហ៊ុនក៏ជាភ្នែកជាច្រមុះយើងដែរ ក្នុងការជួយមើលក្រែងលោមាននរណាទៅទន្ទ្រានទៅអីក្បែរៗហ្នឹង គាត់ត្រូវរាយការណ៍។ សូម្បីតែព្រឹកមិញហ្នឹង ក៏ខ្ញុំបានណែនាំទៅក្រុមហ៊ុនដែរថា នៅពេលឃើញការទន្ទ្រានដីព្រៃអីហ្នឹង ត្រូវរាយការណ៍មកខាងយើងខ្ញុំ ដើម្បីយើងខ្ញុំចុះទៅទាន់ ព្រោះគ្នាយើងតិច ត្រូវចូលរួមសហការគ្នាផ្តល់ព័ត៌មាន ទាំងពលរដ្ឋ និងក្រុមហ៊ុន» ។
លោក ស្រ៊ុន ដារិទ្ធិ ប្រាប់ថា ការជំរុញវិស័យទេសចរណ៍ធម្មជាតិឱ្យបានកាន់តែច្រើន គឺដើម្បីឱ្យប្រជាពលរដ្ឋបានទៅទស្សនាព្រៃព្រឹក្សា និងបំផុសឱ្យពលរដ្ឋចេះស្រឡាញ់ធម្មជាតិ ព្រោះកាលណាចេះស្រឡាញ់ធម្មជាតិ គឺពិតជាមិនចង់ឱ្យមានការបាត់បង់ធម្មជាតិនោះទេ។ ព្រមជាមួយគ្នានោះ ការបង្កើតឱ្យមានកន្លែងកម្សាន្តបែបទេសចរណ៍ធម្មជាតិ គឺបណ្តុះគំនិត និងកែប្រែឥរិយាបទរបស់ប្រជាពលរដ្ឋ ឱ្យងាកមកចូលចិត្តធម្មជាតិផងដែរ។
លោក ស្រ៊ុន ដារិទ្ធិ បានលើកទឹកចិត្តឱ្យមានការវិនិយោគ លើការបង្កើតតំបន់ទេសចរណ៍ធម្មជាតិនៅកម្ពុជា មិនថាតែនៅក្នុងឃុំត្រពាំងជោរ ស្រុកឱរ៉ាល់នោះទេ។ ក្រសួងបរិស្ថាន នឹងផ្តល់ឱកាសដល់អ្នកវិនិយោគ នៅគ្រប់ខេត្ត ដែលមានធម្មជាតិអាចរៀបចំជាតំបន់ទេសចរណ៍ធម្មជាតិខ្នាតតូចបាន។
លោកថ្លែងថា ៖«ការវិនិយោគ លើវិស័យទេសចរណ៍ធម្មជាតិ នៅមានកម្រិត ព្រោះបើរំពឹងថា បានតែពីអាហ្នឹងទៅធ្វើមានបាន ក៏ពិបាកដែរ។ ភាគច្រើនមានតែអ្នកមានមនោសញ្ចេតនា មានធនធានគ្រប់គ្រាន់ ធ្វើទៅបានចំណូលដល់មូលដ្ឋាន សហគមន៍ តាមរយៈការបម្រើសេវាលក់កម្លាំងពលកម្មនិង ការលក់ម្ហូបអាហារ» ៕
