ភ្នំពេញៈ លោកនាយករដ្ឋមន្ត្រី ហ៊ុន សែន នៅព្រឹកថ្ងៃទី ១៤ ខែមករានេះ បានប្រកាសពីការចាក់វ៉ាក់សាំងបង្ការជំងឺកូវីដ ១៩ ដូសជំរុញជាមួយនឹងភរិយារបស់លោក លោកស្រី ប៊ុនរ៉ានី ហើយលោកបានលើកពីគុណតម្លៃវ៉ាក់សាំង និងបានធ្វើការអំពាវនាវជាថ្មីទៀតឱ្យប្រជាពលរដ្ឋទៅចាក់វ៉ាក់សាំងឱ្យបានគ្រប់ៗគ្នា ទាំងដូសមូលដ្ឋាន និងដូសជំរុញ។
នៅលើហ្វេសប៊ុករបស់លោក ហ៊ុន សែន នៅព្រឹកថ្ងៃទី ១៤ មករានេះ បានសរសេរថា៖ «ពីរនាក់បានហើយ! ថ្ងៃនេះខ្ញុំនិងភរិយាចាក់វ៉ាក់ សាំងដូសជំរុញដើម្បីការពារកូវីដ ១៩។ គ្មានជម្រើសអ្វីឱ្យល្អជាងការចាក់វ៉ាក់សាំងគួបផ្សំជាមួយវិធានការសុខាភិបាល ៣ ការពារ និង ៣ កុំនោះទេ»។
លោកនាយរដ្ឋមន្ត្រីមានប្រសាសន៍បន្តថា៖ «ខ្ញុំមានកម្លាំងការពារយ៉ាងរឹងមាំនៅគ្រប់ទីកន្លែងតែពួកគាត់មិនអាចការពារខ្ញុំមិនឱ្យឆ្លង កូវីដ ១៩ បានឡើយ។ ប្រពន្ធ និងកូនៗព្រមទាំងចៅៗរបស់ខ្ញុំក៏មិនអាចការពារខ្ញុំបានដែរ។ និយាយរួមគ្មានអ្នកណាអាចការពារខ្ញុំ បានឡើយ គឺមានតែរូបខ្ញុំខ្លួនឯងប៉ុណ្ណោះទើបអាចការពារខ្លួនខ្ញុំបាន»។
ជាមួយគ្នានេះ លោក ហ៊ុន សែន បានធ្វើការអំពាវនាវជាថ្មីទៀត៖ «សូមបងប្អូនជនរួមជាតិអញ្ជើញទៅចាក់វ៉ាក់សាំងឱ្យបានគ្រប់ៗគ្នាទាំងដូសមូលដ្ឋានទាំងដូសជំរុញ ដើម្បីការពារខ្លួនយើង គ្រួសារយើង ភូមិ ឃុំយើង និងជាតិយើង»៕
វីដេអូ៖