.jpg)
ជនសង្ស័យជួញដូរគ្រឿងញៀនដែលសមត្ថកិច្ចចាប់ឃាត់ខ្លួនជាមួយវត្ថុតាងគ្រឿងញៀន និងគ្រាប់កាំភ្លើង។ រូបថត នគរបាល
ភ្នំពេញៈ ជនសង្ស័យប្រុស-ស្រីចំនួន ០២ នាក់ ដែលធ្វើសកម្មភាពជួញដូរគ្រឿងញៀន ដោយផ្ញើតាមរថយន្តក្រុមហ៊ុនដឹកជញ្ជូនពីភ្នំពេញទៅខេត្តបាត់ដំបង ត្រូវបានកម្លាំងការិយាល័យប្រឆាំងគ្រឿងញៀន នៃស្នងការដ្ឋាននគរបាលរាជធានីភ្នំពេញ សហការជាមួយកម្លាំងនគរបាលប្រឆាំងគ្រឿងញៀនខេត្តបាត់ដំបង ស្រាវជ្រាវបង្ក្រាបចាប់ខ្លួនបានជាបន្តបន្ទាប់ ដោយរឹបអូសបានគ្រឿងញៀនមួយចំនួនធំ។
បើតាមការចុះផ្សាយរបស់អគ្គស្នងការដ្ឋាននគរបាលជាតិ នៅថ្ងៃទី ១៣ ខែមករា ប្រតិបត្តិការបង្ក្រាបគ្រឿងញៀននេះ បានធ្វើឡើងរយៈពេល ០៣ ថ្ងៃ គឺចាប់ពីថ្ងៃទី ១០ ដល់ថ្ងៃទី ១២ ខែមករា ឆ្នាំ ២០២២ នៅភ្នំពេញ ធ្វើឡើងនៅចំណុចបុរីពិភពថ្មីកួរស្រូវ២ សង្កាត់រលួស ខណ្ឌដង្កោ និងនៅខេត្តបាត់ដំបង ក្នុងភូមិបវេល១ ឃុំបវេល ស្រុកបវេល។
លោកវរសេនីយ៍ទោ រ៉ឹម ម៉ិច នាយការិយាល័យនគរបាលប្រឆាំងគ្រឿងញៀន រាជធានីភ្នំពេញប្រាប់ឱ្យដឹងថា ការបង្ក្រាបករណីជួញដូរគ្រឿងញៀនពីភ្នំពេញយកទៅលក់ចែកចាយនៅតាមបណ្តាខេត្ត គឺដឹកនាំបង្ក្រាបផ្ទាល់ដោយលោក ឧត្តមសេនីយ៍ត្រី គល់ យី ស្នងការរងទទួលផែនការងារប្រឆាំងគ្រឿងញៀន អនុវត្តតាមបញ្ជាដឹកនាំផ្ទាល់របស់លោក ឧត្តមសេនីយ៍ឯក ស ថេត អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ។
ក្រៅពីនេះ មានការសម្របសម្រួលនីតិវិធីពីព្រះរាជអាជ្ញារងនៃអយ្យការអមសាលាដំបូង រាជធានីភ្នំពេញ លោក ស៊ិត វណ្ណៈ ដោយកងកម្លាំងបានស្រាវជ្រាវស៊ើបអង្កេតឈានទៅដល់ការបង្ក្រាបឃាត់ខ្លួនជនសង្ស័យជួញដូរគ្រឿងញៀនបាន ០២ នាក់។
ជនសង្ស័យមានឈ្មោះ ជា សុវណ្ណ បញ្ចការ ភេទស្រី អាយុ ២៩ ឆ្នាំ ប្រកបមុខរបរលក់អីវ៉ាន់តាមអនឡាញ រស់នៅភូមិបវេល១ ឃុំបវេល ស្រុកបវេល ខេត្តបាត់ដំបង និងឈ្មោះ ម៉ម សាវី ភេទ ប្រុស អាយុ ៣៣ ឆ្នាំ គ្មានមុខរបរពិតប្រាកដ រស់នៅចំណុចបុរីពិភពថ្មីកួរស្រូវ២ សង្កាត់រលួស ខណ្ឌដង្កោ។
លោក រ៉ឹម ម៉ិច ប្រាប់ឱ្យដឹងទៀតថា ប្រតិបត្តិការបង្ក្រាបគ្រឿងញៀន គឺមុនដំបូងកម្លាំងសមត្ថកិច្ចបានស្រាវជ្រាវដឹងថា មានករណីជួញដូរគ្រឿងញៀន គឺផ្ញើពីភ្នំពេញទៅខេត្តបាត់ដំបង និងក្រុងប៉ោយប៉ែត តាមរថយន្តក្រុមហ៊ុនដឹកជញ្ជូនមួយ។
បន្ទាប់មកកម្លាំងនគរបាលប្រឆាំងគ្រឿងញៀនរាជធានីភ្នំពេញសហការជាមួយកម្លាំងនគរបាលប្រឆាំងគ្រឿងញៀនខេត្តបាត់ដំបងបានចាប់ខ្លួនជនសង្ស័យជាស្ត្រីមានឈ្មោះជា សុវណ្ណ បញ្ចការ នៅស្រុកបវេល ខេត្តបាត់ដំបង ខណៈស្ត្រីសង្ស័យកុម្ម៉ង់ទិញ និងរង់ចាំទទួលយកគ្រឿងញៀន ពីជនសង្ស័យឈ្មោះ ម៉ម សាវី រស់នៅភ្នំពេញ។
លោកបន្តទៀតថា ក្រោយពីបង្ក្រាបចាប់ខ្លួនស្ត្រីសង្ស័យនេះហើយ កម្លាំងនគរបាលប្រឆាំងគ្រឿងញៀន រាជធានីភ្នំពេញ ក៏ឈានទៅបង្ក្រាបចាប់ខ្លួនជនសង្ស័យឈ្មោះ ម៉ម សាវី នៅភ្នំពេញដែលជាអ្នកផ្ញើគ្រឿងញៀនទៅឱ្យស្ត្រីសង្ស័យឈ្មោះ ជា សុវណ្ណ បញ្ចការ។
កម្លាំងសមត្ថកិច្ចឆែកឆេរត្រួតពិនិត្យ និងទៅដកហូតបានវត្ថុតាងគ្រឿងញៀនមួយចំនួននៅតាមសាខាចំណតរថយន្ត ០៣ កន្លែង ក្នុងរាជធានីភ្នំពេញ ដែលជនសង្ស័យបម្រុងផ្ញើគ្រឿងញៀនយកទៅលក់ចែកចាយនៅតាមបណ្តាខេត្តហើយបញ្ជូនមកស្នងការដ្ឋាននគរបាលរាជធានីភ្នំពេញ ដើម្បីយកមកអនុវត្តតាមនីតិវិធី។
លោកវរសេនីយ៍ទោ រ៉ឹម ម៉ិច ប្រាប់ឱ្យដឹងទៀតថា ប្រតិបត្តិការបង្ក្រាបគ្រឿងញៀនខាងលើ កម្លាំងសមត្ថកិច្ចដកហូតវត្ថុតាងគ្រឿងញៀនរួមមាន ១-ក្រាម និងម្សៅម៉ត់ពណ៌ស ចំនួន០៦ កញ្ចប់(ថង់តូច-ធំ) ២-ថ្នាំគ្រាប់ពណ៌ផ្កាឈូកចំនួន ២៥០ គ្រាប់ ៣-ថ្នាំគ្រាប់ពណ៌បៃតងចំនួន ២០០ គ្រាប់ និង ៤-គ្រាប់កាំភ្លើង ០៧ គ្រាប់៕
