ភ្នំពេញៈ លោក ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃបានដកហូតមុខតំណែងលោក ហួត សីហា ពីនាយប៉ុស្តិ៍នគរបាលរដ្ឋបាលសំរោងធំនៃអធិការដ្ឋាននគរបាលស្រុកកៀនស្វាយ និងកាត់បន្ថយឋានន្តរស័ក្តិ ១ កាំ។
យោងតាមប្រកាសស្ដីពីការអនុវត្តវិន័យមន្ត្រីនគរបាលជាតិចុះថ្ងៃទី ៥ ខែមករា ឆ្នាំ ២០២២ ដែលភ្នំពេញប៉ុស្តិ៍ទើបទទួលបាននៅថ្ងៃទី ១៣ ខែមករាលោក ស ខេង បានសម្រេចថា៖ «ត្រូវបានអនុវត្តវិន័យចំពោះវរសេនីយ៍ត្រី ហួត សីហា អត្តលេខ ៨៥១១១ ក្រោមរូបភាពដកហូតមុខតំណែងពីនាយប៉ុស្ដិ៍នគរបាលរដ្ឋបាលសំរោងធំនៃអធិការដ្ឋាននគរបាល ស្រុកកៀនស្វាយចំណុះស្នងការដ្ឋាននគរបាលខេត្តកណ្ដាលឱ្យមកជាមន្ត្រី និងបន្ថយឋានន្តរស័ក្តិចំនួន ១ ថ្នាក់ឱ្យមកនៅត្រឹមថ្នាក់អនុសេនីយ៍ឯក»។
នៅក្នុងប្រកាសនោះលោក ស ខេង បានគូសបញ្ជាក់ពីមូលហេតុនៃការដកហូតមុខតំណែងវរសេនីយ៍ត្រី ហួត សីហា ពីនាយប៉ុស្ដិ៍នគរបាលរដ្ឋបាលសំរោងធំថាដោយសារ «ល្មើសវិន័យរបស់កងកម្លាំងនគរបាលជាតិ»។
ប៉ុន្តែបើតាមរបាយការណ៍ព័ត៌មានរបស់បណ្ដាញសារព័ត៌មានក្នុងស្រុកមួយចំនួន ដែលបានចេញផ្សាយកាលថ្ងៃទី ២៨ ខែកញ្ញា ឆ្នាំ ២០២១ ការដកហូតតំណែង និងការកាត់បន្ថយឋានន្តរស័ក្តិចំនួន ១ ថ្នាក់របស់លោក ហួត សីហា នៅពេលនេះគឺមានជាប់ពាក់ព័ន្ធរឿងអាស្រូវពុករលួយ តាមរយៈការទទួលប្រាក់សំណូក ៣ ៥០០ ដុល្លារពីអាណាព្យាបាលរបស់ជនសង្ស័យប្រើប្រាស់ និងចែកចាយគ្រឿងញៀន ៣ នាក់ជាថ្នូរនឹងការដោះលែងកូនៗរបស់ពួកគេ។
របាយការណ៍ព័ត៌មានរបស់បណ្ដាញសារព័ត៌មានក្នុងស្រុកទាំងនោះបានផ្សព្វផ្សាយថា កាលពីថ្ងៃទី ៣០ ខែកក្កដា ឆ្នាំ ២០២១ លោកហួត សីហា បានចាប់ជនសង្ស័យក្នុងករណីគ្រឿងញៀន ៣ នាក់នៅចំណុចភូមិព្រែកតាកែវ ឃុំសំរោងធំ ស្រុកកៀនស្វាយ ខេត្តកណ្តាល។ បន្ទាប់មកលោក សីហា ក៏បានយល់ព្រមដោះលែងជនសង្ស័យទាំង៣នាក់នោះវិញ តាមការស្នើសុំរបស់ឪពុកម្ដាយពួកគេជាថ្នូរទទួល បានសំណូកជាប្រាក់ ៣ ៥០០ ដុល្លារ។
ក្រោយពីមានការផ្សព្វផ្សាយអំពីករណីនេះ លោក ឈឿន សុចិត្ត ស្នងការនគរបាលខេត្តកណ្តាលបានចាត់ឱ្យមន្ត្រីជំនាញនៃការិយាល័យបុគ្គលិកចុះស្រាវជ្រាវ ហើយរកឃើញថា លោក ហួត សីហា នាយប៉ុស្តិ៍នគរបាលរដ្ឋបាលសំរោងធំនៃអធិការដ្ឋាននគរបាលស្រុកកៀនស្វាយបាន «អនុវត្តខុសនីតិវិធី»។
លោក ឈឿន សុចិត្ត ក៏បានសម្រេចដាក់ពិន័យរដ្ឋបាលដោយតម្រូវឱ្យលោក ហួត សីហា មកបម្រើការងារនៅការិយាល័យបុគ្គលិកនៃស្នងការដ្ឋាននគរបាលខេត្តកណ្ដាល និងបានធ្វើរបាយការណ៍សុំគោលការណ៍បន្ថែមទៅថ្នាក់ជាតិ ដើម្បីពិនិត្យសម្រេច។
លុះដល់ថ្ងៃទី ៥ ខែមករា ឆ្នាំ ២០២២ លោក ស ខេង បានចេញប្រកាសដាក់ទណ្ឌកម្មវិន័យលោក ហួត សីហា ដោយដកហូតមុខតំណែងពីនាយប៉ុស្តិ៍នគរបាលរដ្ឋបាលសំរោងធំនៃអធិការដ្ឋាននគរបាលស្រុកកៀនស្វាយឱ្យមកជាមន្ត្រី [ធម្មតា] វិញ និងបន្ថយឋានន្តរស័ក្ដិចំនួន ១ ថ្នាក់ ឱ្យមកនៅត្រឹមថ្នាក់ អនុសេនីយ៍ឯកក្រោមហេតុផល ល្មើសវិន័យកងកម្លាំងនគរបាលជាតិ។
កាលពីរសៀលថ្ងៃទី ១៣ ខែមករា ឆ្នាំ ២០២២ លោក អំ សំអាត អនុប្រធានអង្គការលីកាដូបានលើកឡើងថា ករណីនេះគួរតែបើកការស៊ើបអង្កេត បន្ថែមទៀតលើករណីទាក់ទងនឹងការប្រព្រឹត្តអំពើពុករលួយ និងការដោះលែងជនសង្ស័យ ដើម្បីអនុវត្តតាមផ្លូវច្បាប់ជាគំរូមួយកុំឱ្យមានការអនុវត្តខុសតួនាទី និងប្រព្រឹត្តអំពើខុសច្បាប់។
លោកថ្លែងថា៖ «ខ្ញុំយល់ឃើញថាការដកហូតតំណែង និងទម្លាក់ស័ក្តិ ១ ថ្នាក់ទៅលើនាយប៉ុស្តិ៍នគរបាលរដ្ឋបាលសំរោងធំ ស្រុកកៀនស្វាយ ខេត្តកណ្តាល នេះគ្រាន់តែជាការអនុវត្តតាមវិន័យរដ្ឋបាលកងកម្លាំងនគរបាលជាតិតែប៉ុណ្ណោះ...គួរតែបើកការស៊ើបអង្កេតលើនាយប៉ុស្តិ៍រូបនោះក្នុងករណីទាក់ទងនឹងការប្រព្រឹត្តអំពើពុករលួយ និងការដោះលែងជនសង្ស័យ ដើម្បីអនុវត្តតាមផ្លូវច្បាប់ជាគំរូមួយកុំឱ្យមានការអនុវត្តខុសតួនាទី និងប្រព្រឹត្តអំពើខុសច្បាប់»៕