ភ្នំពេញៈ គណៈកម្មាធិការដោះស្រាយបញ្ហាជនអនាថា ខេត្តសៀមរាបជំរុញមន្ត្រីពាក់ព័ន្ធបង្កើតយន្តការគ្រប់គ្រងជនងាយរងគ្រោះ (ជនអនាថា និងអ្នកសុំទាន) ដើម្បីរក្សាសណ្តាប់ធ្នាប់ឱ្យបានល្អប្រសើរក្នុងនាមជាខេត្ត-ក្រុងគោលដៅទេសចរណ៍។
ការជំរុញនេះធ្វើឡើងនៅក្នុងកិច្ចប្រជុំស្តីពីបញ្ហាជនអនាថា និងអ្នកសុំទានកាលពីថ្ងៃទី ១២ ខែមករា ដើម្បីគ្រប់គ្រងជនងាយរងគ្រោះទាំងនោះឱ្យបានល្អ។
អភិបាលរងខេត្ត និងជាប្រធានគណៈកម្មាធិការដោះស្រាយបញ្ហាជនអនាថា លោក នាក់ ណេរ៉ុន ថ្លែងថា បញ្ហាជនអនាថា និងអ្នកសុំទានបានកំពុងកើតមាននៅក្នុងខេត្តសៀមរាប ជាពិសេសនៅក្នុងតំបន់រមណីយដ្ឋានអង្គរ និងឧទ្យានជាតិភ្នំគូលែន ដែលបង្កឱ្យមានភាពអនាធិបតេយ្យ បាត់បង់សណ្តាប់ធ្នាប់ ដែលតម្រូវឱ្យអាជ្ញាធរខេត្តពាក់ព័ន្ធនៅតាមមន្ទីរ អង្គភាព និងអាជ្ញាធរក្រុងស្រុក ត្រូវមានយន្តការមួយដើម្បីគ្រប់គ្រង។ ក្នុងន័យនេះ លោកជំរុញដល់អាជ្ញាធរពាក់ព័ន្ធទូទាំងខេត្តត្រូវដាក់ចេញនូវផែនការច្បាស់លាស់ ដើម្បីស្រង់ទិន្នន័យជនងាយរងគ្រោះទាំងនោះងាយស្រួលក្នុងការដោះស្រាយ។
លោកគូសបញ្ជាក់ថា ការជំរុញឡើងវិញនេះគឺដើម្បីពញ្ញាក់អារម្មណ៍ដល់មន្ត្រីថ្នាក់ក្រោមជាតិឱ្យគិតគូរពីបញ្ហានេះ បន្ទាប់ពីរាជរដ្ឋាភិបាលបានប្រកាសបើកប្រទេសឡើងវិញ ដែលពេលនេះមានភ្ញៀវទេសចរដើរកម្សាន្ត ហើយក៏មានលេចវត្តមានជនអនាថា និងអ្នកសុំទានដែរ។ «ដើម្បីគ្រប់គ្រងឱ្យមានប្រសិទ្ធភាព យើងត្រូវធ្វើស្ថិតិ ឬជំរឿនជនអនាថា ហើយត្រូវកំណត់មុខសញ្ញាគាត់ឱ្យច្បាស់ ថាតើគាត់ជាអ្នកទីទ័លក្រមែន ឬគាត់គ្រាន់តែយកបញ្ហានេះមកធ្វើជារបរដែលធ្វើឱ្យខូចសណ្តាប់ធ្នាប់»។ ការកំណត់មុខសញ្ញាជនងាយរងគ្រោះទាំងនោះដើម្បីងាយស្រួលក្នុងការយកទៅអប់រំណែនាំ និងផ្តល់ការបណ្តុះបណ្តាលដល់ពួកគាត់។
លោកថា៖ «ព្រោះបើសិនជាគាត់ទីទ័លក្រមែន យើងបញ្ចូលគាត់ទៅក្នុងអត្តសញ្ញាណកម្មក្រីក្រ ក្រ១ ក្រ២ ទៅតាមលក្ខណវិនិច្ឆ័យ ហើយរកវិធីដោះស្រាយបន្តទៀត ដូចជាផ្តល់មុខរបរ បណ្តុះបណ្តាលវិជ្ជាជីវៈ និងស្តារនីតិសម្បទាគាត់» ។
ប៉ុន្តែក្នុងករណីរកឃើញថា ពួកគាត់មិនមែនជាជនទីទ័លក្រហើយយករបរធ្វើជាអ្នកសុំទាននោះ អាជ្ញាធរនឹងយកគាត់ទៅណែនាំ ឬធ្វើសមាហរណកម្មគាត់ត្រឡប់ទៅគ្រួសារ ស្រុកកំណើតគាត់វិញ ព្រោះរឿងនេះធ្វើឱ្យខូចសណ្តាប់ធ្នាប់។ ពាក់ព័ន្ធករណីនេះអាជ្ញាធរខេត្តក៏បានរៀបចំមណ្ឌលសំចត ដោយផ្តល់កន្លែងស្នាក់នៅបណ្តោះអាសន្នផ្តល់បាយ ទឹក នៅពេលប្រមូលពួកគាត់មកមុននឹងបញ្ជូនទៅតាមស្រុកកំណើតវិញ។
លោក នាក់ ណេរ៉ុន បានកត់សម្គាល់ថា ជនអនាថាទាំងនោះមានទាំងចាស់ និងក្មេងប៉ុន្តែភាគច្រើនពុំមែនជាអ្នកទីទ័លក្រនោះទេ ពោលមានមេខ្យល់នៅពីក្រោយ ដើម្បីទទួលផលប្រយោជន៍ពីក្រុមជនងាយរងគ្រោះ។
លោកបញ្ជាក់ថា៖ «បើអ្នកទីទ័លមែនទែនមិនសូវជាមានទេ ភាគច្រើនចូលទៅលក្ខណៈជួញដូរ កន្លងទៅយើងរកឃើញមានអ្នករៀបចំដើម្បីទទួលផលប្រយោជន៍ពីជនអនាថាទាំងនោះ ដោយដឹកគាត់មកឱ្យដើរសុំទាន់។ ក្នុងករណីនេះ យើងក៏បានចាត់វិធានការមេខ្យល់ទាំងនោះដោយបានកសាងសុំណុំរឿងករណីជួញដូរបញ្ជូនទៅតុលាការផងដែរ»។
លោក ណេរ៉ុន អំពាវនាវដល់អង្គការដៃគូ និងសប្បុរជននានាបន្តផ្តល់ជាមតិយោបល់ ឬជាធនធានបន្ថែមទៀតក្នុងការជួយដោះស្រាយបញ្ហានេះ។
ស្ថាបនិកអង្គការផ្ទះបាយកុមារលោក ង៉ូវ ឈីវ ថ្លែងថា នេះជាយន្តការមួយដ៏ល្អដែលអាចជួយដល់ជនអនាថា ជាពិសេសកុមាររងគ្រោះ ដោយសារការជួញដូរដោយមេខ្យល់។ «ខ្ញុំមើលឃើញថា រាល់ថ្ងៃរដ្ឋាភិបាលខំប្រឹងណាស់ក្នុងការជួយជនអនាថា អ្នកសុំទាន និងកុមារដោយប្រើគ្រប់មធ្យោបាយទៅតាមលទ្ធភាពដែលមាន ប៉ុន្តែក៏នៅមានចន្លោះប្រហោងដែលធ្វើឱ្យជនខិលខូចកេងប្រវ័ញ្ចពលកម្មលើពួកគាត់ជាពិសេសលើកុមារ»។ ដើម្បីជួយដល់រដ្ឋាភិបាលក្នុងរឿងនេះ អង្គការរបស់លោកក៏បានកំពុងជួយដល់ជនអនាថាមួយចំនួនដោយផ្តល់ជាម្ហូបអាហារ ជាពិសេសជួយលើកុមារតែម្តង។
លោកបន្តថា៖ «បច្ចុប្បន្ននេះយើងជួយកុមារបានជាង ៧០០ នាក់ឱ្យបានហូបចុកគ្រប់គ្រាន់ និងផ្តល់សម្ភារសិក្សា។ ខ្ញុំជឿថា រាល់កុមារដែលយើងជួយនេះ អ្នកចង់ជួញដូរកុមារក៏ខ្លាចដែរ វា (មេខ្យល់) ខ្លាចត្រង់ថា កុំប៉ះពាល់កុមារអស់ហ្នឹងជាកុមាររបស់អង្គការវីវររឿងរ៉ាវ»៕