.jpg)
លោក ប៉ែន នួន កំពុងត្រូវបានសាកសួរដោយអាវុធហត្ថ។ រូប ហ្វេសប៊ុក
កំពតៈ កងរាជអាវុធហត្ថខេត្តកំពត នៅថ្ងៃទី ១៣ ខែមករា កំពុងសួរនាំលោក ប៉ែន នួន ដែលមានងារជាឧកញ៉ា ជុំវិញករណីបណ្តឹងរបស់ឈ្មោះ ស៊ុន ប៊ុល ភេទប្រុស អាយុ ៣៨ ឆ្នាំ ដែលប្តឹងថាបានប្រព្រឹត្តអំពើឆបោកមានស្ថានទម្ងន់ទោស និងរំលោភលើទំនុកចិត្ត។
ដីកាចេញកាលពីថ្ងៃទី ២៣ ខែធ្នូ ឆ្នាំ ២០២១ របស់លោក ខា ដែនណា តំណាងអយ្យការអមសាលាដំបូងខេត្តកំពតបានបញ្ជាឱ្យលោក ប៉ែន នួន ដែលបច្ចុប្បន្នរស់នៅភូមិអង្គកែវ សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ ចូលមកបង្ហាញខ្លួននៅបញ្ជាការដ្ឋានកងរាជអាវុធហត្ថខេត្តកំពតឱ្យបានមុនថ្ងៃទី ១១ ខែមករា ឆ្នាំ ២០២២ នៅរៀងរាល់ម៉ោងធ្វើការ។
ការបញ្ជាឱ្យចូលខ្លួននេះគឺដើម្បីសាកសួរករណីបណ្តឹងរបស់ឈ្មោះ ស៊ុន ប៊ុល ភេទប្រុស អាយុ ៣៨ ឆ្នាំដែលប្តឹងលោក ប៉ែន នួន ថាបានប្រព្រឹត្តអំពើ ឆបោកមានស្ថានទម្ងន់ទោស និងរំលោភលើទំនុកចិត្តប្រព្រឹត្តនៅក្នុងអំឡុងខែមិថុនាឆ្នាំ ២០២១ រហូតមកដល់បច្ចុប្បន្ន។
យ៉ាងណាក៏ដោយ លោក ប៉ែន នួន មិនបានចូលខ្លួនតាមការបញ្ជារបស់តំណាងអយ្យការឡើយទើបនៅថ្ងៃទី ១១ ខែមករា ឆ្នាំ ២០២២ កម្លាំងកងរាជអាវុធហត្ថខេត្តកំពតបានចាប់ខ្លួនរូបលោកនាំយកទៅសួរនាំតាមដីកាបញ្ជាឱ្យចូលខ្លួនរបស់លោក ខា ដែនណា តំណាងអយ្យការអមសាលាដំបូងខេត្តកំពត។
លោក កែវ សុផលមេបញ្ជាការកងរាជអាវុធហត្ថខេត្តកំពតថ្លែងនៅថ្ងៃទី ១៣ ខែមករាថា អង្គភាពរបស់លោកមិនអនុញ្ញាតឱ្យនិយាយជាមួយអ្នកសារព័ត៌មានទេ ហើយលោកបានណែនាំឱ្យទំនាក់ទំនងសួរទៅលោក អេង ហ៊ី អ្នកនាំពាក្យកងរាជអាវុធហត្ថលើផ្ទៃប្រទេស ។ យ៉ាងណាក៏ដោយលោក អេង ហ៊ី ប្រាប់ថា ជុំវិញរឿងនេះសូមសួរទៅតំណាងអយ្យការ ព្រោះតំណាងអយ្យការជាអ្នកដឹកនាំសម្របសម្រួល។
លោក ខា ដែនណា ព្រះរាជអាជ្ញារង និងជាអ្នកនាំពាក្យអយ្យការអមសាលាដំបូងខេត្តកំពតថ្លែងនៅថ្ងៃទី ១៣ ខែមករាថា មកដល់ថ្ងៃទី ១៣ ខែមករា កម្លាំងអាវុធហត្ថកំពុងបន្តសួរនាំ ឈ្មោះ ប៉ែន នួនថែមទៀត។ លោកថ្លែងថា៖ «អត់ទាន់មានលទ្ធផលដោយសារការសាកសួរ គឺត្រូវធ្វើឱ្យលម្អិតពេលថ្ងៃម៉ោង ១១ ម៉ោង ១២ ហ្នឹងគេសម្រាកហូបបាយ មិនទាន់អាចសម្រេចលទ្ធផលលឿនអ៊ីចឹងទេ ពេលល្ងាចអីបានគេសាកសួរហើយ» ៕
វីដេអូ៖
