តាកែវៈ ចាបព្រៃវែងបានចាប់ផ្ដើមបង្ហាញវត្តមានសាជាថ្មីទៀតនៅក្នុងតំបន់ការពារទេសភាពបឹងព្រែកល្ពៅដែលមានទីតាំងស្ថិតនៅក្នុងភូមិសាស្ត្រ ស្រុកបុរីជលសា និងស្រុកកោះអណ្តែត ខេត្តតាកែវ។
លោក លឹម វ៉ាត ប្រធានស្ដីទី តំបន់ការពារទេសភាពបឹងព្រែកល្ពៅបានប្រាប់ភ្នំពេញ-ប៉ុស្តិ៍ថា កាលពីឆ្នាំមុន ចាបព្រៃវែង ប្រមាណជាង ២ ០០០ ក្បាលបានបំលាស់ទីរកចំណីមកកាន់តំបន់ការពារទេសភាពបឹងព្រែកល្ពៅ បន្ទាប់ពីពួកវាបានអវត្តមានជាច្រើនឆ្នាំនៅកម្ពុជា។ វត្តមានរបស់ពួកវាបានធ្វើឱ្យក្រុមអ្នកអភិរក្សសត្វស្លាប និងជីវចម្រុះនៅក្នុងតំបន់នេះមានក្ដីរំភើបរីករាយជាទីបំផុត។
លោកបានបញ្ជាក់ថា៖ «យើងពិតជារីករាយ និងមានមោទនភាពជាទីបំផុត នៅពេលឃើញចាបព្រៃវែងដែលជា សត្វស្លាបទេសន្តរប្រវេសន៍ជិតផុតពូជបំផុត បង្ហាញវត្តមាននៅលើតំបន់ការពារទេសភាពរបស់យើង។ វត្តមានរបស់វា នាពេលនេះបង្ហាញថាតំបន់ការពារទេសភាពបឹងព្រែកល្ពៅរបស់យើង ជាទីតាំងរកចំណីដ៏មានសុវត្ថិភាព និងសម្បូរសប្បាយ បំផុតសម្រាប់ពួកវាស្នាក់នៅតាមរដូវកាល»។
យ៉ាងណាក៏ដោយ គេនៅមិនទាន់ដឹងអំពីចំនួនរបស់វានៅឡើយទេ នៅពេលនេះ ដោយក្រុមមន្ត្រីជំនាញផ្នែកសត្វស្លាប នៅមិនទាន់ឯកភាពគ្នាក្នុងការកំណត់ពេលវេលាជាក់លាក់ សម្រាប់ការធ្វើយុទ្ធនាការជំរឿនសត្វស្លាបអាស៊ី នារដូវកាលដើមឆ្នាំ ២០២២ នេះ។
លោក លឹម វ៉ាត បាននិយាយថា នៅពេលនេះ ក្រុមការងាររបស់លោកកំពុងពិភាក្សាជាមួយអង្គការជាដៃគូអំពីពេលវេលានៃការរៀបចំធ្វើជំរឿនសត្វស្លាបអាស៊ីសម្រាប់ឆ្នាំ ២០២២ ដែលនឹងប្រព្រឹត្តទៅនៅចន្លោះខែមករា ដល់ខែមេសា។
បើតាមលោក លឹម វ៉ាត នៅចន្លោះខែធ្នូដល់ខែមេសា ចាបព្រៃវែង ដែលមានប្រភពបង្កកំណើតនៅអឺរ៉ុប និងអាស៊ីខាងជើងបានធ្វើបំផ្លាស់ទីរកចំណីមកកាន់បណ្ដាប្រទេសមួយចំនួន ក្នុងតំបន់អាស៊ី (Wintering Migration) ដូចជាប្រទេសឥណ្ឌា ចិនភាគខាងត្បូង ភូមា វៀតណាម ឡាវថៃ និងប្រទេសកម្ពុជា។ វាជាប្រភេទសត្វស្លាបទេសន្តរប្រវេសន៍ជិតផុតពូជបំផុត អាស្រ័យដោយចំនួនរបស់វានៅលើពិភពលោកបានថយចុះជាង ៨០% នាប៉ុន្មានឆ្នាំចុងក្រោយនេះ។
យោងតាមទិន្នន័យក្រសួងបរិស្ថានមុនឆ្នាំ ២០០២ នៅកម្ពុជាគេឃើញវត្តមានពួកវាជាហ្វូងធំរហូតដល់ជាង ១ ០០០ ក្បាល។ បន្ទាប់មក ចាប់ពីឆ្នាំ ២០០២ ដល់ឆ្នាំ ២០១២ ចាបព្រៃវែងត្រូវបានកត់ត្រាថា នៅមានប្រមាណចន្លោះ ពី ២០ ទៅ ១០០ ក្បាលប៉ុណ្ណោះ និងបន្តមកដល់ពេលបច្ចុប្បន្នវត្តមានរបស់វាមិនមានការកត់ត្រាជាក់លាក់នោះទេ។
កាលពីខែកញ្ញា ឆ្នាំ ២០១៩ អង្គការ WCS បានធ្វើបទបង្ហាញមួយដល់អ្នកចូលរួមក្នុងសិក្ខាសាលាស្ដីអំពីការអភិរក្សសត្វចាបព្រៃវែង ដែលក្នុងបទបង្ហាញនោះ មានការកត់ត្រាចាបព្រៃវែង ប្រមាណជាង ២០០ ក្បាលនៅខេត្តក្រចេះក្នុងចន្លោះឆ្នាំ ២០១៦ និង ២០១៧។ ចំនួនសត្វនេះត្រូវបានគេរកឃើញមានការកើនឡើង នៅក្នុងឆ្នាំ ២០១៩ ដោយមានការកត់ត្រាបានប្រមាណ ៦០០ ក្បាលក្នុងនោះ មានប្រមាណ ៣០០ ក្បាលនៅតំបន់វាលខ្សឹបស្ថិតក្នុងភូមិសាស្ត្រស្រុកស្ទោងខេត្តកំពង់ធំ និងស្រុកជីក្រែង ខេត្តសៀមរាប និងប្រមាណ ៣០០ ក្បាលទៀត នៅស្រុកបាកាន ខេត្តពោធិ៍សាត់៕
វីដេអូ៖