.jpg)
បុរសជាងសំណង់ម្នាក់បានដុតផ្ទះខ្លួនឯងបណ្ដាលឱ្យឆាបឆេះអស់ចំនួន ៤ ខ្នង និងឆេះសម្ភារអស់ទាំងស្រុង ប៉ុន្ដែមិនបណ្ដាលឱ្យគ្រោះថ្នាក់ដល់មនុស្សទេ ។ នគរបាលជាតិ
ភ្នំពេញៈ បុរសជាងសំណង់ម្នាក់បានដុតផ្ទះខ្លួនឯងបណ្ដាលឱ្យឆាបឆេះអស់ចំនួន ៤ ខ្នង និងឆេះសម្ភារអស់ទាំងស្រុង ប៉ុន្ដែមិនបណ្ដាលឱ្យគ្រោះថ្នាក់ដល់មនុស្សទេ ហើយសមត្ថកិច្ចបានប្រើប្រាស់រថយន្តពន្លត់អគ្គិភ័យអស់ចំនួន ២១ គ្រឿងទើបពន្លត់បានទាំងស្រុង។
ករណីនេះកើតឡើងកាលយប់ថ្ងៃទី ១៤ ខែមករា ស្ថិតនៅចំណុចផ្ទះលេខ ៧២ ភូមិ ២១ ក្រុម ២៥៧ សង្កាត់ស្រះចក ខណ្ឌដូនពេញ។ នេះបើតាមរបាយការណ៍របស់អគ្គស្នងការដ្ឋាននគរបាលជាតិ។
លោក ព្រហ្ម យ៉ន នាយការិយាល័យបង្ការពន្លត់អគ្គិភ័យ និងសង្គ្រោះនៃស្នងការដ្ឋាននគរបាលរាជធានីភ្នំពេញបានឱ្យដឹងថា ម្ចាស់ទីតាំងមានឈ្មោះលៀង ទិនធី ភេទប្រុស អាយុ ៣២ ឆ្នាំ មុខរបរជាងសំណង់។ មូលហេតុនៃការឆាបឆេះបណ្តាលមកពីការដុតផ្ទះដោយខ្លួនឯងទើបបង្កជាអគ្គិភ័យ។
លោកថ្លែងថា៖ «ក្នុងហេតុការណ៍គ្រោះអគ្គិភ័យខាងលើនេះបណ្តាលឱ្យឆាបឆេះផ្ទះឈើលើថ្មក្រោម ទំហំ ៤ ម៉ែត្រ x ៨ ម៉ែត្រ ខូចខាតចំនួន ៤ ខ្នង និងសម្ភារអស់ទាំងស្រុង»។
បើតាមរបាយការណ៍របស់សមត្ថកិច្ច ប្រតិបត្តិការសង្គ្រោះករណីអគ្គិភ័យនេះ សមត្ថកិច្ចបានប្រើប្រាស់រថយន្ដការិយាល័យបង្ការ និងពន្លត់អគ្គិភ័យចំនួន ២១ គ្រឿង ប្រើប្រាស់ទឹកអស់ ២១ ឡាន ស្មើនឹង ៨៤ ម៉ែត្រគុប និងរថយន្តពន្លត់អគ្គិភ័យរបស់ក្រុមហ៊ុន OCIC ចំនួន ៦ គ្រឿង ប្រើប្រាស់ទឹកអស់ ១ ឡាន ស្មើនឹង ៦ ម៉ែត្រគុប។
របាយការណ៍បញ្ជាក់ថាគ្រោះអគ្គិភ័យខាងលើនេះ កម្លាំងសមត្ថកិច្ចជំនាញបានគ្រប់គ្រងទាំងស្រុង នៅវេលាម៉ោង ១២ និង ២០ នាទីរំលងអធ្រាត្រ៕
