The Phnom Penh Post Search

Search form




Logo of Phnom Penh Post newspaper Phnom Penh Post - លោក​ ម៉ៅ ធនិន ប្រកាស​បន្ត​ផ្តល់​ការឧបត្ថម្ភ​ស្បៀង​ដល់​អ្នករត់ម៉ូតូឌុប និង​បើក​តាក់ស៊ី

លោក​ ម៉ៅ ធនិន ប្រកាស​បន្ត​ផ្តល់​ការឧបត្ថម្ភ​ស្បៀង​ដល់​អ្នករត់ម៉ូតូឌុប និង​បើក​តាក់ស៊ី

Content image - Phnom Penh Post
លោក​ ម៉ៅ ធនិន (​បង់ក​ក្រមា​) ​ពេល​ជួប​អ្នករត់ម៉ូតូឌុប និង​អ្នកបើកបរ​តាត់ស៊ី ពីថ្ងៃ​ទី​ ១៦ ​មករា​។ រូប រដ្ឋបាល​ខេត្តកំពត

លោក​ ម៉ៅ ធនិន ប្រកាស​បន្ត​ផ្តល់​ការឧបត្ថម្ភ​ស្បៀង​ដល់​អ្នករត់ម៉ូតូឌុប និង​បើក​តាក់ស៊ី

កំពតៈ លោក​ ម៉ៅ ធនិន អភិបាល​ខេត្ត​កំពត​ប្រកាស​បន្ត​ផ្តល់​ការឧបត្ថម្ភ​ស្បៀង​ដល់​អ្នករត់​ម៉ូតូឌុប និង​បើក​តាក់ស៊ី​នៅ​ទូទាំង​ខេត្ត​ក្នុង​ករណី​ពួកគេ​ជួប​ប្រទះ​នូវ​ការខ្វះខាត​ជាមួយ​នឹង​ការអំពាវនាវ​ឱ្យ​អ្នក​ប្រកប​មុខរបរ​នេះ​ចូលរួម​រាយការណ៍​ពី​ភាពអសន្តិសុខ​នានា​ទៅ​កាន់​អាជ្ញាធរ​មូលដ្ឋាន​ឱ្យមាន​ចំណាត់ការ​ភ្លាមៗ​ ដើម្បី​ធ្វើយ៉ាងណា​ឱ្យ​ភូមិ​ឃុំ​មាន​សុវត្ថិភាព​។

ការប្រកាស​យ៉ាង​ដូច្នេះ​បាន​ធ្វើ​ឡើង​នា​ព្រឹក​ថ្ងៃទី​ ១៦ ខែ​មករា ឆ្នាំ​ ២០២២ ក្នុងអំឡុងពេល​លោក​ដឹកនាំ​ក្រុមការងារ​ចុះ ជួប​សំណេះសំណាល និង​ផ្តល់​ស្បៀង​ដល់​គ្រួសារ​ម៉ូតូឌុប និង​តាក់ស៊ី​ជិត​ ៤០០ ​នាក់​នៅ​ទូទាំង​ស្រុក​កំពង់ត្រាច នៅ​បរិវេណ​សាលាស្រុក​កំពង់ត្រាច​។

លោក ម៉ៅ ធនិន បាន​ថ្លែង​ក្នុង​ឱកាស​នោះ​ថា រដ្ឋបាលខេត្ត​មិន​អាច​ធានា​ជួយ​ដល់​បងប្អូន​អ្នករត់ម៉ូតូឌុប និង​អ្នកបើក​តាក់ស៊ី​ឱ្យបាន​ក្លាយជា​អ្នក​មាន​បាន​នោះទេ ប៉ុន្តែ​គ្រាន់តែ​បាយ​ ៣ ​ពេល គឺ​រដ្ឋបាលខេត្ត​អាច​ជួយ​បាន ជាពិសេស​នោះ​បើ​ពេលណា​បងប្អូន​មាន​ការខ្វះខាត គឺ​អាចមក​ស្នើសុំ​ស្បៀង​នៅតាម​រដ្ឋបាល​ខេត្ត ស្រុក ឬ​ស្នើ​ដោយផ្ទាល់​ជាមួយ​លោក​ក៏បាន​។

យ៉ាងណាក្តី​លោក​បញ្ជាក់ថា រដ្ឋបាលខេត្ត​នឹង​បន្ត​ផ្គត់ផ្គង់​ដល់​អ្នករត់ម៉ូតូឌុប​ម៉ូតូ​កង់​ ៣ និង​តាក់ស៊ី​បន្ថែមទៀត​នៅពេល​ដែល​ពួកគាត់​មាន​បញ្ហា​ជួប​ការលំបាក​ផ្សេងៗ​ពិតប្រាកដ​។ ប៉ុន្តែ​បើ​ក្នុងករណី​រកឃើញថា ពួកគាត់​ទៅ​ប្រព្រឹត្ត​បទល្មើស​ផ្សេងៗ​ដូចជា លេងបៀ និង​ជល់​មាន់​ចាញ់ ឬ​ត្រូវ​នគរបាល​ចាប់​ឃាត់ខ្លួន ឬ​ឃាត់​ម៉ូតូ​ទុកជា​ដើម​នោះ​រដ្ឋបាលខេត្ត​នឹង​មិន​ជួយ​អន្តរាគមន៍​ឡើយ​។

លោក​បញ្ជាក់ថា​៖ «​នៅពេលនេះ ម៉ោង​នេះ យើង​អត់​ខ្វះ​ទេ​ក្នុង​ការចែករំលែក​គ្នា​រស់​។ ជីវភាព​របស់​យើង​គឺ​មាន​លទ្ធភាព​រស់ តែ​សំខាន់បំផុត​គឺ​កត្តា​សាមគ្គី​គ្នា ហើយ​និង​ភាព​ទទួលខុសត្រូវ​របស់​យើង​។ កន្លែង​ដែល​យើង​រក​ទទួលទាន​នេះ​យើង​បាន​ផលប្រយោជន៍​ទាំងអស់​គ្នា ក៏ដោយសារ​តែ​គ្រួសារ​ម៉ូតូឌុប និង​តាក់ស៊ី​បាន​អាច​ដំណើរការបាន​។ ​អ៊ីចឹង​អ្នកណា​មាន​អង្ករ​ហូប​អ្នកណា​រស់​របៀប​ម៉េច យើង​ត្រូវ​បន្ត​ជួយ​»​។

ជាមួយ​នឹង​ការប្រកាស​ជួយ​នេះ លោក ម៉ៅ ធនិន ក៏បាន​អំពាវនាវ​ឱ្យ​បងប្អូន​អ្នក​ម៉ូតូឌុប ម៉ូតូកង់​ ៣ និង​តាក់ស៊ី ចូលរួម​សហការ​ជាមួយ​អាជ្ញាធរ​មូលដ្ឋាន​ក្នុង​ការរាយការណ៍​នូវ​បទល្មើស​នានា ដែល​បង្កឱ្យមាន​ភាពអសន្តិសុខ​សង្គម​ផងដែរ ដោយ​លោក​ចាត់ទុកថា អ្នក​ប្រកបរបរ​នេះ គឺ​បាន​ជួប និង​បានឃើញ​ច្រើន​នូវ​បទល្មើស​ទាំងនេះ នៅក្នុង​មូលដ្ឋាន​ដែល​អាច​ចូលរួម​ទប់ស្កាត់​ទាំងអស់គ្នា​។

លោក​បញ្ជាក់ថា​៖ «​ខ្ញុំ​សូម​ផ្តាំ​ទៅ​លោក​មេ​ប៉ុស្តិ៍ ឱ្យទទួល​ការចូលរួម​ពី​គ្រួសារ​ម៉ូតូឌុប គ្រួសារ​តាក់ស៊ី អ្នក​ទាំងអស់​នេះ មាន​ព័ត៌មាន​ច្បាស់​ណាស់​ជល់​មាន់នៅ​កន្លែង​ណា ក៏​ដឹង​ដែរ ព្រោះ​ឌុប​គេ​ទៅ​។ កុំ​លាក់​ខ្ញុំ​អី ហ្នឹង​ខ្ញុំ សុំឱ្យ​មាន​ការចូលរួម​ជាមួយ​ភូមិ​ឃុំ មាន​សុវត្ថិភាព​រាយការណ៍​មក​ខ្ញុំ​ផ្ទាល់​តាម​ទូរស័ព្ទ​ថា កន្លែង​នេះ​កន្លែង​នោះ​មាន​ហេតុការណ៍​អ៊ីចេះ​»​។

លោក​ក៏បាន​និយាយ​ដែរ​ថា បើ​ការរាយការណ៍​ទៅ​អាជ្ញាធរ​មូលដ្ឋាន​ហើយ​មិនមាន​ចំណាត់ការ នោះ​ត្រូវ​រាយការណ៍​មក​លោក​ដោយផ្ទាល់ ដើម្បី​មាន​ចំណាត់​បន្ត​ក្នុង​ករណី​ទាំងនោះ ព្រោះ​បញ្ហា​ភូមិ ឃុំ មាន​សុវត្ថិភាព​គឺ​ចាំបាច់​ដែល​ត្រូវ​ដោះស្រាយ និង​ការចូលរួម​។

អ្នកស្រី ជែង ភូមិ ជា​អ្នករត់​តាក់ស៊ី​នៅក្នុង​ស្រុក​កំពង់ត្រាច​បាន​សម្តែង​ក្តីសប្បាយ​រីករាយ​ដែលមាន​ថ្នាក់ដឹកនាំ​ខេត្ត​បាន​ចូលរួម​គិតគូរ​ពី​សុខទុក្ខ​របស់​ពួកគាត់ ខណៈ​ដែល​កន្លងមក មិនដែល​សូវ​មាន​ថ្នាក់ដឹកនាំ គិតគូរ​មកលើ​អ្នក​ប្រកបរបរ​ដូច​អ្នកស្រី​នោះទេ​។ អ្នកស្រី​បញ្ជាក់ថា​៖ «​ខ្ញុំ សប្បាយរីករាយ​ដែល​គាត់​មក​ស្រុក​កំពង់ត្រាច​ខ្ញុំ​នេះ និង​បង្កើត​មុខរបរ និង​ការជួយ​សង្គ្រោះ​ដល់​អ្នក​ប្រកបរបរ​ដូច​ពួក​ខ្ញុំ ដែលជា​អ្នករត់​តាក់ស៊ី ម៉ូតូឌុប​ទាំងអស់​ហ្នឹង​»​។

ចំណែក​លោក​ អ៊ិន ធាង ដែលជា​អ្នករត់ម៉ូតូឌុប​ក្នុង​ស្រុក​កំពង់ត្រាច បានលើកឡើង​ដែរ​ថា មុខរបរ​របស់​លោក​សព្វថ្ងៃ គឺ​មិន​សូរ​ជា​កាក់កប​ប៉ុន្មាន​នោះទេ ការរក​ប្រចាំថ្ងៃ​ដោយ​ផាត់​រាល់​ការចំណាយ​ផ្សេងៗ គឺ​ ១ ​ថ្ងៃៗ​លោក​សល់​ប្រមាណ ១ ៥០០០ រៀល​ប៉ុណ្ណោះ​។ ដូច្នេះ​លោក រំពឹងថា ការប្រកាស​ជួយ​ពី​រដ្ឋបាលខេត្ត​មកកាន់​ក្រុម​អ្នក​ម៉ូតូឌុប​នឹង​ចូលរួម​សម្រាល​បន្ទុក និង​ការខ្វះខាត​របស់​គ្រួសារ​លោក​បាន​មួយផ្នែក​ផងដែរ​។

លោក យឹម ផល្លី មន្ត្រី​សម្របសម្រួល​សមាគម​ការពារ​សិទ្ធិមនុស្ស​អាដហុក​ប្រចាំ​ខេត្តកំពត លើកឡើង​ថា នេះ​គឺជា​ការគិតគូរ​មួយ​ដ៏ល្អ​របស់​លោក​អភិបាល​ខេត្ត​ថ្មី​ដែលមាន​បំណង​ចង់​ជួយ​សម្រាល​ទុក្ខលំបាក​របស់​អ្នក​ប្រកបរបរ​រត់​ម៉ូតូឌុប តាក់ស៊ី ដែល​អភិបាលខេត្ត​មុនៗ​មិនដែល​បាន​ចាប់អារម្មណ៍​។ ជាមួយ​គ្នានេះ លោក​យល់ថា បើទោះជា​ការជួយ​នេះ​បន្តិចបន្តួច​ក្តី​ក៏បាន​ចូលរួម​សម្រាល​បន្ទុក​លំបាក និង​លើកស្ទួយ​ជីវភាព​របស់​ពួកគេ​បាន​មួយគ្រា​ក្នុងអំឡុងពេល​ជួប​វិបត្តិ​ផងដែរ​។

លោក​បញ្ជាក់ថា​៖ «​មួយរយៈពេល​ខ្លី​នេះ យើង​ឃើញ​អាជ្ញាធរ​ដែនដី លោក​ហាក់ដូចជា​សកម្ម​ណាស់​ក្នុង​ការចុះ​ស្រាវជ្រាវ​ពាក់ព័ន្ធ​តាំងពី​ម៉ូតូឌុប កង់៣​យើង​។ នេះ​គឺជា​ស្ថានភាព​មួយ​ជាក់ស្តែង ហើយ​អាជ្ញាធរ​មិន​អាច​ធ្វើការ​កុហក ឬ​ឆកល្វែង​បានទេ​ក្នុង​កិច្ចការងារ​នេះ ដើម្បី​ផ្តល់​ការជួយឧបត្ថម្ភ​ដល់​អ្នក​ខ្វះខាត​ពិតប្រាកដ​»​។

តាម​តួលេខ​របស់​រដ្ឋបាលខេត្ត​កំពត​ដែល​បានធ្វើ​បច្ចុប្បន្នភាព​លើ​ក្រុម​អ្នក​ម៉ូតូឌុប ម៉ូតូកង់៣​ និង​តាក់ស៊ី​នៅ​ទូទាំង​ខេត្តកំពត កាលពី​ឆ្នាំ​ ២០២១ គឺមាន​អ្នក​ប្រកបរបរ​នេះ​ប្រមាណ ៥ ០០០ នាក់​ដែល​លោក​ម៉ៅ ធនិន ធ្លាប់បាន​លើកឡើងថា ការបង្កើត​ក្រុមគ្រួសារ​ម៉ូតូ និង​តាក់ស៊ី​នេះ​ឡើង គឺ​ដើម្បី​ផ្សារភ្ជាប់​ទំនាក់ទំនង និង​ការជួយ​ដល់​ជីវភាព​របស់​ពួកគាត់ នៅពេល​ប្រឈម​នឹង​ការខ្វះខាត​៕

អត្ថបទគួរចាប់អារម្មណ៍

  • កោះកុងៈ កូនអណ្តើក​ហ្លួង​ចំនួន ៣០ ​ក្បាល​បាន​ញាស់​ចេញពី​សម្បុក​នៅលើ​ឆ្នេរ​ខ្សាច់​សិប្បនិម្មិត​ក្នុង​មជ្ឈមណ្ឌល​អភិរក្ស​សត្វ​ល្មូន​ខេត្តកោះកុង កាលពី​សប្តាហ៍​កន្លងទៅ ហើយ​នេះ​គឺជា​លើក​ទី​ ២ ​ហើយ ដែល​អណ្តើក​ហ្លួង​ចិញ្ចឹម​ក្នុង​មជ្ឈមណ្ឌល​នេះ​បាន​ពង​កូន​។ នេះ​បើតាម​អង្គការ​សមាគម​អភិរក្ស​សត្វព្រៃ​នៅ​កម្ពុជា (WCS)​។

  • ភ្នំពេញៈ ការបញ្ចូល​មីក្រូ​សារជាតិ​ក្នុង​អង្ករ គឺជា​ជំហាន​ចម្បង​មួយ​ក្នុងការ​ដោះស្រាយ​បញ្ហា​អាហារូបត្ថម្ភ​ក្នុង​ប្រទេស​កម្ពុជា ដែល​ប្រជាជន​ភាគច្រើន​ទទួលទាន​បាយ ក្នុង​បរិមាណ​ច្រើន​ជា​រៀងរាល់ថ្ងៃ​។ នេះ​បើតាម​មន្ត្រី​ក្រុមប្រឹក្សា​ស្តារ​អភិវឌ្ឍន៍​វិស័យ​កសិកម្ម និង​ជនបទ​។

  • ភ្នំពេញ: ក្នុង​ចំណោម​ភោជនីយដ្ឋាន​ពោរពេញ​ដោយ​សិល្បៈ​ចម្អិន​ម្ហូបអាហារ ការ​គិតគូរ​ពី​និរន្តរភាព​បរិស្ថាន​ភព​ផែន​ដី និង​បង្កប់​រឿង​រ៉ាវ​ប្រពៃណី​វប្បធម៌​ដ៏​អស្ចារ្យ​នៅ​អេស្ប៉ាញ ប៉េរូ​សហរដ្ឋអាមេរិក​ ថៃ ដាណឺម៉ាក​ នូវែលសេឡង់ ចិន ជប៉ុន អ៊ីតាលី និង​ម៉ិកស៊ិក អាហារ​នៅ​​ផ្ទះ​ប្រពៃណី​បុរាណ​មួយ​​​តាម​ដង​ទន្លេ​មេគង្គ

  • ភ្នំពេញៈ ទាំង​អ្នកនយោបាយ អ្នកវិភាគ និង​ស្ថាប័ន​គណៈកម្មាធិការ​ជាតិ​រៀបចំ​ការបោះឆ្នោត​បានចាត់ទុក​ដំណើរការ​ឃោសនា​រក​សំឡេងឆ្នោត ក្នុង​រយៈពេល ៣ ​ថ្ងៃ​របស់​គណបក្ស​នយោបាយ ដែល​បាន​ចុះបញ្ជី​បេក្ខជន​ចូលរួម​បោះឆ្នោត​ជ្រើសរើស​ក្រុមប្រឹក្សាឃុំ សង្កាត់​អាណត្តិ​ទី​ ៥ ដែល​នឹង​ប្រព្រឹត្តទៅ​នៅ​ថ្ងៃទី​ ៥ ខែមិថុនា ថា មាន​ភាពចាស់ទុំ​ផ្នែក​នយោបាយ និង​មិនមាន​អំពើហិង្សា​ណាមួយ​កើតឡើង​នោះ

  • ភ្នំពេញៈ សាលាឧទ្ធរណ៍​ភ្នំពេញ​នៅ​ថ្ងៃទី​ ២៣ ​ឧសភា បានប្រកាស​សាលដីកា​កំបាំង​មុខមន្ត្រី​សមាគម​ការពារ​សិទ្ធិមនុស្ស​អាដហុក​ ៤ ​រូប និង​អតីត​មន្ត្រី​ ១ ​រូប​ទៀត​សម្រេច​តម្កល់​សាលក្រម​របស់​សាលាដំបូង​រាជធានី​ភ្នំពេញ​ដដែល បន្ទាប់ពី​បាន​កាត់ក្តី​ឱ្យ​ពួកគេ​ជាប់ពន្ធនាគារ​ក្នុង​ម្នាក់​ ៥ ​ឆ្នាំ តែ​ឱ្យ​អនុវត្ត​ទោស ​១៤ ​ខែ​ពាក់ព័ន្ធ​បទចោទ​សូកប៉ាន់​សាក្សី និង​សមគំនិត​សូកប៉ាន់​សាក្សី​ដល់​ នាង ខុម ចាន់តារាទី ហៅ​ ស្រីមុំ​។

  • បន្ទាយមានជ័យៈ ក្នុង​មួយ​ថ្ងៃៗ​មាន​ប្រជាពលរដ្ឋ​នៅតាម​ព្រំដែន ជាពិសេស​ពលករ​ខ្មែរ​ពី ​៤០០ ទៅ​ ៥០០​ នាក់​បាន​ទៅ​ស្នើសុំ​ធ្វើ​បណ្ណ​ឆ្លងដែន ដើម្បី​បាន​ចូលទៅ​ធ្វើការ ឬ​លក់ដូរ​ស្របច្បាប់ នៅក្នុង​ប្រទេស​ថៃ បន្ទាប់ពី​ភាគី​ទាំង​ ២​ បាន​ឯកភាព​គ្នា​បើក​ច្រកព្រំដែន​ឡើងវិញ កាលពី​ថ្ងៃទី​ ១ ខែឧសភា ក្នុង​កម្រិត​ថ្នាក់​តំបន់​។