.jpg)
ព្រះសង្ឃ និងមន្ត្រីចុះពិនិត្យព្រៃឈើ បានឃើញសត្វងាប់ដោយជាប់អន្ទាក់នៅខេត្តឧត្តរមានជ័យ ពីថ្ងៃទី ១៤ មករា។រូប Bun Saluth's fb
ភ្នំពេញៈ ក្រសួងបរិស្ថានបង្ហាញទិន្នន័យនៃវត្តមានសត្វព្រៃកម្រជាច្រើនប្រភេទ ដែលត្រូវបានថតជាប់ដោយម៉ាស៊ីនថតស្វ័យប្រវត្តិនៅតំបន់ការពារធម្មជាតិក្នុងភូមិសាស្ត្រខេត្តចំនួន ៣ គឺខេត្តពោធិ៍សាត់ បាត់ដំបង និងខេត្តកោះកុង ខណៈអន្ទាក់ និងបទល្មើសគ្រប់រូបភាពក្នុងតំបន់ការពារមួយចំនួននៅតែបន្តកើតមាន។
លោក នេត្រ ភក្ត្រា រដ្ឋលេខាធិការ និងជាអ្នកនាំពាក្យក្រសួងបរិស្ថានបានឱ្យដឹងនៅថ្ងៃទី ១៤ ខែមករាថាសត្វព្រៃប្រភេទជិតផុតពូជប្រភេទទទួលរងគ្រោះថ្នាក់ ប្រភេទទទួលការគំរាមកំហែងចំនួន ១០ ប្រភេទត្រូវបានកត់សម្គាល់តាមរយៈទិន្នន័យប្រមូលបានពីរូបថតម៉ាស៊ីនថតស្វ័យប្រវត្តិ។ មន្ត្រីជំនាញនៃក្រសួងបរិស្ថានបានអនុវត្តសិក្សាក្រោមការគាំទ្រពីគម្រោងនិរន្តរភាពតំបន់ទេសភាព និងទេសចរណ៍ធម្មជាតិកម្ពុជានៃក្រសួងបរិស្ថាន។
យោងតាមលទ្ធផលនៃការសិក្សារបស់គម្រោងនិរន្តរភាពតំបន់ទេសភាព និងទេសចរណ៍ធម្មជាតិកម្ពុជានៃក្រសួងបរិស្ថានក្នុងរយៈពេល ២ ខែកន្លងទៅ គឺពីចុងខែតុលា ឆ្នាំ ២០២១ ដល់ដើមខែមករា ឆ្នាំ ២០២២ ក្រសួងបរិស្ថានបានរកឃើញវត្តមានប្រភេទសត្វព្រៃមានដោយកម្រ ប្រភេទជិតផុតពូជ ប្រភេទទទួលរងគ្រោះថ្នាក់ ប្រភេទទទួលការគំរាមកំហែងចំនួន ១០ ប្រភេទ។
សត្វព្រៃកម្រទាំងនោះ រួមមាន ដំរីអាស៊ី ខ្ទីង ប្រើសស្បូវ កែះ ខ្លាឃ្មុំតូច ខ្លាឃ្មុំធំ ឆ្កែព្រៃ ជ្រូកពោន ឬជ្រូកព្រុល សំពោចកលឿង ស្វាត្រោស និងប្រភេទ ថនិកសត្វ ព្រមទាំងបក្សីមួយចំនួនទៀតមានវត្តមានក្នុងតំបន់ការពារធម្មជាតិនៃភូមិសាស្ត្រខេត្តពោធិ៍សាត់ ខេត្តបាត់ដំបង និងខេត្តកោះកុង។
លោក នេត្រ ភក្ត្រា ថ្លែងថា៖ «យើងសូមអរគុណដល់មន្ត្រីជំនាញ មន្ទីរបរិស្ថាន មន្ត្រីឧទ្យានុរក្ស និងសហគមន៍មូលដ្ឋាននៃខេត្តពោធិ៍សាត់ បាត់ដំបង និងខេត្តកោះកុងដែលបានខិតខំប្រឹងប្រែងក្នុងកិច្ចការងារនេះ ហើយក្នុងការសិក្សាស្រាវជ្រាវនេះ ក្រុមមន្ត្រីជំនាញក្រសួងបរិស្ថានបានដាក់ម៉ាស៊ីនថតស្វ័យប្រវត្តិរហូតដល់ចំនួន ៤៩ ទីតាំង»។
តាមក្រសួងបរិស្ថាន ម៉ាស៊ីនថតស្វ័យប្រវត្តិ ដែលថតបានសត្វកម្រទាំងនោះ មានក្នុងដែនជម្រកសត្វព្រៃនៅខេត្តពោធិ៍សាត់ចំនួន ២៣ គ្រឿង ខេត្តបាត់ដំបងចំនួន ១៦ គ្រឿង និងនៅខេត្តកោះកុង មានចំនួន ១០ គ្រឿង។
លោក នេត្រ ភក្ត្រា បានបញ្ជាក់ថា ការដាក់ម៉ាស៊ីនស្វ័យប្រវត្តិសម្រាប់ការថតនេះក្នុងគោលបំណងដើម្បីបង្កើនចំណេះដឹងពីវិធីសាស្ត្រសិក្សា និងប្រមូលទិន្នន័យជីវចម្រុះ ស្វែងរកវត្តមាន និងអវត្តមានប្រភេទសត្វមានដោយកម្រ ជិតផុតពូជទទួលរងគ្រោះថ្នាក់ និងគំរាមកំហែង និងវាយតម្លៃស្ថានភាព និងរបាយការណ៍អំពីសត្វព្រៃសំខាន់ៗ។
នេះជាលើកទី ២ ហើយក្នុងក្របខ័ណ្ឌនៃគម្រោងនិរន្តរភាពតំបន់ទេសភាព និងទេសចរណ៍ធម្មជាតិកម្ពុជា។ មន្ត្រីជំនាញនៃក្រសួងបរិស្ថានបានប្រមូលទិន្នន័យពីម៉ាស៊ីនថតស្វ័យប្រវត្តិទទួលបានរូបភាព និងវីដេអូសត្វព្រៃក្នុងតំបន់ការពារធម្មជាតិ។ ការប្រមូលទិន្នន័យលើកទី ១ ធ្វើឡើងកាលពីថ្ងៃទី ២៩ ខែឧសភា ដល់ថ្ងៃទី ៤ ខែមិថុនា ឆ្នាំ ២០២១ នៅដែនជម្រកសត្វព្រៃក្នុងភូមិសាស្ត្រខេត្តពោធិ៍សាត់ កំពង់ឆ្នាំង និងខេត្តកំពង់ស្ពឺ បន្ទាប់ពីបានដាក់ម៉ាស៊ីនថត ជាច្រើនខែរួចមក។ រូបភាពសត្វព្រៃជិតផុតពូជ រងការគំរាមកំហែង និងមានដោយកម្រមួយចំនួន ដូចជាសត្វដំរីអាស៊ី ខ្លាពពក ខ្លាឃ្មុំតូច ខ្ទីង ប្រើសដែលថតបានភាគច្រើនដើរជាហ្វូង និងមានកូនតូចៗជាច្រើន ពិសេសសត្វដំរីព្រៃក្នុង ១ ហ្វូងមានកូនតូច ដំរីជំទង់ និងពេញវ័យក្នុង ១ ក្រុមៗ មានដំរីព្រៃចន្លោះពី ១០ ទៅ ២០ ក្បាល។
សូមបញ្ជាក់ដែរថា គម្រោងនិរន្តរភាពតំបន់ទេសភាព និងទេសចរណ៍ធម្មជាតិកម្ពុជា ក្រោមហិរញ្ញប្បទានពីធនាគារពិភពលោក។ គម្រោងនេះបានចាប់ផ្តើមអនុវត្តជាផ្លូវការកាលពីថ្ងៃទី ១៧ ខែតុលា ឆ្នាំ ២០១៩ និងគ្រោងបញ្ចប់នៅថ្ងៃទី ៣១ ខែធ្នូ ឆ្នាំ ២០២៥។
លោក នេត្រ ភក្ត្រា បញ្ជាក់ទៀតថា ការដែលជ្រើសរើសដែនជម្រកសត្វព្រៃស្ថិតក្នុងភូមិសាស្ត្រពោធិ៍សាត់ បាត់ដំបង និងខេត្តកោះកុង ដើម្បីដាក់ម៉ាស៊ីនថតស្វ័យប្រវត្តិនេះ ដោយសារតែតំបន់ការពារធម្មជាតិនេះគ្របដណ្តប់ដោយប្រភេទព្រៃស្រោង ពាក់កណ្តាលស្រោង ព្រៃល្បោះ លាយឡំដោយព្រៃឫស្សី និងវាលស្មៅ។
លោកបានបន្ថែមថា៖ «លើសពីនេះទៀត ទីតាំងភូមិសាស្ត្រក្នុងដែនជម្រកសត្វព្រៃក្នុងភូមិសាស្ត្រខេត្តទាំង ៣ នេះមានអូរបឹងបួ ស្ទឹងជាប្រភពទឹក ដែលជាទីជម្រកប្រសើរ សម្រាប់សត្វព្រៃ និងសម្រាប់ជួយគាំទ្រដល់ការអភិវឌ្ឍសេដ្ឋកិច្ចជាតិ ដែលចាំបាច់តម្រូវឱ្យមានការគ្រប់គ្រង និងអភិរក្សស្របតាមគោលការណ៍ណែនាំ និងបច្ចេកទេស»។
លោកក៏បានអំពាវនាវដល់ប្រជាជនកម្ពុជាបន្តចូលរួមទាំងអស់គ្នា ដើម្បីបញ្ឈប់ការបរិភោគសាច់សត្វព្រៃ ការប្រើប្រាស់ផលិតផលពីសត្វព្រៃ ការជួញដូរសត្វព្រៃ ដែលសុទ្ធសឹងអាចបង្កហានិភ័យខ្ពស់ដល់សុខភាពមនុស្ស។ ត្រូវងាកមកចូលរួមការពារ និងថែរក្សាធនធានធម្មជាតិ និងជីវចម្រុះរបស់កម្ពុជានេះឱ្យបានគង់វង្សសម្រាប់មនុស្សរាប់ជំនាន់ទៅមុខទៀត។
ជាមួយគ្នានេះដែរ បណ្តាញព្រះសង្ឃ និងមន្ត្រីល្បាតព្រៃឈើនៅព្រៃសង្ឃសហគមន៍រុក្ខវ័នស្ថិតនៅខេត្តឧត្តរមានជ័យនៅតែបន្តរកឃើញបទល្មើសសត្វព្រៃ និងអន្ទាក់ជាច្រើននៅក្នុងព្រៃ ដែលបណ្តាលឱ្យសត្វព្រៃរងគ្រោះរបួស និងស្លាប់ជាបន្តបន្ទាប់។
ទំព័រហ្វេសប៊ុករបស់លោក ប៊ុន សាលួត អតីតព្រះសង្ឃដែលជាអតីតប្រធានព្រៃសង្ឃសហគមន៍រុក្ខវ័នឱ្យដឹងកាលពីថ្ងៃទី ១៥ មករា ថា កាលពីថ្ងៃទី ១៤ ខែមករា ព្រះសង្ឃ ៤ អង្គ ប្រធានបណ្តាញព្រៃឈើខេត្ត ១ នាក់ និងគណៈកម្មការ ២ នាក់ ព្រមទាំងកម្លាំងប្រតិបត្តិការសឹករងស្រុកចុងកាល់ ២ នាក់ ដឹកនាំដោយព្រះតេជព្រះគណ ពឿត តួ បានចុះល្បាតឃ្លាំងមើលបទល្មើសផ្សេងៗ និងសាអន្ទាក់សត្វក្នុងព្រៃ។
ទំព័រហ្វេសប៊ុកដដែលបន្តថា ក្នុងពេលចុះល្បាតនោះ ក្រុមការងារបានប្រទះឃើញសត្វឈ្លូសជាប់អន្ទាក់ងាប់ ១ ក្បាល ហើយក្នុងនោះក៏បានសាអន្ទាក់សត្វព្រៃបានចំនួន ២៣ អន្ទាក់ ចាប់ពីចំណុចអូរតាជី រហូតដល់ត្រពាំងប្រិយខាងលិច ស្ថិតនៅភូមិឈូកមាស សង្កាត់កូនក្រៀល ក្រុងសំរោង ខេត្តឧត្តរមានជ័យផងដែរ៕
