.jpg)
សំរាមដែលបានខ្ចប់ទុកដាក់នៅមុខផ្ទះនាពេលកន្លងមក។ ហ៊ាន រង្សី
ភ្នំពេញៈ រដ្ឋបាលរាជធានីភ្នំពេញអំពាវនាវដល់ប្រជាពលរដ្ឋនៅតាមខណ្ឌកណ្ដាលរាជធានីភ្នំពេញចំនួន ៥ ទុកដាក់ និងបញ្ចេញសំរាមឱ្យបានត្រឹមត្រូវតាមម៉ោងកំណត់គឺចាប់ពីម៉ោង ៦-៩ យប់ ខណៈអាជ្ញាធរកំពុងបន្តផ្សព្វផ្សាយសេចក្តីណែនាំស្តីពីការគ្រប់គ្រងសំរាមសំណល់រឹងនេះ និងពង្រឹងការផាកពិន័យចំពោះអ្នកដែលល្មើស។ នេះបើតាមលោក ហួត ហៃ អភិបាលរងនៃគណៈអភិបាលរាជធានីភ្នំពេញតំណាងលោក ឃួង ស្រេង អភិបាលរាជធានីភ្នំពេញដែលបានណែនាំដល់អាជ្ញាធរខណ្ឌទាំង ១៤ មន្ទីរបរិស្ថាន សង្កាត់ទាំង ១០៥ និងក្រុមហ៊ុនប្រមូលសំរាមទាំង៣នៅរាជធានីភ្នំពេញ កាលពីថ្ងៃទី ១៤ ខែមករា ឆ្នាំ ២០២២ ពេលធ្វើជាអធិបតីកិច្ចប្រជុំផ្សព្វផ្សាយស្តីពីការគ្រប់គ្រងសំរាមសំណល់រឹងទីប្រជុំជន និងពង្រឹងការអនុវត្តភារកិច្ចរបស់ភ្នាក់ងារអនាម័យ។
លោកថ្លែងថា រដ្ឋបាលរាជធានីភ្នំពេញបានចាប់ផ្ដើមអនុវត្ដការគ្រប់គ្រងសំរាម សំណល់រឹងនៅរាជធានីភ្នំពេញចាប់តាំងពីថ្ងៃទី ១ ខែវិច្ឆិកា ឆ្នាំ ២០២១ មក ប៉ុន្ដែការអនុវត្ដនេះនៅមិនទាន់បានតឹងតែង ដោយសារការផ្សព្វផ្សាយមិនទាន់បានជ្រាបទៅដល់ប្រជាពលរដ្ឋគ្រប់ខ្នងផ្ទះនៅឡើយ។ នៅក្នុងកិច្ចប្រជុំជាមួយសង្កាត់ទាំង ១០៥ រដ្ឋបាលរាជធានីភ្នំពេញក៏បានថតចម្លង សេចក្តីណែនាំ ស្តីពីការគ្រប់គ្រងសំរាម សំណល់រឹងនេះចែកជូនក្នុង ១ សង្កាត់ចំនួន ៦០០ ច្បាប់ និងខិត្តប័ណ្ណព័ត៌មានស្ដីពីការគ្រប់គ្រងសំរាម និងសំណល់រឹងនេះ ដើម្បីចែកជូនដល់មេភូមិ និងប្រជាពលរដ្ឋនៅតាមខ្នងផ្ទះនីមួយៗ។
លោកថ្លែងថា៖ «យើងផ្សព្វផ្សាយឱ្យប្រជាពលរដ្ឋដឹងសិនថា ផ្លូវនឹងក្រុមហ៊ុនប្រមូលសំរាមនឹងចុះប្រមូលម៉ោងប៉ុន្មាន និងបញ្ចេញសំរាមម៉ោងប៉ុន្មានឱ្យបានយល់គ្នាសិន កុំឱ្យគាត់អត់បានដឹងព័ត៌មានសោះហើយយើងធ្វើការផាកពិន័យ វាជារឿងមួយមិនយុត្ដិធម៌សម្រាប់ប្រជាពលរដ្ឋ។ ប៉ុន្ដែនៅពេលពលរដ្ឋដឹងហើយ នៅតែបញ្ចេញសំរាមខុសម៉ោង ខុសពេលវេលានោះយើងនឹងចាប់ផ្ដើមអនុវត្ដវិធានការផាកពិន័យហើយ»។
យោងតាមសេចក្តីណែនាំស្តីពីការគ្រប់គ្រងសំរាម សំណល់រឹង នៅរាជធានីភ្នំពេញ ចុះថ្ងៃទី ១៦ ខែកញ្ញា ឆ្នាំ ២០២១ បានបញ្ជាក់ថា ការបញ្ចេញសំរាម សំណល់រឹង សម្រាប់សំរាមសើម ខណ្ឌកណ្តាលរាជធានីចំនួន ៥ រួមមាន ខណ្ឌដូនពេញ ខណ្ឌចំការមន ខណ្ឌ៧មករា ខណ្ឌទួលគោក និងខណ្ឌបឹងកេងកង ក្រុមហ៊ុននឹងប្រមូល និងដឹកជញ្ជូនរៀងរាល់ថ្ងៃនៅពេលយប់ចាប់ពីម៉ោង ៩ ដល់ម៉ោង ៥ ទៀបភ្លឺ។ ដូច្នេះម៉ោងបញ្ចេញសំរាមមាន ៣ ម៉ោង គឺចាប់ពី ៦-៩ យប់។ បើបញ្ចេញសំរាមខុសពីម៉ោងនេះនឹងទទួលការផាកពិន័យ។ ខណ្ឌជាយរាជធានី ចំនួន ៩ រួមមាន ខណ្ឌឫស្សីកែវ ខណ្ឌសែនសុខ ខណ្ឌជ្រោយចង្វារ ខណ្ឌដង្កោ ខណ្ឌព្រែកព្នៅ ខណ្ឌពោធិ៍សែនជ័យ ខណ្ឌកំបូល ខណ្ឌមានជ័យ និងខណ្ឌច្បារអំពៅ ក្រុមហ៊ុននឹងប្រមូល និងដឹកជញ្ជូន ដូចជា នៅតាមផ្លូវជាតិត្រូវប្រមូល និងដឹកជញ្ជូនរៀងរាល់ថ្ងៃនៅពេលយប់វេលាម៉ោង ៩ យប់ ដូច្នេះការបញ្ចេញសំរាមត្រូវចាប់ផ្តើមចន្លោះពីម៉ោង ៦ យប់រហូតដល់ម៉ោង ៩ យប់។ ផ្លូវធំ ត្រូវប្រមូល និងដឹកជញ្ជូនរៀងរាល់ថ្ងៃ (ពេលថ្ងៃ វេលាម៉ោង ៨ ព្រឹក ឬពេលយប់ ម៉ោង ៩)។ តាមផ្លូវរណបត្រូវប្រមូល និងដឹកជញ្ជូនរៀងរាល់ ២ ថ្ងៃម្ដង (ពេលថ្ងៃវេលាម៉ោង ៨ ព្រឹក ឬ ពេលយប់ វេលាម៉ោង ៩ យប់)។
រដ្ឋបាលរាជធានីភ្នំពេញបញ្ជាក់ថា ម៉ោងពេលបញ្ចេញសំរាម សំណល់រឹង នឹងត្រូវកំណត់ដោយអាជ្ញាធរមូលដ្ឋាន និងប្រតិបត្តិករប្រមូលតាមការជាក់ស្តែង។ សំរាម សំណល់រឹងស្ងួត ក្រុមហ៊ុននឹងប្រមូល និងដឹកជញ្ជូន ២ ដង/១ សបា្តហ៍ គឺនៅរៀងរាល់ថ្ងៃចន្ទ និងថ្ងៃសុក្រ។ ក្នុងករណីខកខានមិនបានបញ្ចេញសំរាម សំណល់រឹងតាមម៉ោងពេលកំណត់ (ពេលថ្ងៃត្រឹមម៉ោង ៨ ព្រឹក និងពេលយប់ ត្រឹមម៉ោង ៩ យប់) ត្រូវរង់ចាំបញ្ចេញនៅវេនក្រោយ ហើយមិនត្រូវយកសំរាមនេះមកទុកគ្មានសណ្តាប់ធ្នាប់ឡើយ។ សំរាម និងសំណល់រឹង មុននឹងបញ្ចេញត្រូវសម្រិតទឹកចេញដាក់ចូលទៅក្នុងប្រព័ន្ធលូឱ្យបានត្រឹមត្រូវ។ ត្រូវញែកសំរាម សំណល់រឹងជា ២ ប្រភេទ គឺសំរាមសើម និងសំរាមស្ងួតដោយដាក់នៅក្នុងថង់ដាច់ដោយឡែកពីគ្នា។ សម្រាប់ សំរាមសើម (សំណល់ម្ហូបអាហារ សំណល់សរីរាង្គ ផ្លែឈើ ផ្កា) ត្រូវដាក់ នៅក្នុងថង់ពណ៌ខ្មៅ។ ចំណែកសំរាមស្ងួត (ក្រដាស ក្រដាសកាតុង ឡាំង គ្រឿងប្លាស្ទិក ហ្វូម ជ័រ ដែក កំប៉ុង ដប...) ត្រូវដាក់ក្នុងថង់ពណ៌ស។
បើតាមរដ្ឋបាលរាជធានីភ្នំពេញ ការធ្វើកំណែទម្រង់នៃការគ្រប់គ្រងសំរាម និងសំណល់រឹងនៅរាជធានីភ្នំពេញ ចាប់ពីដើមខ្សែរហូតដល់ចុងខ្សែ ទទួលបានលទ្ធផលគួរជាទីមោទនៈក្នុងនោះ ការដេញថ្លៃជ្រើសរើសក្រុមហ៊ុនថ្មី ដើម្បីផ្តល់សេវាសម្អាត ប្រមូល និងដឹកជញ្ជូនសំរាម សំណល់រឹង នៅរាជធានីភ្នំពេញកន្លងមក ក្រុមហ៊ុនចំនួន ៣ ត្រូវបានជ្រើសរើសហើយបានចាប់ផ្ដើមប្រតិបត្តិការការងាររបស់ខ្លួនកាន់តែប្រសើរឡើងពី ១ ថ្ងៃទៅ ១ ថ្ងៃ ចាប់ពីថ្ងៃទី ១ ខែកក្កដា ឆ្នាំ ២០២១ មានទី ១ ក្រុមហ៊ុន 800 Super Global Action for Environment Awareness Public Limited បានផ្តល់សេវា ក្នុងតំបន់ទី ១ ដែលមាន ៥ ខណ្ឌ រួមមាន ខណ្ឌទួលគោក ខណ្ឌសែនសុខ ខណ្ឌឫស្សីកែវ ខណ្ឌជ្រោយចង្វារ និងខណ្ឌព្រែកព្នៅ។ ទី ២ ក្រុមហ៊ុន Mizuda Group Co.,Ltd បានផ្តល់សេវាក្នុងតំបន់ទី ២ ដែលមាន ៥ ខណ្ឌ គឺខណ្ឌដូនពេញ ខណ្ឌ៧មករា ខណ្ឌដង្កោ ខណ្ឌកំបូល និងខណ្ឌពោធិ៍សែនជ័យ។ ទី ៣ ក្រុមហ៊ុន CINTRI (Cambodia)/ Everbright (China) បានផ្តល់សេវា ក្នុងតំបន់ទី ៣ ដែលមាន ៤ ខណ្ឌ គឺ ខណ្ឌចំការមន ខណ្ឌបឹងកេងកង ខណ្ឌមានជ័យ និងខណ្ឌច្បារអំពៅ៕
វីដេអូ៖
