.jpg)
លោកស្រី ឱ វណ្ណឌីន រដ្ឋលេខាធិការក្រសួងសុខាភិបាល។ ហុង មិនា
ភ្នំពេញៈ កម្ពុជា មានករណីឆ្លងវីរុសកូវីដ ១៩ បំប្លែងថ្មី ប្រភេទអូមីក្រុងសរុបជាង ៣០០ ករណីហើយ ទាំងករណីនាំចូលពីក្រៅប្រទេស និងករណីឆ្លងក្នុងសហគមន៍គិតត្រឹមពាក់កណ្តាលខែមករា ឆ្នាំ ២០២២ ដែលធ្វើឱ្យក្រសួងសុខាភិបាលនៅតែបន្តអំពាវនាវឱ្យប្រជាពលរដ្ឋប្រុងប្រយ័ត្នខ្ពស់ពីវីរុសថ្មីនេះដែលមានការឆ្លងលឿនជាងវីរុសកូវីដ ១៩ ផ្សេងៗទៀត។
យោងតាមរបាយការណ៍របស់ក្រសួងសុខាភិបាលបានឱ្យដឹងថា មានអ្នកឆ្លងវីរុសកូវីដ-១៩បំប្លែងថ្មី អូមីក្រុងសរុបចំនួន ៣៥៥ ករណីហើយទាំងករណីនាំចូលពីក្រៅប្រទេស និងករណីឆ្លងក្នុងសហគមន៍ដោយក្នុងនោះករណីឆ្លងក្នុងសហគមន៍មានចំនួន ៦៤ ករណី។
លោកស្រី ឱ វណ្ណឌីន រដ្ឋលេខាធិការ និងជាអ្នកនាំពាក្យក្រសួងសុខាភិបាល បានថ្លែងកាលពីថ្ងៃទី ១៤ ខែមករាថា បច្ចុប្បន្ននេះវីរុសកូវីដ ១៩ ប្រភេទអូមីក្រុង កំពុងតែចរាចរនៅក្នុងប្រទេសកម្ពុជា ហើយក្រសួងក៏បានរកឃើញអ្នកឆ្លងវីរុសនេះជាបណ្តើរៗផងដែរ។
លោកស្រីមានប្រសាសន៍ថា៖ «ចំនួននៃការរកឃើញអូមីក្រុងនេះ នឹងមានកំណើនកើនឡើងជាបន្តបន្ទាប់។ ដូច្នេះហើយតាមការដឹកនាំដ៏ឆ្លាតវៃរបស់សម្តេចនាយករដ្ឋមន្ត្រីបានប្រកាសឱ្យយើងធ្វើយុទ្ធនាការចាក់វ៉ាក់សាំងដូសទី ៣ឬដូសជំរុញ និងដូសទី ៤ នេះឡើង»។
លោកស្រី ឱ វណ្ណឌីន ធ្លាប់បានលើកឡើងពីវីរុសប្រភេទអូមីក្រុងនេះថា មេរោគនេះមានការចម្លងលឿន ដែលធ្វើឱ្យប្រជាពលរដ្ឋត្រូវបន្តយកចិត្តទុកដាក់ការពារខ្លួនឱ្យបានហ្មត់ចត់មែនទែន ហើយមិនត្រូវភ្លេចខ្លួននោះទេ ដោយត្រូវចាំថា វីរុសកូវីដ ១៩ មិនដែលភ្លេច (យើង) ទេ ប៉ុន្តែបុគ្គលម្នាក់ៗងាយនឹងភ្លេចកូវីដ ១៩។
សម្រាប់អ្នកជំងឺកូវីដ ១៩ ប្រភេទអូមីក្រុងនេះត្រូវបានលោកនាយករដ្ឋមន្ត្រី ហ៊ុន សែន ប្រកាសមិនអនុញ្ញាតឱ្យសម្រាកព្យាបាលជំងឺនៅតាមគេហដ្ឋានឡើយ បើទោះបីជាអ្នកជំងឺស្ថិតក្នុងកម្រិតជីវភាពណាក៏ដោយ គឺត្រូវតែមកសម្រាកព្យាបាលនៅមន្ទីរពេទ្យ ដោយសារវីរុសនេះឆ្លងលឿនជាងវីរុសកូវីដ ១៩ ប្រភេទផ្សេងទៀត។
បើតាមមន្ត្រីក្រសួងសុខាភិបាលនៅទូទាំងប្រទេសមានមណ្ឌលព្យាបាលសម្រាប់អ្នកជំងឺកូវីដ ១៩ ប្រភេទអូមីក្រុងនៅក្នុងរាជធានីភ្នំពេញមានចំនួន ៥ ទីតាំង ហើយនៅតាមបណ្តាខេត្តមួយចំនួន គឺដាក់ឱ្យសម្រាកព្យាបាលនៅមន្ទីរពេទ្យខេត្ត។ មន្ទីរពេទ្យចំនួន ៥ ទីតាំងដែលមានដាក់ព្យាបាលអ្នកជំងឺកូវីដ ១៩ ប្រភេទអូមីក្រុង មានដូចជា មជ្ឈមណ្ឌលជាតិកំចាត់រោគរបេង និងហង់សិនមណ្ឌលព្យាបាលស្តាតអូឡាំពិកមណ្ឌលសុខភាពចាក់អង្រែ មន្ទីរពេទ្យមិត្តភាពខ្មែរ-សូវៀត និងមន្ទីរពេទ្យហ្លួងម៉ែ៕
