កំពង់ចាមៈ កម្លាំង​សមត្ថកិច្ច​នគរបាល​នៃ​ស្នងការ​នគរបាល​ខេត្តកំពង់ចាម កំពុង​សាកសួរ​ជនសង្ស័យ​ ១១ ​នាក់​ពាក់ព័ន្ធ​នឹង​បទល្មើស​គ្រឿងញៀន​ ៩ ​កញ្ចប់ នៅ​រៀល​ថ្ងៃទី​ ១៦ មករា និង​អាច​បញ្ជូនទៅ​តុលាការ​នា​ថ្ងៃនេះ បន្ទាប់ពី​ចាប់​បានជា​បន្តបន្ទាប់ កាលពី​ថ្ងៃទី​ ១៥ ខែមករា នៅ​ចំណុច​ចម្ការចេក ស្ថិត​ក្នុងភូមិ​ទួលថ្ម ឃុំ​ថ្មពូន ស្រុក​ព្រៃឈរ​។

លោក​ឧត្តមសេនីយ៍ត្រី​ ជីវសេងរស់ ស្នងការរង​នគរបាល​ខេត្តកំពង់ចាម​ថ្លែង​នៅ​ថ្ងៃទី​ ១៦ មករា ថា បន្ទាប់ពី​ទទួលបាន​ព័ត៌មាន​រាយការណ៍​ពី​ប្រជាពលរដ្ឋ និង​មានការ​អនុញ្ញាត​ពី​លោក វង្ស ប៊ុនវិសុទ្ធ ព្រះរាជអាជ្ញា​នៃ​អយ្យការ​អម​សាលាដំបូង​ខេត្ត​កំពង់ចាម នៅ​ថ្ងៃទី​ ១៥ ខែមករា ឆ្នាំ​ ២០២២ កម្លាំង​សមត្ថកិច្ច​ជំនាញ​បានធ្វើការ​ស្រាវជ្រាវ​ស្វែង​រក និង​ឃាត់ខ្លួន​ជនសង្ស័យ​បាន​ចំនួន​ ១១ ​នាក់​ពាក់ព័ន្ធ​បទល្មើស​គ្រឿងញៀន​នៅ​ចំណុច​ចម្ការចេក ស្ថិត​ក្នុង​ភូមិ​ទួលថ្ម ឃុំ​ថ្មពូន ស្រុក​ព្រៃឈរ ខេត្តកំពង់ចាម​។

លោក​ ជីវ សេងរស់ ប្រាប់ថា​៖ «​ក្រោយពី​មាន​ការផ្តល់​ព័ត៌មាន​ពី​ប្រជាពលរដ្ឋ យើង​ក៏បាន​ឃ្លាំមើល និង​ចុះទៅ​ធ្វើការ​ឃាត់ខ្លួន​ឆែក​ឃើញ​មាន​ថ្នាំញៀន​។ តាម​ចម្លើយ​ជនសង្ស័យ​យើង​ចាប់​បានជា​បន្តបន្ទាប់​តាម​លេខ​រៀង​ហ្នឹង ថា យក​ [​គ្រឿងញៀន​] ​ពី [​អ្នកណា​] យើង​បន្ត​ចាប់​តាម​លេខ​រៀង​ទី​ ១ ទី​ ២ ទី​ ៣ ទី​ ៤ រហូត​អ៊ីចឹងទៅ​»​។

លោក​ ជីវ សេងរស់ ឱ្យដឹងថា ជាមួយ​នឹង​ការឃាត់ខ្លួន សមត្ថកិច្ច​បាន​ដកហូត​វត្ថុតាង​រួមមាន ម្សៅ​ក្រាម​ពណ៌​ស​សង្ស័យ​ជា​ថ្នាំញៀន​ចំនួន​ ៩ ​កញ្ចប់ និង​ទូរស័ព្ទដៃ​ ៩ ​គ្រឿង​។ លោក​ថា នៅ​រសៀល​ថ្ងៃទី​ ១៦ មករា សមត្ថកិច្ច​ជំនាញ​កំពុង​បន្ត​សាកសួរ​ជនសង្ស័យ​ទាំងអស់​តាម​នីតិវិធី​។

លោក​ថ្លែងថា​៖ «​តាមមើល​ប្រហែលជា​អាច​ព្រឹក [​ថ្ងៃទី​ ១៧ ខែមករា​] ទើប​យើង​អាច​បញ្ជូនទៅ​តុលាការ​បាន ដោយសារ​នីតិវិធី ចំនួន​ ១១ ​នាក់ ត្រូវចំណាយ​ពេល​ច្រើន​ដែរ មើលទៅ​ទាល់តែ​ល្ងាច​បាន​ហើយ​»៕