ភ្នំពេញៈ សាលាដំបូងរាជធានីភ្នំពេញនឹងបើកសវនាការជំនុំជម្រះក្តីតាមការគ្រោងទុកនៅថ្ងៃទី ១៩ ខែមករា សំណុំរឿងលោក កឹម សុខា ក្រោមបទចោទ «សន្ទិដ្ឋភាពជាមួយបរទេស (ក្បត់ជាតិ)» ដើម្បីផ្តួលរំលំរដ្ឋាភិបាល បន្ទាប់ពីត្រូវបានពន្យារពេលមួយរយៈ ខណៈអតីតមេបក្សប្រឆាំងរូបនេះនៅតែបន្តជួបអង្គទូតនានាជាបន្តបន្ទាប់។
លោក ប្លង់ សុផល អ្នកនាំពាក្យអយ្យការអមសាលាដំបូងរាជធានីភ្នំពេញប្រាប់ភ្នំពេញប៉ុស្តិ៍នៅថ្ងៃទី ១៦ មករាថា សម្រាប់សវនាការដែលគ្រោងធ្វើនៅថ្ងៃទី ១៩ មករា ក្រុមប្រឹក្សា ដែលត្រូវជំនុំជម្រះគឺដដែលដូចលើកមុន មិនមានការផ្លាស់ប្តូរទេ ក្នុងនោះរួមមាន លោក កូយ សៅ ប្រធានក្រុមប្រឹក្សាជំនុំជម្រះ លោក សេង លាង និងលោក ធាម ច័ន្ទពិសិដ្ឋ ចៅក្រមប្រឹក្សា។ តំណាងអយ្យការអមសវនាការ លោក ប្លង់ សុផល ព្រះរាជអាជ្ញារងនៃអយ្យការអមសាលាដំបូងរាជធានីភ្នំពេញ និងក្រឡាបញ្ជីលោក ជ័យ វាសនា។
តាមដីកាកោះហៅចុះថ្ងៃទី ១៣ ខែធ្នូ ឆ្នាំ ២០២១ លោក ប្លង់ សុផល បានតម្រូវឱ្យលោក កឹម សុខា ត្រូវចូលរួមសវនាការក្នុងសំណុំរឿង «សន្ទិដ្ឋភាពជាមួយបរទេស» នៅព្រឹកថ្ងៃទី ១៩ ខែមករា ឆ្នាំ ២០២២ ជាកំហិត។
ភ្នំពេញប៉ុស្តិ៍ មិនអាចទាក់ទងលោកស្រី ម៉េង សុភារី និងលោក ចាន់ ចេន សហមេធាវីរបស់លោក កឹម សុខា សុំធ្វើអត្ថាធិប្បាយបានទេ នៅថ្ងៃទី ១៦ មករា។
លោក យង់ ពៅ គ្រូបង្រៀនផ្នែកវិទ្យាសាស្ត្រនយោបាយនៃរាជបណ្ឌិត្យសភាកម្ពុជា ថ្លែងនៅថ្ងៃទី ១៦ ខែមករាថា ការបើកសវនាការជំនុំជម្រះ ករណីលោក កឹម សុខា នៅពេលខាងមុខនេះជានីតិវិធីរបស់តុលាការទៅតាមអំណាចឯករាជ្យរបស់ខ្លួន បន្ទាប់ពីបានជាប់គាំងមួយរយៈពេលវែងដោយសារការរាតត្បាតនៃជំងឺកូវីដ ១៩។ លោកថ្លែងថា៖ «ខ្ញុំយល់ឃើញថា លោក កឹម សុខា អ្នកនយោបាយដែលមានអ្នកគាំទ្រ។ អ៊ីចឹង នៅពេលដែលធ្វើសវនាការ គាត់ប្រាកដជាមានអ្នកគាំទ្រ និងចូលរួមមើលហូរហែហើយ អ៊ីចឹងទេ ជានីតិវិធីរបស់តុលាការរង់ចាំឱ្យកូវីដវាស្ងប់សិន»។
លោក កឹម សុខា ប្រធានអតីតគណបក្សសង្គ្រោះជាតិបានសរសេរនៅលើទំព័រហ្វេសប៊ុកផ្លូវការរបស់លោកកាលពីថ្ងៃទី ១១ ខែមករា ក្រោយជំនួបពិភាក្សាជាមួយលោកស្រី Amanda Milling រដ្ឋមន្ត្រីទទួលបន្ទុកកិច្ចការអន្តរជាតិ ខូ-មិនវែល និងអភិវឌ្ឍន៍អង់គ្លេស ខណៈលោកស្រីមកបំពេញទស្សនកិច្ចផ្លូវការនៅកម្ពុជាថា៖ «ចក្រភពអង់គ្លេសនឹងបន្តតាមដានដោយយកចិត្តទុកដាក់អំពីដំណើរការ និងលទ្ធផលនៃសវនាការនាពេលខាងមុខដែលពាក់ព័ន្ធនឹងសេរីភាពរបស់ខ្ញុំក្នុងការចូលរួមដំណើរការប្រជាធិបតេយ្យនៅកម្ពុជានាពេលខាងមុខផងដែរ»។
នៅក្នុងខែមករា ដើមឆ្នាំថ្មី ២០២ ២នេះក្រៅពីជួបអ្នកការទូតសំខាន់ៗនៃសហគមន៍អឺរ៉ុបលោក កឹម សុខា ក៏បានជួបជាមួយឯកអគ្គរាជទូតជប៉ុន និងជួបជាមួយនឹងរដ្ឋមន្ត្រី (Minister of State) ទទួលបន្ទុកកិច្ចការអាស៊ីនៃក្រសួងការបរទេសអង់គ្លេសក្នុងពេលថ្មីៗនេះ និងឯកអគ្គរដ្ឋទូតបារាំង ឯកអគ្គរដ្ឋទូតសាធារណរដ្ឋឆេក ឯកអគ្គរដ្ឋទូតសហព័ន្ធអាល្លឺម៉ង់ និងឯកអគ្គរដ្ឋទូតស្តីទីនៃគណៈប្រតិភូសហភាពអឺរ៉ុប ប្រចាំព្រះរាជាណាចក្រកម្ពុជាផងដែរ។
លោក កឹម សុខា ថ្លែងថា៖ «ការដែលអ្នកការទូតតំណាងប្រទេសជាមិត្តរបស់កម្ពុជាដែលតែងតែជួបពិភាក្សាជាមួយខ្ញុំនោះ មិនមែនត្រឹមតែស្វែងយល់ពីទស្សនៈ និងទទួលស្គាល់នូវគុណតម្លៃនៃការតស៊ូដោយអហិង្សា ការលះបង់ដោយការអត់ធ្មត់ ដើម្បីប្រជាធិបតេយ្យ និងសិទ្ធិមនុស្សរបស់ខ្ញុំប៉ុណ្ណោះទេ លើសពីនេះទៅទៀត គឺជាការបញ្ជាក់ថា ការដែលយើងមិនបានធ្វើអ្វីខុស មិនបង្កការឈឺចាប់ដល់អ្នកដទៃ និងដោយយើងប្រកាន់យកនូវគោលការណ៍ដ៏ត្រឹមត្រូវនោះ យើងមិននៅឯកោឡើយ»។
លោក កឹម សុខា ត្រូវបានចាប់ខ្លួនកាលពីថ្ងៃទី ៣ កញ្ញា ឆ្នាំ ២០១៧ នៅគេហដ្ឋានរបស់លោក ក្នុងខណ្ឌទួលគោក និងត្រូវបានបញ្ជូនទៅឃុំខ្លួននៅក្នុងពន្ធនាគារ ត្រពាំងផ្លុង ខេត្តត្បូងឃ្មុំ ដោយចោទពីបទ «សន្ទិដ្ឋភាពជាមួយបរទេស» ដើម្បីផ្តួលរំលំរដ្ឋាភិបាលដោយគិតមកដល់ពេលនេះ គឺមានរយៈពេល ៤ ឆ្នាំហើយ។ លោក កឹម សុខា ត្រូវបានដោះលែងឱ្យនៅក្រៅឃុំ កាលពីថ្ងៃទី ១០ ខែវិច្ឆិកា ឆ្នាំ ២០១៩ ប៉ុន្តែត្រូវដាក់ឱ្យស្ថិតក្រោមការត្រួតពិនិត្យតាមផ្លូវតុលាការ ទី ១ មិនត្រូវចេញក្រៅព្រំប្រទល់ដែនដីនៃព្រះរាជាណាចក្រកម្ពុជា ទី ២ មិនត្រូវធ្វើសកម្មភាពនយោបាយ និងទី ៣ ត្រូវឆ្លើយតបនឹងការកោះហៅពីគ្រប់សមត្ថកិច្ច៕
វីដេអូ៖