បាត់ដំបងៈ អភិបាលរងខេត្តបាត់ដំបងបានស្នើទៅគណៈអភិបាលក្រុង-ស្រុកទាំង ១៤ នៅក្នុងខេត្តត្រូវផ្សព្វផ្សាយ និងមានវិធានការទប់ស្កាត់ការទន្ទ្រានកាន់កាប់ដីរដ្ឋដោយខុសច្បាប់ ដោយមានប្រជាពលរដ្ឋមួយចំនួនកំពុងបន្តសកម្មភាពទន្ទ្រាន កាន់កាប់ សាងសង់សំណង់លើដីកម្មសិទ្ធិរបស់រដ្ឋ ដូចជា ដីសួនច្បារ ដីចំណីផ្លូវ ចំណីប្រឡាយ ចំណីស្ទឹង ចំណីបឹងបួ ចំណីទន្លេ ដីព្រៃ ដីភ្នំ។
យោងតាមលិខិតដែលចុះហត្ថលេខាដោយ លោក យឹម សៀប អភិបាលរងខេត្តបាត់ដំបង កាលពីថ្ងៃទី ១១ ខែមករា ឆ្នាំ ២០២២ ឱ្យដឹងថា អាជ្ញាធរដែនដីខ្លះបានបញ្ជាក់លើលិខិតទិញ-លក់ចេញលិខិតបញ្ជាក់ការកាន់កាប់ និងបានធ្វើកិច្ចសន្យាឱ្យប្រជាពលរដ្ឋសាងសង់សំណង់លើដីរដ្ឋជាបណ្តោះអាសន្ន ដែលមិនមានលក្ខណៈស្របច្បាប់។ ដើម្បីទប់ស្កាត់ករណីខាងលើនេះ រដ្ឋបាលខេត្តសូមស្នើលោក លោកស្រីអភិបាលនៃគណៈអភិបាលក្រុង-ស្រុកទាំង ១៤ ត្រូវផ្សព្វផ្សាយ ណែនាំ និងមានវិធានការជាបន្ទាន់៖ ១. ហាមឃាត់ការទន្ទ្រាន កាន់កាប់ដីជាកម្មសិទ្ធិរបស់រដ្ឋ ដែលមិនស្របគោលការណ៍ នីតិវិធីច្បាប់ និងបទដ្ឋានគតិយុត្តពាក់ព័ន្ធ។ និង ២. ត្រូវលុបចោលរាល់លិខិតបទដ្ឋានទាំងឡាយ ដែលបានបញ្ជាក់ដោយអាជ្ញាធរឱ្យប្រជាជនសាងសង់សំណង់ជាបណ្ដោះអាសន្ន និងការកាន់កាប់ដីរដ្ឋដែលមិនស្របច្បាប់។
លោក យឹម សៀប បានសរសេរថា៖ «ចំពោះអាជ្ញាធរដែនដីណានៅតែបន្តចេញលិខិតបញ្ជាក់ ឬធ្វើកិច្ចសន្យាដូចបានរៀបរាប់ខាងលើត្រូវទទួលខុសត្រូវចំពោះមុខច្បាប់ជាធរមាន»។
លោក សើ សាម៉េត អភិបាលស្រុកសំឡូត ខេត្តបាត់ដំបង ប្រាប់ភ្នំពេញប៉ុស្តិ៍ ឱ្យដឹងថាលោកក៏បានទទួលលិខិតណែនាំនេះពីរដ្ឋបានខេត្តរួចហើយ ។ ក្រៅពីនេះក៏បានទទួលលិខិតណែនាំពីក្រសួងកសិកម្ម រុក្ខាប្រមាញ់ និងនេសាទ និងក្រសួងបរិស្ថានជាដើម ក្នុងការទប់ស្កាត់ និងទន្ទ្រានយកដីរបស់រដ្ឋធ្វើជាកម្មសិទ្ធិ។
លោកបន្តថា បន្ថែមពីនេះ រដ្ឋបាលខេត្តក៏បានចេញសេចក្តីណែនាំ ចម្លងបន្តពីស្ថាប័នទាំងនោះផ្សព្វផ្សាយទៅប្រជាពលរដ្ឋ និងគ្រប់គោលដៅទាំងអស់ក្នុងមូលដ្ឋានស្រុកឱ្យប្រជាពលរដ្ឋទទួលបានការយល់ដឹង និងចូលរួមទប់ស្កាត់ទាំងអស់គ្នាពីការកាប់ទន្ទ្រានព្រៃ និងដីសាធារណៈរបស់រដ្ឋ។
លោកថ្លែងថា៖ «បន្ទាប់ពីការទទួលបានការណែនាំ រដ្ឋបាលស្រុកបានយកចិត្តទុកដាក់ច្រើន និងដោយប្រយ័ត្នប្រយែងជាទីបំផុតក្នុងការទប់ស្កាត់នូវរាល់សកម្មភាពកាប់រាន និងការកាប់ដីព្រៃជាដើម កុំឱ្យមានការកើតឡើងនៅក្នុងមូលដ្ឋានបន្តទៀត»។
ដោយឡែក រដ្ឋបាលស្រុកគាស់ក្រឡកាលពីថ្ងៃទី ១១ ខែមករា ឆ្នាំ ២០២២ ក៏បានចេញសេចក្តីជូនដំណឹងមួយដល់ប្រជាពលរដ្ឋ ដែលរស់នៅទីប្រជុំជនផ្សារនានាក្នុងស្រុក ក៏ដូចជា ប្រជាពលរដ្ឋនៅតាមបណ្តាមូលដ្ឋាន ឃុំ ភូមិ ដែលបានសាងសង់ផ្ទះ ឬអគារសំណង់ តយ៉ាបនៅលើ ឬលើដីសាធារណៈរបស់ចំណីផ្លូវ អូរ បឹងបួ និងប្រឡាយចូលរួមសហការរុះរើចេញចាប់ពីថ្ងៃជូនដំណឹងនេះ ដោយមានរយៈពេល ២០ ថ្ងៃ គិតចាប់ពីថ្ងៃទី ១១ ខែមករា ឆ្នាំ ២០២២ រហូតដល់ថ្ងៃទី ៣១ ខែមករា ឆ្នាំ ២០២២ ដើម្បីងាយស្រួលក្នុងការអភិវឌ្ឍនានាក្នុងពេលខាងមុខ។
រដ្ឋបាលស្រុកបញ្ជាក់ថា ដើម្បីរក្សាបាននូវសណ្តាប់ធ្នាប់ និងសុខសុវត្ថិភាព ធានាគុណភាពនៃការរស់នៅប្រកបដោយ របៀបរៀបរយ មានសោភ័ណភាព បរិស្ថានល្អ និងសុវត្ថិភាពក្នុងការធ្វើចរាចរណ៍របស់បងប្អូនប្រជាពលរដ្ឋក្នុងទូទាំងភូមិសាស្ត្រស្រុកគាស់ក្រឡ រដ្ឋបាលស្រុកមានផែនការរៀបចំកែលម្អទៅលើប្រព័ន្ធហេដ្ឋារចនាសម្ព័ន្ធនានាដូចជា ចំណីផ្លូវ អូរ បឹងបួរ ប្រឡាយ និងដីសាធារណៈរបស់រដ្ឋក្នុងភូមិសាស្ត្រស្រុកគាស់ក្រឡស្របតាមទិសដៅអភិវឌ្ឍន៍ លើកកម្ពស់ គុណភាព និងសុខុមាលភាពក្នុងការរស់នៅរបស់បងប្អូនប្រជាពលរដ្ឋក្នុងស្រុក។
រដ្ឋបាលស្រុកគាស់ក្រឡបន្តថា៖ «ករណីបងប្អូនប្រជាពលរដ្ឋណាមិនអនុវត្តតាមខ្លឹមសារសេចក្តីជូនដំណឹងនេះ ផុតរយៈពេលកំណត់ ក្រុមការងារនៃរដ្ឋបាលស្រុកនឹងចុះទៅធ្វើការរុះរើផ្ទាល់ ហើយមិនទទួលខុសត្រូវរាល់ការខូចខាតទ្រព្យសម្បត្តិណាមួយរបស់បងប្អូនប្រជាពលរដ្ឋឡើយ។
លោក ប៉ែន ប៊ុណ្ណារ៍ មន្ត្រីកម្មវិធីពង្រឹងសិទ្ធិអំណាចសហគមន៍មូលដ្ឋាននៃសមាគមអាដហុកបានសម្តែងការស្វាគមន៍ចំពោះចំណាត់ការរបស់អាជ្ញាធរក្នុងការមានវិធានការបែបនេះ ដើម្បីរក្សាដីរបស់រដ្ឋឱ្យបានគង់វង្ស។ ទោះយ៉ាងណាលោកថា ការទន្ទ្រានយកដីរដ្ឋ និងរំលោភយកដីរបស់រដ្ឋធ្វើជាកម្មសិទ្ធិ ភាគច្រើនគឺសុទ្ធតែមន្ត្រីធំៗ និងឧកញ៉ា និងបានបង្ខំឱ្យមន្ត្រីថ្នាក់ក្រោមជាតិស៊ីញ៉េ។ ករណីនេះ ត្រូវតែដាក់បន្ទុកលើមន្ត្រីថ្នាក់ជាតិទៀត ព្រោះអ្នកទាំងអស់គ្នានេះ ធ្វើឱ្យខូចរបៀបរបប និងខុសច្បាប់។
លោក ផៃ ស៊ីផាន អ្នកនាំពាក្យរាជរដ្ឋាភិបាលកម្ពុជាប្រាប់ភ្នំពេញប៉ុស្តិ៍នៅថ្ងៃទី ១៦ ខែមករា ឆ្នាំ ២០២២ នេះ ឱ្យដឹងថា ការទន្ទ្រាន និងរំលោភយកដីរបស់រដ្ឋធ្វើជាកម្មសិទ្ធិ មិនមែនភាគច្រើនជាមន្ត្រី ឬក៏ឧកញ៉ានោះដែរ ប្រជាពលរដ្ឋធម្មតាក៏មានការចូលរួមប្រព្រឹត្តដែរ ដែលអ្នកតាមដានសង្គម នៅពេលដែលប្រទះឃើញករណី ត្រូវរាយការណ៍នៅក្នុងទំព័រហ្វេសប៊ុកលោកនាយករដ្ឋមន្ត្រី ហ៊ុន សែន៕