The Phnom Penh Post Search

Search form




Logo of Phnom Penh Post newspaper Phnom Penh Post - កាកបាទ​ក្រហម​កម្ពុជា​សហការ​បណ្ដុះបណ្ដាល​វិជ្ជា​សង្គ្រោះ​បឋម​ដល់​មន្ត្រី និង​ប្រជាសហគមន៍

កាកបាទ​ក្រហម​កម្ពុជា​សហការ​បណ្ដុះបណ្ដាល​វិជ្ជា​សង្គ្រោះ​បឋម​ដល់​មន្ត្រី និង​ប្រជាសហគមន៍

Content image - Phnom Penh Post
កាកបាទ​ក្រហម​កម្ពុជា​សហការ​បណ្ដុះបណ្ដាល​វិជ្ជា​សង្គ្រោះ​បឋម​ដល់​មន្ត្រី និង​ប្រជាសហគមន៍។ រូបថត CRC

កាកបាទ​ក្រហម​កម្ពុជា​សហការ​បណ្ដុះបណ្ដាល​វិជ្ជា​សង្គ្រោះ​បឋម​ដល់​មន្ត្រី និង​ប្រជាសហគមន៍

ព្រះវិហារៈ​ កាកបាទក្រហម​កម្ពុជា​សហការ​ជាមួយ​អង្គការ USAID Greening Prey Lang បានផ្តល់​ការបណ្តុះបណ្តាល​វិជ្ជា​សង្គ្រោះ​បឋម​ដល់​បុគ្គលិក និង​ប្រជាសហគមន៍​ដើម្បី​ផ្តល់​ចំណេះដឹង​ជា​មូលដ្ឋាន​ក្នុងការ​ជួយសង្គ្រោះ​ជីវិតបឋម ខណៈ​អ្នកជំនាញ​មើលឃើញ​​ថា ពលរដ្ឋ​នៅតាម​មូលដ្ឋាន​ចាំបាច់​ត្រូវ​ការចេះ​ជំនាញ​ទាំងនេះ​។

វគ្គ​បណ្តុះបណ្តាល​វិជ្ជា​សង្គ្រោះបឋម​នេះ​ត្រូវបាន​ធ្វើឡើង​នៅក្នុង​ស្រុក​ឆែប ខេត្តព្រះវិហារ​រយៈពេល​ ២ ​ថ្ងៃ គឺ​ថ្ងៃទី ​១៦ ដល់​ ១៧ ខែមករា ឆ្នាំនេះ ដោយមាន​សិក្ខាកាម​ ២២ ​នាក់ បាន​ចូលរួម​ក្នុងនោះ​ស្រី​ ៩​ នាក់​។ នេះ​បើតាម​នាយកដ្ឋាន​សុខភាព​កាកបាទ​ក្រហម​កម្ពុជា​។

លោក អុប ពុទ្ធា ប្រធានការិយាល័យ​វិជ្ជា​សង្គ្រោះ​បឋម​កាកបាទ​ក្រហម​កម្ពុជា​ដែលជា​មន្ត្រី​ជំនាញ​បណ្តុះបណ្តាល​ក្នុង​វគ្គ​នេះ​បាន​ប្រាប់​ភ្នំពេញ​ប៉ុស្តិ៍​នៅ​ថ្ងៃទី​ ១៧ មករា​ថា វគ្គ​បណ្តុះបណ្តាល​នេះ​គឺ​ដើម្បី​ផ្តល់​ជា​ចំណេះដឹង​ជា​មូលដ្ឋាន​ក្នុង​ការជួយ​សង្គ្រោះ​ជីវិត​បឋម​ក្នុង​ករណី​ចាំបាច់​នៅ​កន្លែង​ធ្វើការ និង​ក្នុងពេល​ដើរល្បាត​ក្នុងព្រៃ​មុននឹង​អាច​បញ្ជូន​បន្តទៅ​សង្គ្រោះ​នៅ​មន្ទីរពេទ្យ​។

លោក​បន្តថា ដោយសារ​តែ​ប្រជាសហគមន៍ និង​អ្នកធ្វើការ​នៅ​ព្រៃឡង់ ប្រឈម​នឹង​ហានិភ័យ ហើយ​ពេល​ពួកគេ​មាន​គ្រោះអាសន្ន​មិនបាន​ដឹង​ពី​វិធី​សង្គ្រោះ​នោះទេ ហើយ​ការជួយ​សង្គ្រោះ​ខ្លះ​បាន​ប៉ះពាល់​ដល់​ជនរងគ្រោះ​កាន់តែ​ធ្ងន់ធ្ងរ​ផងដែរ​។ ដូច្នេះ​ពួកគេ​គួរតែ​ទទួលបាន​ការបណ្តុះបណ្តាល​ដើម្បី​ជួយ​ជីវិត​ខ្លួនឯង និង​អ្នកដទៃ​។

លោក​បាន​បញ្ជាក់ថា​៖ «​គាត់​គឺជា​ប្រជាសហគមន៍​ដែល​ចុះ​ល្បាត អ៊ីចឹង​ប្រឈម​ហានិភ័យ​ណាស់ ដូច្នេះ​នៅពេល​ពួកគាត់​​ទទួលបាន​ការបណ្តុះបណ្តាល​ហើយ គាត់​យកទៅ​ការពារ​ខ្លួន និង​អ្នក​ជុំវិញ​ក្នុង​សហគមន៍​គាត់ ដើម្បី​ទប់ស្កាត់​ហានិភ័យ​ផ្សេង​»​។

លោក ពុទ្ធា បន្ថែមថា​៖ «​ការបណ្តុះបណ្តាល​នេះ គឺជា​ចំណុច​សំខាន់​ណាស់ ព្រោះ​ពីមុនមក ពួកគាត់​ខ្វះ​ចំណេះដឹង​នេះ​មិនដឹង​ជួយសង្គ្រោះ​បឋម​យ៉ាងម៉េច​ទេ នៅពេល​មាន​បញ្ហា​។ ប៉ុន្តែ​ឥឡូវ យើង​បានផ្តល់​បទពិសោធ​ ​និង​មេរៀន​ទ្រឹស្តី អនុវត្ត​ផ្ទាល់ៗ​​ដែល​នឹង​ជួយ​គាត់​ឱ្យបាន​ដឹង​​ច្រើន​ក្នុង​ការជួយ​បឋម​»​។

វគ្គ​បណ្តុះបណ្តាល​វិជ្ជា​សង្គ្រោះបឋម​នេះ​គឺ​ត្រូវបាន​បង្កើតឡើង​ដោយមាន​កិច្ចសហការ​រវាង​​កាកបាទ​ក្រហម​កម្ពុជា​ជាមួយ​អង្គការ USAID Greening Prey Lang ហើយ​វគ្គ​នេះ​នឹង​បន្ត​ការបណ្តុះបណ្តាល​ដល់​ប្រជាសហគមន៍​ក្នុង​ខេត្តព្រះវិហារ និង​ខេត្តក្រចេះ បន្តទៀត​ក្នុង​​ពេលខាងមុខ បន្ទាប់ពី​កន្លងទៅ បានបញ្ចប់​វគ្គ​បណ្តុះបណ្តាល​ដូចគ្នានេះ​ដល់​មន្ត្រី​ស្នូល និង​ប្រជាសហគមន៍​មួយចំនួន​នៅ​ខេត្តកំពង់ធំ និង​ខេត្តស្ទឹងត្រែង​។ ​នេះ​បើតាម​លោក​អុ​ប ពុទ្ធា​។

ជាមួយ​គ្នា​នេះ លោក អុប ពុទ្ធា បានឱ្យដឹង​ដែរ​ថា អ្នកជំនាញ​បាន​ចែករំលែក​វិធីសាស្ត្រ​ជួយសង្គ្រោះ​បឋម​ជាច្រើន​ពាក់ព័ន្ធ​នឹង​បញ្ហា​ដួល​ធ្លាក់​បណ្តាលឱ្យ​ប៉ះទង្គិច​លើ​រាងកាយ ជាពិសេស​លើ​ឆ្អឹង​សំខាន់ៗ​ដែល​ត្រូវ​សង្គ្រោះ​ដោយ​ប្រុងប្រយ័ត្ន​ចៀសវាង​បង្ក​ផលប៉ះពាល់​កាន់តែ​ធ្ងន់​ដល់​ជនរងគ្រោះ​។ ​ជាងនេះទៅទៀត ការជួយ​សង្គ្រោះ​​ជនរងគ្រោះ​នៅពេល​ពួកគេ​កំពុង​ស្ថិតនៅ​ទី​ឆ្ងាយ​ពី​មណ្ឌល​សុខភាព​ ឬ​កន្លែង​សង្គ្រោះ​ក៏ត្រូវ​បានបង្ហាញ​ផងដែរ ដើម្បី​អាចជួយ​បន្តជីវិត​ដល់​ជនរងគ្រោះ​ប្រកបដោយ​ភាពត្រឹមត្រូវ​។

អ្នកស្រី កឹម ចរិយា មន្ត្រី USAID Greening Prey Lang ខេត្តព្រះវិហារ​ដែល​ចូលរួម​ក្នុង​វគ្គ​បណ្តុះបណ្តាល​នេះ​បាន​ថ្លែងថា ការទទួល​បាន​វគ្គ​បណ្តុះបណ្តាល​នេះ​គឺ​ពិតជា​មាន​ប្រយោជន៍​សម្រាប់​អ្នកស្រី ជាពិសេស​ប្រជាសហគមន៍​។ ​អ្នកស្រី​បន្តថា ក្នុងករណី​ប្រជាសហគមន៍​មិន​ទទួល​បាន​ចំណេះដឹង​ទាំងនេះ​គឺ​នាំឱ្យ​ការជួយ​សង្គ្រោះ​ធ្វើឡើង​ដោយ​ខុស​បច្ចេកទេស ដែល​នាំ​​ឱ្យមាន​គ្រោះថ្នាក់​ទៅវិញ​។

អ្នកស្រី​ថា​៖ «​ដោយសារ​នៅ​​តាម​តំបន់​សហគមន៍​គឺ​ឆ្ងាយ​ពី​ពេទ្យ ហើយ​អ៊ីចឹងទៅ ការងារ​គាត់​ចុះ​ព្រៃ​ចុះ​អី ដែល​ឆ្ងាយ​នៅ​​ក្នុង​តំបន់​ដាច់ស្រយាល ហើយ​ប្រឈម​នឹង​គ្រោះថ្នាក់​នានា ដូចជា​ពស់​ចឹក​ជាដើម​។ ​ដល់ពេល​​គាត់​មិនបាន​រៀន គាត់​ឃើញ​គ្រោះថ្នាក់​អី ចេះតែ​ជួយ​អត់​មាន​បច្ចេកទេស​អី​ទៅជា​ធ្វើឱ្យ​អ្នករងគ្រោះ​ស្លាប់​ក៏មាន​»​។

អ្នកស្រី កឹម ចរិយា ដែល​ធ្លាប់​ប្រាស្រ័យ​ផ្ទាល់​ជាមួយ​ប្រជាសហគមន៍​បាន​ថ្លែងថា ចំណេះដឹង​ពី​ការជួយ​សង្គ្រោះបឋម​របស់​ប្រជាសហគមន៍​គឺ​​នៅមាន​កម្រិត ដោយ​អ្នកស្រី​ចង់ឱ្យ​មាន​ការបណ្តុះបណ្តាល​បែបនេះ​ឱ្យ​កាន់តែ​ច្រើន និង​បាន​ទូលំទូលាយ​ជាង​នេះ ដើម្បី​ផ្តល់​ចំណេះដឹង​ជា​មូលដ្ឋាន​ដល់​ប្រជាពលរដ្ឋ​៕

អត្ថបទគួរចាប់អារម្មណ៍