ភ្នំពេញៈ លោកនាយក​រដ្ឋមន្ត្រី​ ហ៊ុន សែន នឹង​អញ្ជើញ​ចូលរួម​ធ្វើជា​គណៈអធិបតី​បើក​ជា​ផ្លូវការ​នៃ​វេទិកា​ទេសចរណ៍​អាស៊ាន​ (ATF)​ ឆ្នាំ​ ២០២២ ដែល​កម្ពុជា​ធ្វើជា​ម្ចាស់ផ្ទះ​នៅ​ថ្ងៃទី​ ១៨ មករា​នៅ​ខេត្ត​ព្រះសីហនុ ហើយ​វេទិកា​នេះ​នឹង​ជា​ឱកាស​ក្នុងការ​ទាក់ទាញ​ភ្ញៀវទេសចរ សម្រាប់​គោលដៅ​ទេសចរណ៍​ប្រកប​ដោយ​សុវត្ថិភាព​។

រដ្ឋបាលខេត្ត​ព្រះសីហនុ​ក្នុង​នាម​ជា​ខេត្ត ដែល​ទទួល​បន្ទុក​រៀប​ចំ​ព្រឹត្តិការណ៍​ដ៏ធំ​នេះ ឱ្យដឹងថា វេទិកា​ទេសចរណ៍​អាស៊ាន ឆ្នាំ​ ២០២២ នឹង​ក្លាយជា​ព្រឹត្តិការណ៍​ដ៏សំខាន់​ក្នុង​ការប្រកាស​បើក​គោលដៅ​ទេសចរណ៍​ក្នុង​តំបន់​អាស៊ាន​ឡើងវិញ​ជា​ផ្លូវការ បន្ទាប់ពី​រង​ការរំខាន ដោយសារ​ការរីក​រាលដាល​ជំងឺ​កូវីដ ​១៩ អស់​រយៈពេល​ជាង​ ២​ ឆ្នាំ​មកនេះ​។ រដ្ឋបាលខេត្ត​បញ្ជាក់ថា ព្រឹត្តិការណ៍​អន្តរជាតិ​នេះ នឹង​ជួយ​ផ្សព្វផ្សាយ​ពី​ប្រទេស​កម្ពុជា ជាគោលដៅ​ទេសចរណ៍​សុវត្ថិភាព​មួយ​ក្នុង​តំបន់​អាស៊ាន​។

រដ្ឋបាលខេត្ត​បន្តថា គណៈប្រតិភូ​ដែល​ត្រូវ​ចូលរួម​ក្នុង​វេទិកា​ទេសចរណ៍​អាស៊ាន​ (ATF 2022) បាន​មកដល់​កម្ពុ​ជាមុន មាន​ ៣- ​ប្រទេស គឺ សិង្ហបុរី ម៉ាឡេស៊ី និង​ឥណ្ឌូនេស៊ី ដោយបាន​មកដល់​ព្រលានយន្តហោះ​អន្តរជាតិ​ខេត្ត​ព្រះសីហនុ ដោយ​សុវត្ថិភាព​នៅ​វេលា​ម៉ោង​ ៨ ​និង​ ២០​ នាទី​យប់​ថ្ងៃទី​ ១៦ ខែ​មករា ឆ្នាំ​ ២០២២​។ រីឯ​គណៈប្រតិភូ​នៃ​ប្រទេស​ដទៃ​ទៀត​នឹង​មកដល់​ជា​បន្តបន្ទាប់ ដើម្បី​ចូលរួម​ក្នុង​ព្រឹត្តិការណ៍​ដ៏មាន​សារៈសំខាន់ និង​ជា​ប្រវត្តិសាស្ត្រ​នេះ​។

អភិបាលរង​ខេត្ត​ព្រះសីហនុ​លោក​ ឡុង ឌីម៉ង់ ប្រាប់​ភ្នំពេញ-ប៉ុស្តិ៍​ថា អាជ្ញាធរខេត្ត បានរៀបចំ​ខ្លួន​រួចជាស្រេច​សម្រាប់​ការបើក​ជា​ផ្លូវការ​នៃ​វេទិកា​នេះ ក្រោម​វត្តមាន​លោកនាយក​រដ្ឋមន្ត្រី​ ហ៊ុន សែន ជាពិសេស​នោះ​បាន​រៀបចំ​ទីតាំង និង​តំបន់​ស្អាតៗ​សម្រាប់​គណៈប្រតិភូ និង​ភ្ញៀវទេសចរ​ផងដែរ​។

លោក​ថ្លែងថា​៖ «​សម្រាប់​សាលាខេត្ត​ក្នុង​នាម​ជា​ម្ចាស់ផ្ទះ​បាន​ត្រៀម​គ្រប់លក្ខណ​សម្បត្តិ​ទាំងអស់ ទាំង​ការងារ​រៀបចំ គ្រប់​គោលដៅ សម្រាប់​ភ្ញៀវ​របស់​វេទិកា​ទេសចរណ៍​អាស៊ាន ​[​រៀបចំ​] ​ឱ្យបាន​​ត្រឹមត្រូវ សុវត្ថិភាព សណ្តាប់ធ្នាប់ ជាពិសេស​ចៀស​ឆ្ងាយ​ពី​ជំងឺ​កូវីដ​»​។

លោក​បន្តថា ដោយឡែក​ការងារ​កិច្ចការ​ប្រជុំ​ផ្សេងៗ​គឺ​ក្រសួង​ទេសចរណ៍​ជា​អ្នករៀបចំ រីឯ​ថ្នាក់​ខេត្ត​បាន​ជួយ​សហការ​ដូចជា​ពិធី​ដាំ​ដើមឈើ ជា​និមិត្តរូប​របស់​រដ្ឋមន្ត្រី​ទេសចរណ៍​អាស៊ាននៅ​កន្លែង​ថ្ម​ ៣ ​ដុំ​។

លោក​បន្តថា​៖ «​ក្រៅពីនោះ​យើង​រៀបចំ​សុវត្ថិភាព​សណ្តាប់ធ្នាប់​នៅ​កន្លែង​ប្រារព្ធ​ពិធី​នៅ​សណ្ឋាគារ​សុខា ហើយ​នៅ​កន្លែង​ទីលាន​សម្តេច​តេជោ​នៅ​កន្លែង​ពិធី​បើក​ជា​ផ្លូវការ​នៅ​ថ្ងៃស្អែក (១៨ មករា​)​។ យើង​បានរៀបចំ​សម្រាប់​ភ្ញៀវទេសចរ​ដែល​បាន​ចូលរួម​ទាំង​អ្នកលក់​ទិញ អ្នក​សារព័ត៌មាន និង​បានរៀបចំ​ដំណើរ​កម្សាន្ត​នៅតាម​បណ្តា​កោះ​ផងដែរ​»​។

​តាម​រដ្ឋបាលខេត្ត​គិត​ត្រឹម​ព្រឹក​ថ្ងៃទី​ ១៧ មករា ឆ្នាំ ​២០២២ ការងារ​រៀបចំ​ព្រឹតិ្តការណ៍​ទាំងមូល ទីតាំង​សម្រាប់​ពិព័រណ៍​ទេសចរណ៍​ (​ស្តង់​) កម្មវិធី​បើក កម្មវិធី​បិទ និង​កម្មវិធី​ពាក់ព័ន្ធ​ផ្សេងៗ បានសម្រេច​រួចរាល់​តាម​ការគ្រោងទុក ដោយមាន​ការត្រួតពិនិត្យ​យ៉ាង​យកចិត្ត​ទុកដាក់​ពី​លោក​ ថោង ខុន រដ្ឋមន្ត្រី​ក្រសួង​ទេសចរណ៍ និង​លោក​ គួច ចំរើន អភិបាលខេត្ត​ព្រះសីហនុ​។

រដ្ឋមន្ត្រី​ក្រសួង​ទេសចរណ៍​លោក ​ថោង ខុន ឱ្យដឹងថា វេទិកា​ទេសចរណ៍​អាស៊ាន​ឆ្នាំ​ ២០២២ ​នឹង​ក្លាយជា​ព្រឹត្តិការណ៍​ដ៏សំខាន់​ក្នុង​ការប្រកាស​បើក​គោលដៅ​ទេសចរណ៍​ក្នុង​តំបន់​អាស៊ាន​ឡើងវិញ​ជា​ផ្លូវការ ជាមួយ​ការបង្ហាញ​សុទិដ្ឋិនិយម​ថា ព្រឹត្តិការណ៍​អន្តរជាតិ​នេះ​នឹង​ជួយ​ផ្សព្វផ្សាយ​ពី​ប្រទេស​កម្ពុជា​ជា​គោលដៅ​ទេសចរណ៍​សុវត្ថិភាព​មួយ​ក្នុង​តំបន់​អាស៊ាន​។

បើតាម​ក្រសួង​ទេសចរណ៍​រហូត​មកដល់​ពេលនេះ មាន​ការបញ្ជាក់​ពី​ការចូលរួម​ដោយផ្ទាល់​ពី​រដ្ឋមន្ត្រី​ទេសចរណ៍​អាស៊ាន និង​មន្ត្រីជាន់ខ្ពស់​ពី​ប្រទេស​សមាជិក​អាស៊ាន​ទាំង​ ១០ ចូលរួម​កិច្ចប្រជុំ​រដ្ឋមន្ត្រី​ទេសចរណ៍​អាស៊ាន និង​កិច្ចប្រជុំ​ពាក់ព័ន្ធ​នានា​ក្នុង​នោះ​ប្រតិភូ​អន្តរជាតិ​ចូលរួម​កិច្ចប្រជុំ​មាន​ចំនួន​ ១២៣ ​រូប​។

ចំណែក​ការតាំងពិព័រណ៍​ទេសចរណ៍​ (TRAVEX) មាន​អ្នកលក់ (Sellers) ​សរុប​ចំនួន​​ ១៨៧ ​ស្តង់ អ្នកទិញ ​(Buyers)​ ចំនួន​ ៤០ ​ក្រុមហ៊ុន សារព័ត៌មាន​សរុប​ចំនួន​ ២០ ​ស្ថាប័ន សរុប​ភ្ញៀវ​ចូលរួម​មាន​ចំនួន​ ៣២២ ​នាក់ មកពី​ប្រទេស​ចំនួន​ ២៧​។

ក្រសួង​ទេសចរណ៍​ឱ្យដឹងថា ឣំឡុងពេល​នៃ​វេទិកា​ទេស​ចរណ៍​អាស៊ាន​នេះ ក្នុងនាម​ជា​ម្ចាស់ផ្ទះ​បានរៀបចំ​កិច្ចប្រជុំ​របស់​ស្ថាប័ន​ទេសចរណ៍​ថ្នាក់ជាតិ កិច្ចប្រជុំ​ថ្នាក់​រដ្ឋមន្ត្រី​ទេសចរណ៍​អាស៊ាន កិច្ចប្រជុំ​អាស៊ាន​បូក​ ៣ (​ជប៉ុន កូរ៉េខាងត្បូង និង​ចិន​) កិច្ចប្រជុំ​អាស៊ាន​បូក​ ១ (​អាស៊ាន-ឥណ្ឌា​) កិច្ចប្រជុំ​អាស៊ាន​រុស្ស៊ី កិច្ចប្រជុំ​ជាមួយ​អង្គការ​ដៃគូ​ពាក់ព័ន្ធ ព្រមទាំង​កិច្ចប្រជុំ​ជាមួយ​ផ្នែក​ឯកជន និង​ព្រឹត្តិការណ៍​ពិព័រណ៍​ទេសចរណ៍​អន្តរជាតិ​ផងដែរ​។

សូមជម្រាបថា កម្ពុជា​ទទួល​ធ្វើជា​ម្ចាស់ផ្ទះ​រៀបចំ “​វេទិកា​ទេសចរណ៍​អាស៊ាន​” លើក​ទី​ ៤០ (ATF 2022) ដែល​ត្រូវ​រៀបចំ​ចាប់ពី​ថ្ងៃទី​ ១៦-២២ ខែមករា ឆ្នាំ​ ២០២២ នៅ​ក្រុងព្រះសីហនុ ខេត្ត​ព្រះសីហនុ​៕

វីដេអូ៖