The Phnom Penh Post Search

Search form




Logo of Phnom Penh Post newspaper Phnom Penh Post - ក្រសួង​អប់រំ​នឹង​ជ្រើសរើស​បេក្ខជន​ ៩ ៨១៨​ នាក់​ ឱ្យ​ចូលរៀន​ថ្នាក់​បរិញ្ញាបត្រ​ដោយ​មិន​បង់ថ្លៃ

ក្រសួង​អប់រំ​នឹង​ជ្រើសរើស​បេក្ខជន​ ៩ ៨១៨​ នាក់​ ឱ្យ​ចូលរៀន​ថ្នាក់​បរិញ្ញាបត្រ​ដោយ​មិន​បង់ថ្លៃ

Content image - Phnom Penh Post
បេក្ខជន​រង់ចាំ​មើល​លទ្ធផល​ប្រឡង​បាក់ឌុប​នៅ​វិទ្យាល័យ​ច្បារអំពៅ​កាលពី​ថ្ងៃទី​ ១៤ ​មករា​។ រូបថត BTV

ក្រសួង​អប់រំ​នឹង​ជ្រើសរើស​បេក្ខជន​ ៩ ៨១៨​ នាក់​ ឱ្យ​ចូលរៀន​ថ្នាក់​បរិញ្ញាបត្រ​ដោយ​មិន​បង់ថ្លៃ

ភ្នំពេញៈ ក្រសួង​អប់រំ យុវជន និង​កីឡា​បាន​ជូនដំណឹង​ថា ក្រសួង​នឹង​ធ្វើការ​ជ្រើសរើស​បេក្ខជន​ចំនួន ៩៨១៨ នាក់​ឱ្យ​ទទួល​អាហារូបករណ៍​ចូលរៀន​ថ្នាក់​បរិញ្ញាបត្រ​ដោយ​មិន​បង់ថ្លៃ​សិក្សា ១០០ ​ភាគរយ សម្រាប់​ឆ្នាំ​សិក្សា ២០២១-២០២២ នេះ​។ នេះ​បើ​យោងតាម​លោក រស់ សុវាចា អ្នកនាំពាក្យ ក្រសួង​អប់រំ ថ្លែងប្រាប់ ភ្នំពេញ​ប៉ុស្ដិ៍​កាលពី​ថ្ងៃទី​ ១៧ មករា​។

ក្រសួង​អប់រំ​បាន​ឱ្យដឹងថា ចំនួន​អាហារូបករណ៍​សរុប​មាន ៩ ៨១៨ នាក់​នេះ ត្រូវបាន​បែងចែក​ជា ៤ អាទិភាព គឺ​សម្រាប់​សិស្ស​ទូទៅ​ចំនួន ៦ ០២៩ ​នាក់ សិស្ស​អាទិភាព​នារី ចំនួន ១ ៣៨៧ ​នាក់ សិស្ស​អាទិភាព​ក្រីក្រ​ចំនួន ១ ៧៩៧ ​នាក់ និង​សិស្ស​អាទិភាព​តំបន់​ដាច់ស្រយាល ចំនួន ៦០៥ ​នាក់​។

សាកលវិទ្យាល័យ និង​វិទ្យាស្ថាន​ដែល​បេក្ខជន​អាច​ជ្រើសរើស​ចូល​សិក្សា សម្រាប់​គ្រឹះស្ថានឧត្ដមសិក្សា​សាធារណៈ​របស់​រដ្ឋ​មាន​ចំនួន ១៩ គឺ​សាកលវិទ្យាល័យ​ភូមិន្ទ​ភ្នំពេញ សាកលវិទ្យាល័យ​ភូមិន្ទ​កសិកម្ម សាកល​វិទ្យាល័យ​ភូមិន្ទ​នីតិសាស្ត្រ និង​សេដ្ឋកិច្ច សាកលវិទ្យាល័យ​ជាតិ​គ្រប់គ្រង សាកលវិទ្យាល័យ​ភូមិន្ទ​វិចិត្រសិល្បៈ សាកលវិទ្យាល័យ ជា ស៊ីម កំចាយមារ វិទ្យាស្ថាន​បច្ចេកវិទ្យា​កម្ពុជា សាកលវិទ្យាល័យ​ស្វាយរៀង សាកលវិទ្យាល័យ​ជាតិ​បាត់ដំបង សាកលវិទ្យាល័យ ហេង សំរិន ត្បូងឃ្មុំ ពុទ្ធិក​សាកលវិទ្យាល័យ​ព្រះសីហនុរាជ សាកលវិទ្យាល័យ​ក្រចេះ ពុទ្ធិក​សាកលវិទ្យាល័យ សម្តេច​អគ្គមហា​សេនាបតី​តេជោ ហ៊ុន សែន វិទ្យាស្ថាន​ជាតិ​កសិកម្ម​កំពង់ចាម វិទ្យាស្ថាន​ជាតិ​កសិកម្ម​ព្រែកលៀប វិទ្យាស្ថាន​ជាតិ​សង្គមកិច្ច វិទ្យាស្ថាន​បច្ចេកវិទ្យា​កំពង់​ឈើទាល វិទ្យាស្ថាន​បច្ចេកវិទ្យា​កំពង់ស្ពឺ និង​សាកលវិទ្យាល័យ​មានជ័យ​។

ចំណែក​គ្រឹះស្ថាន​ឧត្តមសិក្សា​ឯកជន​មាន​ចំនួន​ ២០ គឺ សាកល​វិទ្យាល័យ​វេស្ទើន សាកលវិទ្យាល័យ​បញ្ញាជាតិ សាកលវិទ្យាល័យ​មេគង្គ​កម្ពុជា សាកលវិទ្យាល័យ​អាស៊ី អឺរ៉ុប សាកលវិទ្យាល័យ​ធនធានមនុស្ស សាកល​វិទ្យាល័យ​គ្រប់គ្រង និង​សេដ្ឋកិច្ច សាកលវិទ្យាល័យ​កម្ពុជា សាកល​វិទ្យាល័យ​អន្តរជាតិ ឌូវី សាកល​វិទ្យាល័យ ឯកទេស​នៃ​កម្ពុជា សាកល​វិទ្យាល័យ​បញ្ញាសាស្ត្រ​កម្ពុជា សាកល​វិទ្យាល័យ​ឡាយហ្វ សាកលវិទ្យាល័យ​ភ្នំពេញ​អន្តរជាតិ សាកលវិទ្យាល័យ​សេដ្ឋកិច្ច និង​ហិរញ្ញវត្ថុ សាកល​វិទ្យាល័យ​វិទ្យាសាស្ត្រ សាកលវិទ្យាល័យ​អាស៊ី​បូព៌ា វិទ្យាស្ថាន​ក្រុង​អង្គរ វិទ្យាស្ថាន​សន្ត​ប៉ូល វិទ្យាស្ថាន​វ៉ាន់ដា វិទ្យាស្ថាន​ពាណិជ្ជសាស្ត្រ អេស៊ីលីដា និង​វិទ្យាស្ថាន​កសិកម្ម ឧកញ៉ា ម៉ុង ឫទ្ធី​។

បើតាម​ក្រសួង​អប់រំ លក្ខខណ្ឌ​នៃ​ការផ្តល់​អាហារូបករណ៍ ត្រូវគោរព​តាម​លក្ខខណ្ឌ​ចំនួន​ ២ គឺ​ទី​ ១ តាមរយៈ​ការជ្រើសរើស បេក្ខជន​នឹងត្រូវ​បានជ្រើសរើស​ដោយ​ស្វ័យប្រវត្តិ តាមរយៈ​ប្រព័ន្ធ​កុំព្យូទ័រ ដោយ​ផ្អែកលើ​និទ្ទេស​រួម​នៃ​លទ្ធផល​ប្រឡង​ជាប់​សញ្ញាបត្រ​មធ្យមសិក្សា​ទុតិយភូមិ​ក្នុង​ឆ្នាំ​សិក្សា​ ២០២០-២០២១​។ ទី ​២ តាមរយៈ​ការប្រឡង បេក្ខជន​ដែល​ប្រឡង​ជាប់​សញ្ញាបត្រ​មធ្យមសិក្សា​ទុតិយភូមិ ក្នុង​ឆ្នាំ​សិក្សា​ ២០២០-២០២១ នឹងត្រូវ​ធ្វើការ​ប្រឡង​នៅតាម​គ្រឹះស្ថាន​ឧត្តមសិក្សា​ដែល​បេក្ខជន​បាន​ជ្រើសរើស​មុខជំនាញ​ឆ្លងកាត់​ការប្រឡង​នឹង​ពុំទាន់​ជាប់​អាហា​រូបករណ៍​នៅ​កន្លែង​ណាមួយ​នៅឡើយ​។

លោក ហេង វ៉ាន់ដា ប្រធាន​ក្រុមប្រឹក្សាភិបាល សមាគម​គ្រឹះស្ថាន​ឧត្ដមសិក្សា​កម្ពុជា​ថ្លែងថា ក្នុងនាម​ជា​សាកលវិទ្យាធិការ​វិទ្យាស្ថាន​វ៉ាន់ដា លោក​តែងតែ​ផ្ដល់​អាហារូបករណ៍​ទៅដល់​ក្រសួង​អប់រំ ថ្នាក់ដឹកនាំ​មួយចំនួន​ក្នុង​ជួរ​រាជរដ្ឋាភិបាល និង​ផ្ដល់​អាហារូបករណ៍​ដោយផ្ទាល់​ទៅដល់​សិស្ស​ក្រីក្រ​ពិតប្រាកដ ដែល​ចង់​បន្ត​ការសិក្សា​ថ្នាក់​បរិញ្ញាបត្រ​។

លោក​ថ្លែងថា​៖ «​ខ្ញុំ​ជូនទៅ​ក្រសួង​អប់រំ ក្នុង ១ ​មុខវិជ្ជា ១៥ ​នាក់ អ៊ីចឹង ២ ​មុខ​វិទ្យា ៣០ ​នាក់ ក្នុង​ ១ ​ឆ្នាំ ហើយ​យើង​ជូន​ដល់​ថ្នាក់ដឹកនាំ​ធំៗ ដើម្បី​លោក​មានលទ្ធភាព​មើលទៅ​ទីឆ្ងាយៗ​សម្រាប់​ជួយ​ដល់​អ្នកក្រីក្រ​។ ចំណែក​ខ្ញុំ​ក៏​ផ្ដល់​អាហារូបករណ៍​ដែរ គឺ​ផ្ដល់​សម្រាប់​សិស្ស​ដែល​ក្រីក្រ គ្មាន​លទ្ធភាព​បន្ត​ការសិក្សា យើង​នឹង​ផ្ដល់ឱ្យ ហើយ​ផ្ដល់​អាហារ និង​អាច​ហាត់​ការងារ​នៅពេល​កំពុង​សិក្សា​ក្នុង​វិទ្យាស្ថាន​ផ្ទាល់​ផងដែរ​»​។

បើតាម​លោក វ៉ាន់ដា វិទ្យាស្ថាន​វ៉ាន់ដា បាន​ចាប់​ទទួល​សិស្ស​ចូលរៀន​ថ្នាក់​បរិញ្ញាបត្រ​ឆ្នាំ​សិក្សា ២០២១-២០២២ ចាប់តាំងពី​ខែធ្នូ ឆ្នាំ ​២០២១ មក​ម្ល៉េះ ហើយ​បច្ចុប្បន្ន​មាន​សិស្ស​មួយចំនួន​បាន​ចុះឈ្មោះ​ចូល​សិក្សា​បណ្ដើរៗ​ហើយ ខណៈ​វិទ្យាស្ថាន​នេះ​បាន​បណ្ដុះបណ្ដាល​សិស្ស​ផ្តោតលើ​ជំនាញ​គណនេយ្យ និង​ធនាគារ និង​ហិរញ្ញវត្ថុ​៕

វីដេអូ៖

អត្ថបទគួរចាប់អារម្មណ៍