ព្រះសីហនុៈ ក្រសួងទេសចរណ៍រៀបចំការតាំងពិព័រណ៍ជំនាញវិជ្ជាជីវៈទេសចរណ៍រយៈពេល ៤ ថ្ងៃ គឺចាប់ពីថ្ងៃទី ១៨ ដល់ថ្ងៃទី ២១ មករា ដែលការតាំងពិព័រណ៍នេះគឺជាផ្នែកមួយនៃវេទិកាទេសចរណ៍អាស៊ាន ដែលធ្វើឡើងក្នុងគោលបំណងដើម្បីទាក់ទាញឱ្យភ្ញៀវទេសចរចូលមកតំបន់អាស៊ានកាន់តែច្រើន។ នេះបើតាម លោក តាំង សុចិត្តគ្រឹស្នា ប្រធានមន្ទីរទេសចរណ៍ខេត្តព្រះសីហនុ។
លោកប្រធានមន្ទីរបានថ្លែងនៅថ្ងៃទី ១៧ ខែមករាថា ក្នុងវេទិកាទេសចរណ៍អាស៊ាននៅខេត្តព្រះសីហនុនេះមានរៀបចំពិព័ណ៍ជំនាញវិជ្ជាជីវៈទេសចរណ៍ ដែលមានអ្នកលក់ (Sellers) សរុបចំនួន ១៨៧ ស្តង់ អ្នកទិញ (Buyers) ចំនួន ៤០ ក្រុមហ៊ុន សារព័ត៌មានចំនួន ២០ ស្ថាប័ន និងភ្ញៀវចូលរួមមានចំនួន ៣២២ នាក់មកពីប្រទេសចំនួន ២៧។
លោកឱ្យដឹងថា ការរៀបចំពិព័រណ៍ជំនាញវិជ្ជាជីវៈទេសចរណ៍នៅខេត្តព្រះសីហនុនេះ គឺផ្តោតលើជំនាញផ្នែកសេវាកម្មម្ហូបអាហារ និងភេសជ្ជៈ (Food and Beverage Services) គេហកិច្ច (Housekeeping) និងជំនាញស្រាក្រឡុក (Cocktail and Mocktail) ដែលមានប្រយោជន៍សម្រាប់អ្នកចូលរួមអាចសិក្សារៀនសូត្របន្ថែម ក៏ដូចជាទទួលបានឱកាសហ្វឹកហាត់ជំនាញផ្ទាល់ និងចូលរួមការប្រកួតជំនាញខ្នាតតូចក្នុងកម្មវិធីនោះផងដែរ។
លោកថ្លែងថា៖ «គាត់មានឱកាសជួបអ្នកទិញ អ្នកលក់ក្រុមហ៊ុនធំៗ ក្រៅប្រទេសក្នុងស្រុកអី ជាពិសេសក្នុងស្រុកខ្មែរដែលយើងជាម្ចាស់ផ្ទះ។ អ៊ីចឹងគាត់នឹងអាចថា ធ្វើការផ្សព្វផ្សាយរួមគ្នាហើយនិងអាចជំរុញគោលដៅរួមគ្នា គឺធ្វើម៉េចឱ្យទេសចរចូលមកអាស៊ានកាន់តែច្រើន ក៏ដូចជាក្នុងប្រទេសទាំង ១០ ហ្នឹង»។ លោកប្រធានមន្ទីរប្រាប់ថា គណៈកម្មការគ្រប់គ្រងគម្រោងហូកានៃក្រសួងទេសចរណ៍បានជំរុញការផ្សព្វផ្សាយ និងលើកកម្ពស់ជំនាញវិជ្ជាជីវៈទេសចរណ៍កម្ពុជា ជាពិសេសឆ្លើយតបទៅនឹងពាក្យស្លោករបស់លោករដ្ឋមន្ត្រី ក្រសួងទេសចរណ៍ ដែលតែងតែលើកឡើងថា «ជំនាញវិជ្ជាជីវៈទេសចរណ៍ ជាអាយុជីវិតរបស់អ្នក (Tourism Skills is Your Life!»។
កញ្ញា ណុច សុភួង នាយកគ្រប់គ្រងក្រុមហ៊ុនឡេតស៍ហ្គោត្រាវែល & ធួរ - ថ្លែងនៅថ្ងៃទី ១៧ ខែមករាថា ការតាំងពិព័រណ៍ជំនាញវិជ្ជាជីវៈទេសចរណ៍ពិតជាឱកាសសម្រាប់ក្រុមហ៊ុនទេសចរណ៍អាចចូលរួម និងបង្ហាញពីផលិតផលរបស់ខ្លួនទៅកាន់សាធារណជនដែលនឹងចូលរួមក្នុងពិព័រណ៍នោះ ជាពិសេសភ្ញៀវបរទេស ឬក្នុងស្រុកក៏ដោយ ប៉ុន្តែការរៀបចំពិព័រណ៍ក្នុងអំឡុងពេលនេះហាក់ដូចជាមិនសូវត្រូវពេលបន្តិច ដោយសារតែបញ្ហាកូវីដ។ កញ្ញាថ្លែងថា៖ «បើសិនជាធ្វើឡើងនៅថ្ងៃធម្មតា ដែលមិនមានករណីប្រធានស័ក្តិ ឬគ្រោះធម្មជាតិកើតឡើង នោះកាន់តែល្អ ដែលយើងអាចបង្ហាញពីវិស័យទេសចរណ៍ ក៏ដូចជាជំនាញវិជ្ជាជីវៈខាងទេសចរណ៍ ឬក៏ពីផលិតផលទេសចរណ៍បានទៅឱ្យភ្ញៀវទាំងក្នុងស្រុក ក៏ដូចជាក្រៅស្រុកបានដឹង» ។
ឆ្លើយតបក្នុងចំណុចនេះ លោក តាំង សុចិត្តគ្រឹស្នា បានថ្លែងថា ពិព័រណ៍នេះ គឺបង្ហាញពីការបើកគោលដៅទេសចរណ៍អាស៊ានដែលជាគោលដៅមានសុវត្ថិភាព មានភាពទាក់ទាញមានផលិតផល សេវាកម្មសម្បូរបែប ជាពិសេសជាគោលដៅសុវត្ថិភាពដែលភ្ញៀវអាចទៅហើយត្រឡប់មកវិញ រួមទាំងអ្នកវិនិយោគ។
លោកថា៖ «ចង់បង្ហាញថា អាស៊ានយើងរួមគ្នាសហការក្នុងការបើកគោលដៅក្នុងប្រទេសទាំង ១០ ព្រោះនៅក្នុងពិភពលោកជាទូទៅគេមិនទាន់បើកទេមានន័យថា យើងបានធ្វើការរួមគ្នាជាមួយនឹងការទប់ស្កាត់កូវីដ និងការធ្វើការងារទេសចរណ៍ហ្នឹងគឺ យើងបានត្រៀមខ្លួនរួចរាល់ហើយ» ។
លោកបញ្ជាក់ថា ការធ្វើពិព័រណ៍ជំនាញវិជ្ជាជីវៈទេសចរណ៍នេះថ្វីដ្បិតតែជាជ្រុងមួយនៃវេទិកាទេសចរណ៍អាស៊ាន ប៉ុន្តែនេះគឺជាឱកាសដែលកម្រមាន ហេតុនេះត្រូវតែរៀបចំធ្វើ។
លោកបញ្ជាក់ថា៖ «អាហ្នឹងវាជាគោលការណ៍របស់អាស៊ាន ព្រោះមានន័យថា ១០ ប្រទេសប្តូរវេនគ្នា ធ្វើម្ចាស់ផ្ទះ ១ ឆ្នាំម្តង អ៊ីចឹងយើងត្រូវធ្វើ បើយើងអត់ធ្វើយើងនឹងខក ហើយត្រូវចាំ ១០ឆ្នាំទៀតទម្រាំយើងបានធ្វើជាម្ចាស់ផ្ទះ»។
លោក ហូ វណ្ឌី ទីប្រឹក្សាសមាគមទេសចរណ៍ថ្លែងនៅថ្ងៃទី ១៧ ខែមករាថា វេទិកាទេសចរណ៍អាស៊ានបានចូលដល់លើកទី ៣ហើយដែលកម្ពុជាធ្វើជាម្ចាស់ផ្ទះក្នុងនោះការតាំងពិព័រណ៍ជំនាញទេសចរណ៍អាស៊ាននេះ ក៏បានផ្តល់ផលប្រយោជន៍ដ៏ល្អមួយសម្រាប់និស្សិតជាពិសេសតាមសាលាវិជ្ជាជីវៈទេសចរណ៍ក៏ដូចជាអ្នកជំនាញទេសចរណ៍តែម្តងដែលគាត់អាចស្វែងយល់ពីគ្នាទៅវិញទៅមកដោយសំឡេងតែមួយ ការប្រតិបត្តិតែមួយ។
លោកថ្លែងថា៖ «យើងឃើញហើយពាក់ព័ន្ធជាមួយនឹងទេសចរណ៍តាមផ្លូវគោកយ៉ាងម៉េច ទេសចរណ៍អេកូយ៉ាងម៉េច? ទេសចរណ៍វប្បធម៌យ៉ាងម៉េច? ទេសចរណ៍ធម្មជាតិយ៉ាងម៉េច? ទេសចរណ៍កសិកម្មយ៉ាងម៉េច? ប៉ុន្តែទន្ទឹមនឹងនេះ ការចេញចូលនៅក្នុងសហគមន៍អាស៊ានទាំងមូលក៏មានភាពងាយស្រួលបើសិនជាអ្នកនោះ គាត់ក្លាយជាអ្នកជំនាញទេសចរណ៍ គាត់អាចចេញទៅបង្រៀន យើងអាចទទួលគេ គេអាចទទួលយើង»៕
